Tags : pollution

ନୂଆଦିଲ୍ଲୀ: ଜାତୀୟ ରାଜଧାନୀ ଦିଲ୍ଲୀର ବିଗିଡ଼ି ଯାଉଥିବା ବାୟୁ ଗୁଣବତ୍ତାକୁ ନେଇ ପରିବେଶ ମନ୍ତ୍ରୀ ମଞ୍ଜିନ୍ଦର ସିଂ ସିରସା ମଙ୍ଗଳବାର ଏକ ଖବରଦାତା ସମ୍ମିଳନୀରେ କ୍ଷମା ମାଗିଛନ୍ତି। ସେ କହିଛନ୍ତି ଯେ ୯-୧୦ ମାସ ମଧ୍ୟରେ କୌଣସି ନିର୍ବାଚିତ ସରକାର ପାଇଁ ପ୍ରଦୂଷଣକୁ ସମ୍ପୂର୍ଣ୍ଣ ରୂପେ ହ୍ରାସ କରିବା ସମ୍ଭବ ନୁହେଁ।

ମନ୍ତ୍ରୀ ଏହି ସଙ୍କଟକୁ ତାଙ୍କ ପ୍ରଶାସନର ବିଫଳତା ନୁହେଁ, ବରଂ ପୂର୍ବ ସରକାରଙ୍କ ଦ୍ୱାରା ଦିଆଯାଇଥିବା ସମସ୍ୟା ଭାବରେ ଉପସ୍ଥାପନ କରିଛନ୍ତି। ସେ ପୂର୍ବର ଆମ୍ ଆଦମୀ ପାର୍ଟି (AAP) ସରକାରଙ୍କୁ ସମାଲୋଚନା କରି କହିଛନ୍ତି, “ଆମେ ଅସାଧୁ AAP ସରକାରଙ୍କ ଠାରୁ ଭଲ କାମ କରୁଛୁ ଏବଂ ଆମେ ପ୍ରତିଦିନ AQI ହ୍ରାସ କରୁଛୁ। ଏହି ପ୍ରଦୂଷଣ ରୋଗ ଆମକୁ AAP ଦ୍ୱାରା ଦିଆଯାଇଛି ଏବଂ ଆମେ ଏହାକୁ ଠିକ୍ କରିବାକୁ ଚେଷ୍ଟା କରୁଛୁ।”

ଦିଲ୍ଲୀରେ ବାୟୁ ଗୁଣବତ୍ତା ବିପଦପୂର୍ଣ୍ଣ ସ୍ତରରେ ଥିବାବେଳେ ସୋମବାର ଅରୁଣ ଜେଟଲୀ ଷ୍ଟାଡିୟମରେ ଆର୍ଜେଣ୍ଟିନାର ଫୁଟବଲ ତାରକା ଲିଓନେଲ୍ ମେସିଙ୍କୁ ସ୍ୱାଗତ କରିବା ସମୟରେ ମୁଖ୍ୟମନ୍ତ୍ରୀ ରେଖା ଗୁପ୍ତାଙ୍କୁ କ୍ରୋଧିତ ଦର୍ଶକମାନେ “AQI, AQI” ନାରା ଦେଇ ଛିଗୁଲେଇ ଥିଲେ। ଏପରିକି ମୁଖ୍ୟମନ୍ତ୍ରୀ ଷ୍ଟାଡିୟମ୍ ଛାଡ଼ିବା ପର୍ଯ୍ୟନ୍ତ ନାରାବାଜି ଲାଗି ରହିଥିଲା।

କୁହୁଡ଼ି ଯୋଗୁଁ ମେସିଙ୍କ ଚାର୍ଟରଡ୍ ବିମାନ ଆସିବାରେ ବିଳମ୍ବ ହୋଇଥିଲା, ଯାହା ୧୦.୪୫ AM ପରିବର୍ତ୍ତେ ୨.୩୦ PM ରେ ପହଞ୍ଚିଥିଲା ଏବଂ ସେ ୪.୩୦ PM ରେ ଷ୍ଟାଡିୟମରେ ପହଞ୍ଚିଥିଲେ।

ଦିଲ୍ଲୀର ବାୟୁ ଗୁଣବତ୍ତା କ୍ରମାଗତ ତିନି ଦିନ ଧରି ‘ଗମ୍ଭୀର’ ଶ୍ରେଣୀରେ ରହିବା ପରେ ମଙ୍ଗଳବାର ସାମାନ୍ୟ ଉନ୍ନତି ହୋଇ ‘ଅତ୍ୟନ୍ତ ଖରାପ’ ଶ୍ରେଣୀକୁ ଆସିଛି। କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡ (CPCB) ଅନୁଯାୟୀ, ସକାଳ ୯ ଟାରେ AQI ୩୭୮ ରେ ରେକର୍ଡ କରାଯାଇଛି, ଯାହା ସୋମବାର ସନ୍ଧ୍ୟାର ୪୨୭ ଠାରୁ ସାମାନ୍ୟ ଭଲ ରହିଛି।