Apr 6, 2026
ମୁଖ୍ୟ ଖବର
ନୂଆଦିଲ୍ଲୀ : ଆଉ ପେଟ୍ରୋଲ-ଡିଜେଲ୍ ମିଳିବନି । ଗ୍ୟାସ୍ ଆସୁନି, କେମିତି ରୋଷେଇ କରିବା । ଏମିତି ଚର୍ଚ୍ଚା ଏବେ ସବୁଠି ଚାଲିଛି । ଲୋକେ ଭବିଷ୍ୟତ କଥା ଭାବି ଭୟଭୀତ ହେଉଥିବାବେଳେ ପୁଣିଥରେ ଆଶ୍ବାସନା ଦେଇଛନ୍ତି ସରକାର । ଭୟଭୀତ ନହେବାକୁ ଅପିଲ୍ କରାଯାଇଛି । ଆମେରିକା-ଇରାନ ଯୁଦ୍ଧ ଭିତରେ ହର୍ମୁଜ୍ ପ୍ରଣାଳୀ ବନ୍ଦ ହେବାସହ ଜଡିତ ବାଧା ପରେ ମଧ୍ୟ ରନ୍ଧନ ଗ୍ୟାସ ଏବଂ ପେଟ୍ରେଲ-ଡିଜେଲ ଦେଶରେ ଉପଲବ୍ଧ ରହିଛି । ଏଥିପାଇଁ କୌଣସି ଭୟଭୀତ ହେବାର ଆବଶ୍ୟକ ନାହିଁ ଭରସା ରଖନ୍ତୁ ବୋଲି କୁଯାଯାଇଛି ।
ପିଟିଆଇର ରିପୋର୍ଟ ଅନୁଯାୟୀ, ଶନିବାର ସରକାର ନାଗରିକଙ୍କୁ ଭୟଭୀତ ହୋଇ ପେଟ୍ରୋଲ-ଡିଜେଲ ଏବଂ ଗ୍ୟାସ କିଣନ୍ତୁ ନାହିଁ ବୋଲି କହିଛନ୍ତି । ଏବେ ଦେଶରେ ଏ ସବୁ ମହଜୁଦ ରହିଛି । ଏହାସହ କଳାବଜାରୀ କରୁଥିବା ଲୋକଙ୍କ ଉପରେ ଚଢ଼ାଉ କରାଯାଉଛି । ୩୭୦୦ରୁ ଅଧିକ ଚଢ଼ାଉ କରାଯାଇଥିବାବେଳେ ୧୦୦୦ ଜଣଙ୍କୁ କାରଣ ଦର୍ଶାଅ ନୋଟିସ୍ ମଧ୍ୟ ଜାରି କରାଯାଇଛି । ଏହାସହ ୨୭ ଜଣ ଡିଲରଙ୍କୁ ମଧ୍ୟ ନିଲମ୍ବିତ କରାଯାଇଥିବା କେନ୍ଦ୍ର ସରକାରଙ୍କ ପକ୍ଷରୁ ସୂଚନା ମିଳିଛି ।
ସେପଟେ ମନ୍ତ୍ରାଳୟ ପକ୍ଷରୁ କୁହାଯାଇଛି କି, ଏଲପିଜି ଅଭାବର କୌଣସି ରିପୋର୍ଟ ନାହିଁ । ଗତ ଶୁକ୍ରବାର ୫୧ ଲକ୍ଷ ସିଲିଣ୍ଡ ବଣ୍ଟାଯାଇଛି । ଯେଉଁଥିରେ କେବଳ ଅନଲାଇନ୍ ବୁକିଂ କରିଥିବା ୯୫ ପ୍ରତିଶତ ଉପଭୋକ୍ତା ପାଇଛନ୍ତି । ଏହାସହ ପେଟ୍ରୋଲ ପମ୍ପରେ ପ୍ରଚୁର ପରିମାଣର ପେଟ୍ରୋଲ-ଡିଜେଲ ମହଜୁଦ ରହିଛି । ରନ୍ଧନ ଗ୍ୟାସ ସହଜରେ ଉପଲବ୍ଧ ପାଇଁ ପିଏଜି ସଂଯୋଗ ଜୋରଦାର କାମ ଚାଲିଥିବା କୁହାଯାଇଛି । ମାତ୍ର ଏବେ ସବୁ ମହଜୁଦ ରହିଥିବାବେଳେ ଭୟ କରିବାର କୌଣସି କାରଣ ନାହିଁ ବୋଲି ଭରସା ଦିଆଯାଇଛି ।
Comments ସମସ୍ତ ମତାମତ