Tags : SOA

ଭୁବନେଶ୍ୱର: ସମାଜରେ ପରିବର୍ତନ ଆଣିବାକୁ ହେଲେ ପ୍ରଥମେ ନିଜ ଭିତରେ ପରିବର୍ତନ ଆଣିବା ଆବଶ୍ୟକ । ଆମର ଚିନ୍ତାଧାରା, ଆଚରଣ ଓ କାର୍ଯ୍ୟରେ ସକାରାତ୍ମକତା ଆଣିବା ଜରୁରୀ । ଏହିଭଳି ଏକ ମହତ୍ ଉଦ୍ଦେଶ୍ୟ, ଦୃଢ଼ ସଂକଳ୍ପ ଓ ସମର୍ପିତ ପ୍ରୟାସର ମିଳିତ ପ୍ରତିଫଳନ ‘ଜାଗୋ’ ବୋଲି କହିଛନ୍ତି ଶିକ୍ଷା ଓ ଅନୁସନ୍ଧାନ (ସୋଆ)ର ଉପସଭାପତି ଶ୍ରୀମତି ଶାଶ୍ୱତୀ ଦାସ ।
ସୋଆର ସାମାଜିକ ଓ ସାଂସ୍କୃତିକ କ୍ଲବ ’ଜାଗୋ’ ୨୦ ବର୍ଷରେ ପଦାର୍ପଣ କରିଥିବା ବେଳେ ଏହାର ପ୍ରତିଷ୍ଠା ଦିବସ ଅବସରରେ ମୁଖ୍ୟ ଅତିଥି ଭାବେ ଯୋଗ ଦେଇ ଏଭଳି ମତ ରଖିଛନ୍ତି ଶ୍ରୀମତି ଦାସ । 
ଶନିବାର ସୋଆ ପରିଚାଳିତ ଇନ୍‌ଷ୍ଟିଚ୍ୟୁଟ୍ ଅଫ୍ ଟେକ୍ନିକାଲ୍ ଏଜୁକେସନ୍ ଆଣ୍ଡ ରିସର୍ଚ୍ଚ (ଆଇଟିଇଆର) ପରିସରରେ ‘ଜାଗୋ’ର ପ୍ରତିଷ୍ଠା ଦିବସ ଅବସରରେ ଶ୍ରୀମତି ଦାସ ଛାତ୍ରଛାତ୍ରୀ ଓ ଜାଗୋ ପରିବାରର ସମସ୍ତ ସଦସ୍ୟମାନଙ୍କୁ ସ୍ନେହ, ଶ୍ରଦ୍ଧା ଓ ଶୁଭ କାମନା ଜଣାଇବା ସହ ଜାଗୋର ମୂଳମନ୍ତ୍ର ‘ଆମେ ବଦଳିବା, ଜଗତ ବଦଳିବ, ଆମେ ସୁଧୁରିବା, ଜଗତ ସୁଧୁରିବ’ କୁ ଊଦ୍ଧୃତ କରି ଏହା ଆମକୁ ପ୍ରେରଣା ଦିଏ ବୋଲି କହିଛନ୍ତି । ସମାଜରେ ସକାରାତ୍ମକ ପରିବର୍ତନ ଆଣିବାର ଏକ ଦୃଢ଼ ସଂକଳ୍ପ ହେଉଛି ଜାଗୋ ବୋଲି ଶ୍ରୀମତି ଦାସ କହିଛନ୍ତି । 
ଜ୍ଞାନକୁ ଅନ୍ୟମାନଙ୍କ ସହ ବାଂଟିବା ଦ୍ୱାରା ହିଁ ଜ୍ଞାନର ପ୍ରକୃତ ସାର୍ଥକତା ଆସିଥାଏ ଓ ସମାଜର ମଙ୍ଗଳ ପାଇଁ ଏହା ଉପଯୋଗୀ ହୋଇଥାଏ ବୋଲି ସେ କହିଛନ୍ତି । 
୨୦୦୭ ମସିହାରୁ ଟିମ୍ ଜାଗୋର ପ୍ରତିଷ୍ଠା ହୋଇଥିବା ବେଳେ ଏହା ବସ୍ତିର ଛୋଟଛୋଟ ପିଲାମାନଙ୍କର ସାମଗ୍ରିକ ବିକାଶ ଦିଗରେ କାର୍ଯ୍ୟ କରିଆସୁଛି ଏବଂ ସୋଆର ସ୍ୱେଚ୍ଛାସେବୀ ଛାତ୍ରଛାତ୍ରୀ ନିଜର ବୃତିଗତ ଶିକ୍ଷା ସହ ସମାଜର ମଙ୍ଗଳ ପାଇଁ ଏଭଳି ମହାନ କାର୍ଯ୍ୟରେ ନିଜକୁ ସାମିଲ କରିଛନ୍ତି । ସୋଆ ଛାତ୍ରଛାତ୍ରୀମାନେ ବିଶ୍ୱବିଦ୍ୟାଳୟ କ୍ୟାମ୍ପସ୍ ନିକଟବର୍ତୀ ବସ୍ତି ଅଂଚଳର ଛାତ୍ରଛାତ୍ରୀମାନଙ୍କୁ ପାଠ ପଢ଼ାଇବା ସହ ସମାଜର ମୁଖ୍ୟ ସ୍ରୋତରେ ସାମିଲ କରାଇବାର ପ୍ରୟାସ କରିଥାନ୍ତି ।  ନିଜ ପାଠପଢ଼ା ସହ ସେମାନେ ଏଭଳି ମହାନ କାର୍ଯ୍ୟରେ ନିଜକୁ ସାମିଲ କରିଥାନ୍ତି । 
ପ୍ରତିଷ୍ଠା ଦିବସ ଅବସରରେ ଶ୍ରୀମତି ଦାସ କହିଥିଲେ ଯେ ଜାଗୋର ଯାତ୍ରା ଆମର ଗୌରବ, ଜ୍ଞାନ ଆମର ଶକ୍ତି, ସେବା ଆମର ଧର୍ମ ଏବଂ ଏକ ଉତମ ଭବିଷ୍ୟତ ଗଠନ ଆମର ସଂକଳ୍ପ । ତେଣୁ ସମସ୍ତେ ଏକତ୍ରିତ ହୋଇ ଜାଗୋର ଏହି ମହାନ ଯାତ୍ରାକୁ ଆହୁରି ଆଗକୁ ନେବା ସହ ଏକ ସୁନ୍ଦର. ସମୃଦ୍ଧ ଓ ମାନବିକ ଭବିଷ୍ୟତ ଗଠନରେ ସହଭାଗୀ ହେବା ନେଇ ଶ୍ରୀମତି ଆହ୍ୱାନ ଦେଇଥିଲେ । 
କାର୍ଯ୍ୟକ୍ରମରେ ସୋଆ କୁଳପତି ପ୍ରଫେସର ପ୍ରଦୀପ୍ତ କୁମାର ନନ୍ଦ ଅଧ୍ୟକ୍ଷତା କରିବା ସହ  ଶିଶୁମାନଙ୍କର ଶାରିରୀକ, ମାନସିକ ଓ ସାମାଜିକ ଉନ୍ନତି କ୍ଷେତ୍ରରେ ବିଶ୍ୱବିଦ୍ୟାଳୟର ଏହା ଏକ ଅଭିନବ ବୋଲି କହିଥିଲେ । 
କାର୍ଯ୍ୟକ୍ରମରେ ଆଇଟିଇଆରର ଡିନ୍ ପ୍ରଫେସର ପି.କେ ସାହୁ ଓ ପରୀକ୍ଷା ନିୟନ୍ତ୍ରିକା ପ୍ରଫେସର ମଞ୍ଜୁଳା ଦାସ ସମ୍ମାନିତ ଅତିଥି ଭାବେ ଯୋଗ ଦେଇ ଛାତ୍ରଛାତ୍ରୀମାନଙ୍କୁ ଉତ୍ସାହିତ କରିଥିଲେ । 
ଏହି ଅବସରରେ ଆଇଟିଇଆରର ଆଡିସ୍‌ନାଲ୍ ଡିନ୍ (ଷ୍ଟୁଡେଂଟ ଆଫେୟାର୍ସ) ପ୍ରଫେସର ରେଣୁ ଶର୍ମା ସ୍ୱାଗତ ଭାଷଣ ପ୍ରଦାନ କରିଥିବା ବେଳେ ଜାଗୋର ମେଂଟର ପ୍ରଫେସର ଅନୀତା ପଣ୍ଡା ଧନ୍ୟବାଦ ଅର୍ପଣ କରିବା ପରିପ୍ରେକ୍ଷୀରେ ଜାଗୋର ସ୍ୱେଚ୍ଛାସେବୀମାନଙ୍କୁ ପ୍ରୋତ୍ସାହନ ଦେବା ସହ କୁନିକୁନି ପିଲାମାନଙ୍କୁ ସ୍ନେହ ପ୍ରଦାନ କରିଥିଲେ ।  ଏଭଳି ଲୁକ୍କାୟିତ ପ୍ରତିଭାଙ୍କୁ ବାହାରକୁ ଆଣିବାର ଲକ୍ଷ୍ୟ ନେଇ ପ୍ରୟାସ ଆରମ୍ଭ କରିଥିବା ଟିମ ଜାଗୋ ୧୯ ବର୍ଷ ଅତିକ୍ରମ କରି ୨୦ ବର୍ଷରେ ପାଦ ଥାପିଛି ।  ଉପଯୁକ୍ତ ଶିକ୍ଷା ଓ ସାମଗ୍ରିକ ବିକାଶ ଜରିଆରେ ସେମାନଙ୍କର ବ୍ୟକ୍ତିତ୍ୱ ନିର୍ମାଣ ପାଇଁ ଟିମ୍ ଜାଗୋ ପ୍ରତିଶ୍ରୁତିବଦ୍ଧ ବୋଲି ସେ କହିଥିଲେ । 
କାର୍ଯ୍ୟକ୍ରମରେ ଶିଶୁମାନଙ୍କ ଦ୍ୱାରା ଏବଂ ଟିମ୍ ଜାଗୋର ସଦସ୍ୟ ମାନଙ୍କ ଦ୍ୱାରା ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା । ଏହି ଅବସରରେ ଜାଗୋ ଛାତ୍ରଛାତ୍ରୀମାନଙ୍କୁ ଉପସଭାପତି ଶ୍ରୀମତି ଦାସ ଓ ଅନ୍ୟ ଅତିଥିମାନେ ସ୍କୁଲ ବ୍ୟାଗ ପ୍ରଦାନ କରିଥିଲେ ।