Tags : saina

 ମୁମ୍ଵାଇ: ଭାରତୀୟ ବ୍ୟାଡମିଣ୍ଟନ ତାରକା ଏବଂ ଅଲିମ୍ପିକ୍ ପଦକ ବିଜେତା ସାଇନା ନେହୱାଲ। ଏବେ ସେ ଯେଉଁ ନିଷ୍ପତ୍ତି ନେଇଛନ୍ତି ତାହା ସମସ୍ତଙ୍କୁ ଆଶ୍ଚର୍ୟ୍ୟ କରିଛି। ବ୍ୟାଡମିଣ୍ଟନ ତାରକା ସାଇନା ଏବଂ ତାଙ୍କ ସ୍ୱାମୀ ପାରୁପାଲି କଶ୍ୟପ ପରସ୍ପରଠାରୁ ଅଲଗା ହୋଇଯାଇଛନ୍ତି। ସାଇନା ଏକ ସୋସିଆଲ ମିଡିଆ ପୋଷ୍ଟ ମାଧ୍ୟମରେ ପୋଷ୍ଟ ସେୟାର କରି ସୂଚନା ଦେଇଛନ୍ତି। ସାଇନା ଏବଂ ଭାରତର ପୂର୍ବତନ ପୁରୁଷ ବ୍ୟାଡମିଣ୍ଟନ ତାରକା ପାରୁପାଲି କଶ୍ୟପ ଦୀର୍ଘ ଦିନର ସମ୍ପର୍କ ପରେ ୨୦୧୮ରେ ବିବାହ କରିଥିଲେ। ଏବେ ବିବାହର ୭ ବର୍ଷ ପରେ, ଉଭୟ ଅଲଗା ହୋଇଛନ୍ତି।

୩୫ ବର୍ଷୀୟ ପ୍ରବୀଣ ଭାରତୀୟ ତାରକା ସାଇନା ୧୩ ଜୁଲାଇ ରବିବାର ଇନଷ୍ଟାଗ୍ରାମରେ ପୋଷ୍ଟ କରି ଏହି ଘୋଷଣା କରିଥିଲେ। ଯାହା ଲକ୍ଷ ଲକ୍ଷ ପ୍ରଶଂସକଙ୍କ ହୃଦୟକୁ ଭାଙ୍ଗି ଦେଇଥିଲା। ସାଇନା ତାଙ୍କ ବିବୃତ୍ତିରେ କହିଛନ୍ତି, "ଜୀବନ କେତେବେଳେ ଆମକୁ ଭିନ୍ନ ଦିଗରେ ନେଇଯାଏ। ବହୁତ ଚିନ୍ତା କରିବା ପରେ, ପାରୁପାଲି କଶ୍ୟପ ଏବଂ ମୁଁ ଅଲଗା ହେବାକୁ ନିଷ୍ପତ୍ତି ନେଇଛୁ। ଆମେ ଉଭୟ ନିଜ ପାଇଁ ଏବଂ ପରସ୍ପର ପାଇଁ ଶାନ୍ତି, ପ୍ରଗତି ଏବଂ ଆଶ୍ୱସ୍ତି ବାଛୁ।" ହେଲେ ସେମାନଙ୍କ ଅଲଗା ହେବାର ପ୍ରକୃତ କାରଣ ଏପର୍ୟ୍ୟନ୍ତ ଜଣା ପଡ଼ିନାହିଁ। ସାଇନା କଶ୍ୟପଙ୍କ ସହିତ ବିତାଇଥିବା ମୁହୂର୍ତ୍ତଗୁଡ଼ିକ ପାଇଁ ଖୁସି ପ୍ରକାଶ କରିଛନ୍ତି। ସାଇନା ଲେଖିଛନ୍ତି, "ମୁଁ ଏହି ସ୍ମୃତି ପାଇଁ ସର୍ବଦା କୃତଜ୍ଞ ଏବଂ ଆଗକୁ ବଢ଼ିବା ପାଇଁ କେବଳ ଶୁଭକାମନା କରୁଛି। ଏପରି ସମୟରେ ଆମର ଗୋପନୀୟତାକୁ ବୁଝିବେ ଏବଂ ସମ୍ମାନ ଦେବା ପାଇଁ ଧନ୍ୟବାଦ।
ସାଇନା ଏବଂ ୩୮ ବର୍ଷୀୟ କଶ୍ୟପ ବିବାହକୁ ୭ ବର୍ଷ ବିତିଯାଇଥିଲା । ଉଭୟ ୨୦୧୮ରେ ସେମାନେ ବିବାହ କରିଥିଲେ। ଦୀର୍ଘ ସମୟ ଧରି ଏହି ଉଭୟ ତାରକା ଗଣମାଧ୍ୟମ ଏବଂ ପ୍ରଶଂସକଙ୍କ ଦୃଷ୍ଟିରୁ ସେମାନଙ୍କ ସମ୍ପର୍କକୁ ଦୂରରେ ରଖିଥିଲେ। କୁହାଯାଏ ଯେ ଉଭୟଙ୍କ ଏହି ସମ୍ପର୍କ ସେମାନଙ୍କ କ୍ୟାରିୟରର ପ୍ରାରମ୍ଭିକ ଦିନଗୁଡ଼ିକରେ ଆରମ୍ଭ ହୋଇଥିଲା। ଉଭୟ ହାଇଦ୍ରାବାଦର କିମ୍ବଦନ୍ତୀ ଭାରତୀୟ ବ୍ୟାଡମିଣ୍ଟନ ଖେଳାଳି ପୁଲେଲା ଗୋପୀଚାନ୍ଦଙ୍କ ଏକାଡେମୀରେ ସାକ୍ଷାତ କରିଥିଲେ। ଯେଉଁଠାରେ ସେମାନେ ଦୁହେଁ କିମ୍ବଦନ୍ତୀ ପ୍ରଶିକ୍ଷକଙ୍କ ତତ୍ତ୍ୱାବଧାନରେ ତାଲିମ ନେଉଥିଲେ। ଏହିଠାରୁ ଉଭୟଙ୍କ ପ୍ରେମ କାହାଣୀ ଆରମ୍ଭ ହୋଇଥିଲା।