Tags : trump

ନୂଆଦିଲ୍ଲୀ : ରୁଷରୁ ତେଲ କିଣିବା ପଡ଼ିପାରେ ମହଙ୍ଗା। ପୁଣି ଭାରତ ଉପରେ ଲାଗି ପାରେ ୧୦୦ ପ୍ରତିଶତ ଟାରିଫ୍। ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ, ତାଙ୍କ ଦ୍ୱିତୀୟ କାର୍ଯ୍ୟକାଳରେ ଅନେକ ଦେଶ ଉପରେ ଶୁଳ୍କ ଲଗାଇ ବେଶ ଚର୍ଚ୍ଚାରେ ରହିଛନ୍ତି। ସେନେଟରେ ପାରିତ ଏକ ବିଲ୍ ଟ୍ରମ୍ପଙ୍କୁ ନୂତନ ଶକ୍ତି ଦେବ ବୋଲି ଆଶା କରାଯାଉଛି। ଯଦି ଏହି ବିଲ୍ ଆମେରିକା ସଂସଦର ଦ୍ୱିତୀୟ ଗୃହ, କଂଗ୍ରେସ ଦ୍ୱାରା ମଧ୍ୟ ମଞ୍ଜୁରୀ ପାଏ, ତେବେ ଆମେରିକା ରୁଷ ଏବଂ ଇରାନରୁ ତୈଳ କ୍ରୟ ପାଇଁ ଭାରତ ଉପରେ ୧୦୦% ଶୁଳ୍କ ଲଗାଇପାରେ। ଗୁରୁତ୍ୱପୂର୍ଣ୍ଣ କଥା ହେଉଛି, ଏହି ବିଲ୍ ଉପରେ ରିପବ୍ଲିକାନ୍ ଏବଂ ଡେମୋକ୍ରାଟିକ୍ ଶିବିରଗୁଡ଼ିକ ଏକମତ ଦେଇଥିବା ଜଣାପଡ଼ିଛି। ଶୁକ୍ରବାର, ଆମେରିକାର ସେନେଟ୍ ଏକ ବିଲ୍ ପାସ୍ କରିଛି ଯାହା ଦ୍ୱାରା ଆମେରିକାର ରାଷ୍ଟ୍ରପତିଙ୍କୁ ରୁଷ ଏବଂ ଇରାନରୁ ତେଲ କିଣୁଥିବା ଦେଶଗୁଡ଼ିକ ଉପରେ ୧୦୦% ଶୁଳ୍କ ଲଗାଇବାକୁ ଅଧିକାର ଦିଆଯାଇଛି। ସେନେଟ୍ ୮୬ ରୁ ୧୧ ଭୋଟରେ ବିଲ୍ କୁ ଅନୁମୋଦନ କରିଛି। ଏହାକୁ ଏବେ ଆମେରିକୀୟ ଗୃହ (କଂଗ୍ରେସ) ରେ ଉପସ୍ଥାପନ କରାଯିବ। ଅନୁମୋଦନ ପରେ, ଟ୍ରମ୍ପ ଭାରତ ଏବଂ ଚୀନ୍ ଭଳି ଦେଶଗୁଡ଼ିକ ଉପରେ ୧୦୦% ଶୁଳ୍କ ଲଗାଇବାର ଅଧିକାର ପାଇବେ। କାର୍ଯ୍ୟକାରୀ ହେବା ପରେ, ଏହା ରୁଷିଆନ୍ ଅଧିକାରୀଙ୍କ ଉପରେ ପ୍ରତିବନ୍ଧକ ଲଗାଇବ।

ଗୁରୁତ୍ୱପୂର୍ଣ୍ଣ କଥା ହେଉଛି, ଏହି ବିଲ୍ କୁ ରିପବ୍ଲିକାନ୍ ଏବଂ ଡେମୋକ୍ରାଟିକ୍ ଉଭୟ ଦଳରୁ ସମର୍ଥନ ମିଳିଛି। ଏହାର ଉଦ୍ଦେଶ୍ୟ ମସ୍କୋ ଏବଂ ତେହେରାନ ଉପରେ ଆର୍ଥିକ ଚାପ ବୃଦ୍ଧି କରିବା। ଏହା ସେହି ଦେଶଗୁଡ଼ିକୁ ମଧ୍ୟ ଟାର୍ଗେଟ କରେ ଯେଉଁମାନେ ତୈଳ ଏବଂ ଗ୍ୟାସ କ୍ରୟ ମାଧ୍ୟମରେ ରୁଷର ଯୁଦ୍ଧ ପ୍ରୟାସକୁ ପାଣ୍ଠି ଯୋଗାଇ ଦେଉଛନ୍ତି। ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସମେତ ରୁଷର ଉଚ୍ଚ ସରକାରୀ ଅଧିକାରୀଙ୍କ ଉପରେ ବାଧ୍ୟତାମୂଳକ କଟକଣା ଲାଗୁ କରାଯିବ।

ରୁଷର ଆର୍ଥିକ ପ୍ରତିଷ୍ଠାନ ଏବଂ ରୁଷର ଶକ୍ତି ପ୍ରକଳ୍ପ ଉପରେ କଟକଣା ଲଗାଇବା ପାଇଁ ମଧ୍ୟ ପ୍ରସ୍ତୁତି ଚାଲିଛି। ରୁଷର ପ୍ରତିରକ୍ଷା ଶିଳ୍ପକୁ ସମର୍ଥନ କରୁଥିବା ରୁଷର ଅଲିଗାର୍ଚ, ରାଷ୍ଟ୍ରାୟତ୍ତ ଉଦ୍ୟୋଗ ଏବଂ ବିଦେଶୀ କମ୍ପାନୀଗୁଡ଼ିକୁ ମଧ୍ୟ ଏଥିରେ ସାମିଲ କରାଯିବ।
ରୁଷରୁ ଅଶୋଧିତ ତୈଳ ଏବଂ ପ୍ରାକୃତିକ ଗ୍ୟାସ କିଣୁଥିବା ଶ୍ରେଷ୍ଠ ପାଞ୍ଚଟି ଦେଶ ଉପରେ ୧୦୦ ପ୍ରତିଶତ ପର୍ଯ୍ୟନ୍ତ ଶୁଳ୍କ ଲାଗୁ କରାଯିବ। ଏହି ଦେଶଗୁଡ଼ିକ ମଧ୍ୟରେ ଚୀନ୍ ଏବଂ ଭାରତ ଅନ୍ତର୍ଭୁକ୍ତ। ଶୁଳ୍କର ସ୍ତର ଆମେରିକାର ବାଣିଜ୍ୟ ପ୍ରତିନିଧି ଜାମିସନ୍ ଗ୍ରୀଅର୍ ଦ୍ୱାରା ନିର୍ଣ୍ଣୟ କରାଯିବ। ବିଲ୍ ରେ ରାଷ୍ଟ୍ରପତିଙ୍କ ଛାଡ଼ କ୍ଷମତା ମଧ୍ୟ ଅନ୍ତର୍ଭୁକ୍ତ, ଯାହା ହ୍ୱାଇଟ୍ ହାଉସକୁ ପ୍ରତିବନ୍ଧକ କିମ୍ବା କଟକଣା ଛାଡ଼ କରିବାର ଅଧିକାର ପ୍ରଦାନ କରେ।

ଛାଡ଼ ପ୍ରଦାନ କରିବା ପାଇଁ, ରାଷ୍ଟ୍ରପତିଙ୍କୁ କଂଗ୍ରେସକୁ ପ୍ରମାଣପତ୍ର ଦେବାକୁ ପଡ଼ିବ ଯେ ଛାଡ଼ ଜାତୀୟ ସ୍ୱାର୍ଥରେ ଅଛି।ଯେଉଁ ଦେଶଗୁଡ଼ିକ ରୁଷର ମୋଟ ପ୍ରାକୃତିକ ଗ୍ୟାସ ରପ୍ତାନିର ୧୫ ପ୍ରତିଶତରୁ କମ୍ ଆମଦାନୀ କରନ୍ତି ସେମାନଙ୍କୁ ଛାଡ଼ ଦିଆଯିବ। ଯେଉଁ ଦେଶଗୁଡ଼ିକ ରୁଷର ପ୍ରାକୃତିକ ଗ୍ୟାସର ବ୍ୟବହାର ହ୍ରାସ କରିବା ପାଇଁ କାମ କରୁଛନ୍ତି ସେମାନଙ୍କୁ ମଧ୍ୟ ଛାଡ଼ ଦିଆଯିବ।