Jul 22, 2026
ମୁଖ୍ୟ ଖବର
ନୂଆଦିଲ୍ଲୀ: ଜନ୍ତର ମନ୍ତରରେ ଛାତ୍ର ପ୍ରତିବାଦ ସମୟରେ ପୁଲିସ କାର୍ଯ୍ୟାନୁଷ୍ଠାନ ମାମଲା ବୁଧବାର ସୁପ୍ରିମକୋର୍ଟରେ ପହଞ୍ଚିଛି। ଛାତ୍ରମାନଙ୍କ ବିରୋଧରେ ନିଆଯାଇଥିବା କାର୍ଯ୍ୟାନୁଷ୍ଠାନରେ ଜଣେ ଆଇନଜୀବୀ କୋର୍ଟଙ୍କ ହସ୍ତକ୍ଷେପ ଲୋଡ଼ିଥିଲେ। ତେବେ ଭାରତର ପ୍ରଧାନ ବିଚାରପତି (ସିଜେଆଇ) ସୂର୍ଯ୍ୟକାନ୍ତଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ଏହି ମାମଲାରେ ହସ୍ତକ୍ଷେପ କରିବାକୁ ମନା କରି କହିଛନ୍ତି ଯେ, କୋର୍ଟଙ୍କ ସମୟ ଏହିପରି ଭାବେ ନଷ୍ଟ କରାଯିବା ଉଚିତ୍ ନୁହେଁ। ଖଣ୍ଡପୀଠ ଆଇନଜୀବୀଙ୍କୁ କହିଛନ୍ତି, ଆପଣ ଆପଣଙ୍କର ଏବଂ ଆମର ସମୟ ନଷ୍ଟ କରୁଛନ୍ତି।
ଆଇନଜୀବୀ କୋର୍ଟଙ୍କୁ କହିଥିଲେ ଯେ, ଛାତ୍ରଛାତ୍ରୀମାନେ ଏନଇଇଟି ପରୀକ୍ଷା ବ୍ୟବସ୍ଥାରେ ସଂସ୍କାର ଏବଂ ନ୍ୟାସନାଲ ଟେଷ୍ଟିଂ ଏଜେନ୍ସି (ଏନଟିଏ)ଭାଙ୍ଗିବା ଦାବିରେ ପ୍ରତିବାଦ କରୁଥିଲେ। ସେ କୋର୍ଟଙ୍କର ହସ୍ତକ୍ଷେପ ପାଇଁ ଆବେଦନ କରିଥିଲେ। କୋର୍ଟ ଲାଠିଚାର୍ଜ ଭିଡିଓ ଦେଖିବାକୁ ମଧ୍ୟ ମନା କରିଦେଇଛନ୍ତି। ଶୁଣାଣି ସମୟରେ,ଆଇନଜୀବୀ ପୁଲିସ କାର୍ଯ୍ୟାନୁଷ୍ଠାନର କିଛି ଭିଡିଓ କୋର୍ଟଙ୍କୁ ଦେଖାଇବାକୁ ଅନୁମତି ମାଗିଥିଲେ। ସୁପ୍ରିମକୋର୍ଟ ସ୍ପଷ୍ଟ ଭାବରେ କହିଥିଲେ ଆମେ ଭିଡିଓ ଦେଖିବାକୁ ଆଗ୍ରହୀ ନୁହଁ। ଏପରି କହି ଶୀର୍ଷକୋର୍ଟ ଆବେଦନକୁ ତୁରନ୍ତ ତାଲିକାଭୁକ୍ତ କରିବାକୁ ମଧ୍ୟ ମନା କରିଦେଇଛନ୍ତି।
ପୂର୍ବରୁ ମଙ୍ଗଳବାର ଦିନ, ଦିଲ୍ଲୀ ହାଇକୋର୍ଟ ସଂସଦ ଅଭିମୁଖେ କକ୍ରୋଚ୍ ଜନତା ପାର୍ଟିର ପ୍ରତିବାଦ ଶୋଭାଯାତ୍ରାରେ ଅଂଶଗ୍ରହଣ କରିଥିବା ଛାତ୍ରମାନଙ୍କ ବିରୋଧରେ ପୁଲିସର ମାତ୍ରାଧିକ ବଳ ପ୍ରୟୋଗ ସମ୍ପର୍କିତ ଏକ ଆବେଦନକୁ ତୁରନ୍ତ ତାଲିକାଭୁକ୍ତ କରିବାକୁ ମନା କରିଦେଇଥିଲେ। ବୁଧବାର ଶୁଣାଣି ପାଇଁ ତାଲିକାଭୁକ୍ତ କରିବା ସମୟରେ ମୁଖ୍ୟ ବିଚାରପତି ଡିକେ ଉପାଧ୍ୟାୟ ଏବଂ ବିଚାରପତି ତେଜସ କାରିଆଙ୍କ ଖଣ୍ଡପୀଠ ଆବେଦନକାରୀଙ୍କୁ କହିଥିଲେ, ଏସବୁ ମାମଲା ମଧ୍ୟକୁ କୋର୍ଟଙ୍କୁ ଟାଣନ୍ତୁ ନାହିଁ।
Comments ସମସ୍ତ ମତାମତ