Jun 17, 2026
ମୁଖ୍ୟ ଖବର
ଭୁବନେଶ୍ୱର: ରଜ ବଜାରରେ ଡିମାଣ୍ଡରେ ରହିଲା ଖାସି । ଯେଉଁଠି ମାଛ, ଚିକେନରେ କୋଟିଏ ଲେଖାଏଁର ବେପାର ହୋଇଥିଲା, ସେଠି ଏକୁଟିଆ ଖାସିରେ ଆସିଲା ଦୁଇ କୋଟି । ପଶ୍ଚିମବଙ୍ଗରୁ ଯଥେଷ୍ଟ ଖାସି ଆସୁନଥିବା ସତ୍ତେ୍ୱ ରାଜଧାନୀବାସୀଙ୍କ ଚାହିଦା ମେଣ୍ଟାଇବାରେ ସଫଳ ହୋଇଛନ୍ତି ବେପାରୀ । ରବିବାର ପହିଲି ରଜରେ ମୋଟ ୪ କୋଟି ୯୬ଲକ୍ଷ ୪୦ହଜାର ଟଙ୍କାର ଆମିଷ ବେପାର ହୋଇଛି । ଯଦିଓ ଏଥର ଟାର୍ଗେଟ ଥିଲା ସାତ କୋଟି । ମାତ୍ର ସେଭଳି ବେପାର ହୋଇନି ।
ନିଖିଳ ଓଡ଼ିଶା ଆମିଷ ବ୍ୟବସାୟୀ ମହାସଂଘ ସୂଚନା ଅନୁସାରେ, ରବିବାର ମୋଟ ୩୪ଟି ଖାସି ଗାଡ଼ି ଆସିଥିଲା । ମୋଟ ୫୧୦ କୁଇଣ୍ଟାଲ (୫୧ଟନ୍) ର ଖାସି ବେପାର ହୋଇଥିବା ବେଳେ ତାର ଦାମ୍ ଥିଲା ୨କୋଟି ୪୬ଲକ୍ଷ ୫୦ହଜାର । ଖାସି କିଲୋ ପିଛା ୮୫୦ ଓ ମଟନ୍ କିଲୋ ପିଛା ୭୦୦ଟଙ୍କାରେ ବିକ୍ରି ହୋଇଥିଲା । ସେହିପରି ୮୬୨.୫ କୁଇଣ୍ଟାଲ(୮୬.୨୫ଟନ୍)ର ଚିକେନ୍ ବିକ୍ରି ହୋଇଥିବା ବେଳେ ଏଥିରୁ ୧କୋଟି ୧୭ଲକ୍ଷ ୩୦ହଜାର ଟଙ୍କା ରୋଜଗାର ହୋଇପାରିଛି । ଆଜି ବ୍ରଏଲର କିଲୋ ପ୍ରତି ୨୪୦, ଦେଶୀ ୬୦୦ ଓ କଲର ବାର୍ଡ ୩୫୦ଟଙ୍କା ଥିଲା ।
ମାଛ କଥା କହିଲେ, ମୋଟ ୮୮୨ କୁଇଣ୍ଟାଲ(୮୮.୨ ଟନ୍)ର ମାଛ ବେପାର ହୋଇଥିଲା । ଯାହାର ଦାମ୍ ଥିଲା ୧କୋଟି ୧ଲକ୍ଷ ୫୨ ହଜାର । ତେବେ ମାଛ ଶସ୍ତା ଥିଲା । ରୋହି କିଲୋ ପ୍ରତି ୧୮୦ରୁ ୨୦୦, ଭାକୁର ୨୪୦, ଜଳଙ୍ଗ ୨୦୦, ମିରକାଳି ୨୦୦, ଖଇଙ୍ଗା ୪୦୦, ଇଲିସି ୧୦୦୦ରୁ ୧୨୦୦, ଚିଙ୍ଗୁଡ଼ି ୧୫୦ରୁ ୧୦୦୦, କଙ୍କଡ଼ା ୩୦୦ରୁ ୧୦୦୦ ଟଙ୍କା ରହିଥିଲା । ଅଣ୍ଡା ବେପାର ବି ଠିକ୍ଠାକ ଥିଲା । ୨୨୨୦ କାର୍ଟୁନ ଅଣ୍ଡା ବିକ୍ରି ହୋଇଥିବା ବେଳେ ୩୧ଲକ୍ଷ ୮ହଜାର ଟଙ୍କାର ଆୟ ହୋଇଥିଲା ।
Comments ସମସ୍ତ ମତାମତ