Tags : trump

ୱାସିଂଟନ: ଇରାନର ନୂତନ ସର୍ବୋଚ୍ଚ ନେତା ମୋଜତାବା ଖେମିନି ଏବଂ ଆଇଆର୍‌ଜିସିର ବରିଷ୍ଠ ଅଧିକାରୀଙ୍କ ଉପରେ ଆମେରିକା ଏକ ବଡ଼ ପୁରସ୍କାର ଘୋଷଣା କରିଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଦାବି କରିଛନ୍ତି, ମୋଜତାବା ଖେମିନି ଜୀବିତ କିନ୍ତୁ ସମ୍ପ୍ରତି ଆକ୍ରମଣରେ ଆହତ ହୋଇଛନ୍ତି। ମୋଜତାବାଙ୍କ ସମେତ ଦଶ ଜଣ ପ୍ରମୁଖ ନେତାଙ୍କୁ ଟାର୍ଗେଟ କରାଯାଇଛି। ବିଶ୍ୱବ୍ୟାପୀ ବୃଦ୍ଧି ପାଉଥିବା ଆତଙ୍କବାଦୀ କାର୍ୟ୍ୟକଳାପ ଏବଂ ଆଇଆର୍‌ଜିସିର ବର୍ଦ୍ଧିତ ପ୍ରଭାବକୁ ରୋକିବା ପାଇଁ ଏହି ପଦକ୍ଷେପ ନିଆଯାଇଛି ବୋଲି ଆମେରିକା କହିଛି।
୧୦ ପ୍ରମୁଖ ଇରାନୀ ନେତାଙ୍କ ବିଷୟରେ ବିଶ୍ୱସନୀୟ ସୂଚନା ପ୍ରଦାନକାରୀଙ୍କ ପାଇଁ ଆମେରିକାର ବୈଦେଶିକ ବିଭାଗ ପୁରସ୍କାର ଘୋଷଣା କରିଛି। ଏହି ପୁରସ୍କାର ୧୦ ନିୟୁତ ଡଲାର ପର୍ୟ୍ୟନ୍ତ ହୋଇପାରେ ବୋଲି କୁହାଯାଇଛି। ମୋଜତାବାଙ୍କ ପାଇଁ ବଡ଼ ଧରଣର ପୁରସ୍କାର ଘୋଷଣା ହୋଇଛି। ଏହା ବ୍ୟତୀତ, ଆବଶ୍ୟକ ହେଲେ ସୂଚନା ପ୍ରଦାନକାରୀଙ୍କୁ ଅନ୍ୟ ଦେଶକୁ ସୁରକ୍ଷିତ ସ୍ଥାନାନ୍ତର କରିବାକୁ ମଧ୍ୟ ଆମେରିକା ପ୍ରତିଶ୍ରୁତି ଦେଇଛି। ସେହିପରି ମୋଜତାବାଙ୍କ ଅବସ୍ଥିତି ପ୍ରକାଶ କରୁଥିବା ଯେକୌଣସି ବ୍ୟକ୍ତିଙ୍କୁ ମୋଟା ଅଙ୍କର ପୁରସ୍କାର ପ୍ରଦାନ ପାଇଁ ଘୋଷଣା କରାଯାଇଛି। ଏପରି କରି ଆମେରିକା ସରକାର ମୋଜତାବାଙ୍କୁ ଧରିବା ଫାଇଁ ଥୋପ ପକାଇଥିବା କୁହାଯାଉଛି।ଡୋନାଲ୍ଡ ଟ୍ରମ୍ପ ଏବେ ଏହି ଯୁଦ୍ଧକୁ ଶୀଘ୍ର ଶେଷ କରିବା ମନୋଭାବରେ ଥିବା ଦେଖାଯାଉଛି। ଆମେରିକା ଏବଂ ଇସ୍ରାଏଲ ଦ୍ୱାରା ଇରାନ ଉପରେ ବଡ଼ ଆକ୍ରମଣ କରାଯାଉଛି, ତେଲ ପ୍ରତିଷ୍ଠାନଠାରୁ ଆରମ୍ଭ କରି ଶୀର୍ଷ ଇରାନ ନେତାଙ୍କ ପର୍ୟ୍ୟନ୍ତ ସବୁକିଛି ଟାର୍ଗେଟରେ ରହିଛି। ଏହା ମଧ୍ୟ ଦାବି କରାଯାଉଛି, ମୋଜତାବା ଆମେରିକା ଏବଂ ଇସ୍ରାଏଲ ଦ୍ୱାରା ହୋଇଥିବା ଆକ୍ରମଣରେ ଗୁରୁତର ଆହତ ହୋଇଛନ୍ତି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମଧ୍ୟ ଦାବି କରିଛନ୍ତି, ମୋଜତାବା ଜୀବିତ ଅଛନ୍ତି, କିନ୍ତୁ ଆହତ ହୋଇଛନ୍ତି। ଯେଉଁ ଇରାନୀ ନେତାମାନଙ୍କ ଉପରେ ପୁରସ୍କାର ଘୋଷଣା କରାଯାଇଛି ସେମାନଙ୍କ ମଧ୍ୟରେ ସର୍ବୋଚ୍ଚ ନେତା ମୋଜତାବା ଖେମିନି, ସର୍ବୋଚ୍ଚ ନେତାଙ୍କ କାର୍ୟ୍ୟାଳୟର ଡେପୁଟି ଚିଫ୍ ଅଫ୍ ଷ୍ଟାଫ୍ ଅଲି ଅସଗର ହେଜାଜି ଏବଂ ଇରାନର ସୁରକ୍ଷା ମୁଖ୍ୟ ଅଲି ଲାରିଜାନି ଅଛନ୍ତି। ଆମେରିକା ଏବଂ ଇସ୍ରାଏଲ ଇରାନ ବିରୋଧରେ ଏୟାର୍ ଷ୍ଟ୍ରାଇକ୍ ତୀବ୍ର କରୁଥିବା ସମୟରେ ଏହି ପୁରସ୍କାର ଘୋଷଣା କରାଯାଇଛି।