Jul 2, 2022
ମୁଖ୍ୟ ଖବର
ବ୍ରଜରାଜନଗର ଉପନିର୍ବାଚନରେ କଂଗ୍ରେସ କରିବ କି କରିସ୍ମା
ବିଧାୟକମାନଙ୍କୁ ସାଙ୍ଗରେ ନେଇ ଚାଲିପାରିବେକି ଶରତ ?
ଛାତ୍ର, ଯୁବ ଓ ମହିଳା କଂଗ୍ରେସ ହେବକି ଚଳଚଂଚଳ ?
ଓଡ଼ିଶା କଂଗ୍ରେସ ପାଇଛି ଏବେ ନୂଆ ମଙ୍ଗୁଆଳ । ପଶ୍ଚିମ ଓଡ଼ିଶାର ଟାଣୁଆ ନେତା ଶରତ ପଟ୍ଟନାୟକ ଓଡ଼ିଶା କଂଗ୍ରେସର ମଙ୍ଗ ସମ୍ଭାଳିଛନ୍ତି । କଂଗ୍ରେସ ହାଇକମାଣ୍ଡ ସୋନିଆ ଗାନ୍ଧୀ ନିରଞ୍ଜନ ପଟ୍ଟନାୟକଙ୍କର ଇସ୍ତଫା ପତ୍ର ଗ୍ରହଣ କରିବା ପରେ ଶରତଙ୍କ କାନ୍ଧରେ ଏବେ କଂଗ୍ରେସ ଭାର ସମର୍ପି ଦେଇଛନ୍ତି ।
ପିସିସି ସଭାପତି ହେବା ପରେ ଶରତଙ୍କ ସାମ୍ନାରେ ଏବେ ଅନେକ ଆହ୍ୱାନ । ପ୍ରଥମ ଆହ୍ୱାନଟି ହେଉଛି ବ୍ରଜରାଜନଗର ଉପନିର୍ବାଚନ । ବିଗତ ଉପନିର୍ବାଚନମାନଙ୍କରେ କଂଗ୍ରେସର ପ୍ରାର୍ଥୀମାନେ ଅମାନତ ହରାଇଥିବାବେଳେ ଏହି ନିର୍ବାଚନ ଶରତଙ୍କ ପାଇଁ ଚ୍ୟାଲେଞ୍ଜ ସୃଷ୍ଟିକରିଛି । ଗୋଟିଏ ପଟେ ହାତରେ ଆଉ ମାତ୍ର ଦୁଇ ଚାରିଦିନ ସମୟ ଥିବାବେଳେ ଏଯାଏଁ ବ୍ରଜରାଜନଗରରେ କଂଗ୍ରେସ ଜୋରଦାର ପ୍ରଚାର ଆରମ୍ଭ କରିପାରିନାହିଁ । ଏଭଳି ସମୟରେ ଶରତ କି ରଣନୀତି କରୁଛନ୍ତି ତାହା ଉପରେ ଏବେ ସମସ୍ତଙ୍କ ନଜର ରହିଛି ।
ଶରତଙ୍କ ପାଇଁ ମୁଖ୍ୟ ଆହ୍ୱାନ ହେଉଛି ଗୋଷ୍ଠୀକନ୍ଦଳ । କନ୍ଦଳ କେବେବି କଂଗ୍ରେସକୁ ଛାଡ଼ୁନାହିଁ । ଗୋଟିଏ ପଟେ ବିଧାୟକମାନେ ଜଣେ ବିଧାୟକଙ୍କୁ ପିସିସି ସଭାପତି କରିବାକୁ ଦାବି କରୁଥିଲେ । କିନ୍ତୁ ହାଇକମାଣ୍ଡ ବାରବାର ପରାଜୟ ବରଣ କରୁଥିବା ଶରତଙ୍କ ହାତରେ କଂଗ୍ରେସର କମାଣ ଧରାଇ ଦେଇଛନ୍ତି । ଏକ୍ଷେତ୍ରରେ ଶରତ ବିଧାୟକମାନଙ୍କୁ ସାଙ୍ଗରେ ନେଇପାରିବେ ତ ? ଏ ପ୍ରଶ୍ନ ଉଠିବା ସ୍ୱାଭାବିକ ।
ଖାଲି ପିସିସିର ପଦାଧିକାରୀ କି ନେତା ନୁହଁନ୍ତି ଦଳର ଛାମୁଆ ସଂଗଠନ ମଧ୍ୟ ଭିନ୍ନଭିନ୍ନ ଗୋଷ୍ଠୀରେ ବିଭକ୍ତ ହୋଇଯାଇଛି । ଯୁବ କଂଗ୍ରେସ ସହ ଛାତ୍ର କଂଗ୍ରେସର ତାଳମେଳ ନାହିଁ । ଫଳରେ ସମାନ ପ୍ରସଙ୍ଗରେ ଦୁଇ ଛାମୁଆ ସଂଗଠନ ଭିନ୍ନ ଭିନ୍ନ ତରିକାରେ ଆନ୍ଦୋଳନ କରୁଥିବା ଦେଖିବାକୁ ମିଳୁଛି । ସେହିପରି ମହିଳା ଭୋଟ ବ୍ୟାଙ୍କକୁ ଆକର୍ଷିତ କରିବାପାଇଁ ବିଜେଡ଼ି ତାଗଡ଼ା ରଣନୀତି କରୁଥିବାବେଳେ ବିଜେପି ବି ପଛରେ ପଡ଼ିନାହିଁ । ହେଲେ ଏକ୍ଷେତ୍ରରେ କଂଗ୍ରେସର ମହିଳା ସଂଗଠନ ସମ୍ପୂର୍ଣ୍ଣ ନିଷ୍କ୍ରିୟ କହିଲେ ଭୁଲ ହେବନାହିଁ । ତେଣୁ ଛାମୁଆ ନେତାମାନଙ୍କୁ ସାଙ୍ଗରେ ଧରି ଦଳକୁ ମଜବୁତ କରିବା ଏବେ ଶରତଙ୍କ ପାଇଁ ଆହ୍ୱାନ ସୃଷ୍ଟିକରିଛି ।
Comments ସମସ୍ତ ମତାମତ