Tags : swine flu

ନୂଆଦିଲ୍ଲ : ଦେଶରେ ବଢିଲା ସ୍ବାଇନ୍ ଫ୍ଲୁ ଭୟ । ରାଜଧାନୀ ଦିଲ୍ଲୀରେ ସଂକ୍ରମିତଙ୍କ ସଂଖ୍ୟା ୧୮ଶହ ପାର୍ । ଅନ୍ୟ ରାଜ୍ୟ ତୁଳନାରେ ଦିଲ୍ଲୀରେ ୬ଗୁଣା ବୃଦ୍ଧି ପାଇଛି H1N1 ସଂକ୍ରମଣ । ଦିଲ୍ଲୀରେ ମୌସୁମୀ ବର୍ଷା ଓ ପାଗ ପରିବର୍ତ୍ତନ ପରେ ଏହି ସଂକ୍ରମଣ ଦ୍ରୁତ ଗତିରେ ବୃଦ୍ଧି ପାଉଛି । ବିଭିନ୍ନ ହସ୍ପିଟାଲରେ ଶ୍ବାସକ୍ରିୟା ସଂକ୍ରମଣ ଜନିତ ରୋଗୀମାନଙ୍କ ସଂଖ୍ୟା ବୃଦ୍ଧି ପାଇଛି। କିଛି ଡାକ୍ତରଙ୍କ ସମେତ ଦିଲ୍ଲୀର ଏକ ସରକାରୀ ହସ୍ପିଟାଲର ମୁଖ୍ୟ ମଧ୍ୟ H1N1 ପଜିଟିଭ୍ ପରୀକ୍ଷା କରିଛନ୍ତି । ଦେଶରେ ବଢୁଥିବା ସ୍ବାଇନ ଫ୍ଲୁ ସଂକ୍ରମଣକୁ ଦେଖି କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ଜେପି ନଡାଙ୍କ ଅଧ୍ୟକ୍ଷତାରେ ଏକ ଜରୁରୀ ସମୀକ୍ଷା ବୈଠକ ହୋଇଛି । ସ୍ଥିତିକୁ ଦୃଷ୍ଟିରେ ରଖି ସରକାରୀ ହସ୍ପିଟାଲଗୁଡ଼ିକୁ ପର୍ଯ୍ୟାପ୍ତ ବ୍ୟବସ୍ଥା ରଖିବାକୁ ନିର୍ଦ୍ଦେଶ ଦିଆଯାଇଛି । ସଂକ୍ରମଣ ପାଟର୍ଣ୍ଣ, ପ୍ରଭାବିତ ଅଞ୍ଚଳ ଏବଂ ସମ୍ଭାବ୍ୟ ହଟସ୍ପଟ୍ ଉପରେ ନଜର ରଖିବାକୁ କୁହାଯାଇଛି । 
ଦିଲ୍ଲୀରେ ଗୋଟିଏ ଦିନରେ H1N1ର ୧୧୪ ରୋଗୀ ଚିହ୍ନଟ ହୋଇଛନ୍ତି । ଚଳିତ ବର୍ଷ ରୋଗୀଙ୍କ ସଂଖ୍ୟା ୧ ହଜାର ୭୭୭କୁ ବୃଦ୍ଧି ପାଇଛି । ଅଗଷ୍ଟ ୬ ସୁଦ୍ଧା ଦିଲ୍ଲୀରେ ସ୍ଵାଇନ ଫ୍ଲୁ ରୋଗୀଙ୍କ ସଂଖ୍ୟା ୧୩୪୪ରେ ପହଞ୍ଚିଥିଲା । ଅର୍ଥାତ୍ ମାତ୍ର ୧୪ ଦିନ ମଧ୍ୟରେ ଦିଲ୍ଲୀରେ ୪୩୩ ନୂଆ ମାମଲା ଚିହ୍ନଟ ହୋଇଛି । ଅଗଷ୍ଟ ୨୦ରେ ୧୧୪ ନୂଆ ମାମଲା ସାମ୍ନାକୁ ଆସିଛି । 

ଗତ ବର୍ଷ ଏହି ସମୟରେ ୨୨୯ ସ୍ଵାଇନ ଫ୍ଲୁ ମାମଲା ଆସିଥିଲା । ଗତ ବର୍ଷ ତୁଳନାରେ ଚଳିତ ବର୍ଷ ମାମଲା ସଂଖ୍ୟା ପ୍ରାୟ ଆଠ ଗୁଣ ବୃଦ୍ଧି ପାଇଛି । ଏମ୍ସ ବିଶେଷଜ୍ଞଙ୍କ ଅନୁଯାୟୀ, ମୌସୁମୀ ଋତୁରେ ତାପମାତ୍ରା ଏବଂ ଆର୍ଦ୍ରତାରେ ପରିବର୍ତ୍ତନ ଯୋଗୁଁ ଇନଫ୍ଲୁଏଞ୍ଜା ମାମଲା ବୃଦ୍ଧି ହେଉଛି । ବୟସ୍କ ବ୍ୟକ୍ତି ଏବଂ ପୂର୍ବରୁ ଫୁସଫୁସ, ହୃଦୟ ଏବଂ ମଧୁମେହ ସମ୍ବନ୍ଧୀୟ ରୋଗ ଥିବା ଲୋକଙ୍କ ମଧ୍ୟରେ ଗୁରୁତର ସଂକ୍ରମଣ ହେବାର ଆଶଙ୍କା ଅଧିକ ରହୁଛି ।

ଡାକ୍ତରଙ୍କ ମତରେ, ବର୍ଷା ଦିନେ ଅନେକ ରୋଗୀ ଦୀର୍ଘ ସମୟ ଧରି କାଶ ଏବଂ ଜ୍ୱର ଅନୁଭବ କରୁଛନ୍ତି । ବାୟୁ ପ୍ରଦୂଷଣ ଯୋଗୁଁ ଫୁସଫୁସରେ ପ୍ରଦାହ ମଧ୍ୟ କିଛି ରୋଗୀଙ୍କ କାଶ ଏବଂ ଶ୍ୱାସକ୍ରିୟା ସମସ୍ୟାକୁ ବଢ଼ାଇପାରେ । H1N1 ସଂକ୍ରମଣ ସାଧାରଣତଃ ଜ୍ୱର, କାଶ, ଗଳା ଯନ୍ତ୍ରଣା, ମୁଣ୍ଡବିନ୍ଧା, ଶରୀର ଯନ୍ତ୍ରଣା ଏବଂ ଥକ୍କାପଣ ଭଳି ଲକ୍ଷଣ ସୃଷ୍ଟି କରେ ।