ମୁଖ୍ୟ ଖବର
ପୁରୀ: ଆଜି ଶ୍ରୀମନ୍ଦିରରେ ହରିଉତ୍ଥାପନ ଏକାଦଶୀ । ଶ୍ରୀକ୍ଷେତ୍ରରେ ଆରମ୍ଭ ପବିତ୍ର ପଞ୍ଚୁକ ବ୍ରତ । ପ୍ରଥମ ଦିବସରେ ନିଦ୍ରାରୁ ଉଠିବେ ଶ୍ରୀହରି । ଏହି ଅବସରରେ ଶ୍ରୀବିଗ୍ରହଙ୍କ ଲକ୍ଷ୍ମୀନାରାୟଣ ବେଶ ଅନୁଷ୍ଠିତ ହେବ । ପଞ୍ଚୁକ ବ୍ରତ ପାଳନ ପାଇଁ ଶ୍ରୀକ୍ଷେତ୍ରରେ ଭିଡ଼ ଲାଗିଛି । ବ୍ରତ ପାଳନ ସହ ଠାକୁରଙ୍କ ଦୁର୍ଲଭ ବେଶ ଦର୍ଶନ କରିବାର ସୌଭାଗ୍ୟ ଲଭିବେ ଶ୍ରଦ୍ଧାଳୁ । ଚଳିତ ବର୍ଷ ପଞ୍ଚୁକ ୪ ଦିନ । ଏଥର ଦ୍ୱାଦଶୀ କ୍ଷୟ ପଡ଼ୁଥିବାରୁ ଠାକୁରଙ୍କ ବାଙ୍କଚୂଡ଼ ତଥା ବାବନ ବେଶ ହେବ ନାହିଁ ବୋଲି ଶ୍ରୀମନ୍ଦିର ପ୍ରଶାସନର ପୂର୍ବ ସୂଚନା ରହିଛି ।
ଆଷାଢ଼ ଶୁକ୍ଳ ଏକାଦଶୀରେ ନିଦ୍ରା ଯାଇଥିଲେ ଶ୍ରୀହରି । ୪ ମାସ ପରେ ହରିଉତ୍ଥାପନ ଏକାଦଶୀ ଅବସରରେ ଠାକୁରେ ନିଦ୍ରାରୁ ଉଠିବେ । ବଡ଼ସିଂହାର ବେଶ ଓ ବଡ଼ସିଂହାର ଭୋଗ ପରେ ମହାପ୍ରଭୁଙ୍କର ଏହି ନୀତି ହେବ । ପଞ୍ଚୁକ ୫ଦିନରେ ଦାରୁଦେବତାଙ୍କର ଭିନ୍ନ ଭିନ୍ନ ବେଶ ହୋଇଥାଏ । ପ୍ରଥମ ଦିନ ଠାକୁରଙ୍କ ଲକ୍ଷ୍ମୀନାରାୟଣ ବେଶ ହେବ । ଅବକାଶ ନୀତି ପରେ ଠାକୁରଙ୍କ ବେଶ ଆରମ୍ଭ ହେବ । ମୂଲ୍ୟବାନ ସ୍ୱର୍ଣ୍ଣ ଅଳଙ୍କାର, ପାଟବସ୍ତ୍ର ଓ ପୁଷ୍ପମାଲ୍ୟ ପରିଧାନ କରିବେ ଠାକୁରେ । ପୁଷ୍ପାଳକ ସେବକମାନେ ତିନି ଠାକୁରଙ୍କୁ ଲକ୍ଷ୍ମୀ ନାରାୟଣ ବେଶରେ ବିଭୂଷିତ କରିବେ । ଏହି ବେଶରେ ଶ୍ରୀବିଗ୍ରହ ଶ୍ରୀଭୁଜ ଓ ଶଙ୍ଖ, ଚକ୍ର, ହଳ ମୂଷଳ ଆଦି ଅଳଙ୍କାର ଧାରଣ କରିବେ । ଶ୍ରୀମସ୍ତକରେ ସ୍ୱର୍ଣ୍ଣ କିରୀଟ ଶୋଭା ପାଇବ । ବ୍ରତଧାରୀଙ୍କ ସମେତ ଶ୍ରଦ୍ଧାଳୁମାନେ ଏହି ବେଶରେ ଠାକୁରଙ୍କୁ ଦର୍ଶନ କରି କୁତାର୍ଥ ହେବେ ।
କାର୍ତ୍ତିକ ମାସର ଧାର୍ଯ୍ୟ ନୀତି ନୀର୍ଘଣ୍ଟ ଅନୁସାରେ ଶ୍ରୀମନ୍ଦିର ଦ୍ୱାର ଫିଟା ପ୍ରାତଃ ୪ଟାରେ ହୋଇ ଠାକୁରଙ୍କ ନୀତି ଆଗେଇବ । ୨୨ ତାରିଖ ରବିବାର ତ୍ରୟୋଦଶୀରେ ମହାପ୍ରଭୁଙ୍କ ଡାଳିକିଆ ତଥା ତ୍ରିବିକ୍ରମ ବେଶ ହେବ । ସେଦିନ ଗରୁଡ଼ ଉତ୍ଥାପନ ନୀତି ହେବ । ୨୩ ତାରିଖ ସୋମବାର ଚର୍ତୁଦ୍ଦଶୀରେ ଠାକୁରଙ୍କ ଲକ୍ଷ୍ମୀନୃସିଂହ ବେଶ ହେବ । ୨୪ ତାରିଖ ମଙ୍ଗଳବାର କାର୍ତ୍ତିକ ପୂର୍ଣ୍ଣିମା ଅବସରରେ ମହାପ୍ରଭୁ ରାଜାଧିରାଜ ବା ସୁନାବେଶରେ ବିଭୂଷିତ ହେବେ ।
Comments ସମସ୍ତ ମତାମତ