Tags : neet

ନୂଆଦିଲ୍ଲୀ : ନିଟ୍- ୟୁଜି ପରୀକ୍ଷାରେ ପ୍ରଶ୍ନପତ୍ର ଲିକ୍‌ ଓ ପରୀକ୍ଷା ବାତିଲ କରାଯିବା ପରେ ଆସନ୍ତା ଜୁନ୍‌ ୨୧ ତାରିଖରେ ପୁନଃ ପରୀକ୍ଷା କରାଯିବ। ପୁନଃ ପରୀକ୍ଷାରେ କୌଣସି ପ୍ରକାର ତ୍ରୁଟି ନ ରହିବାକୁ କଡ଼ାସୁରକ୍ଷା ବ୍ୟବସ୍ଥା ଗ୍ରହଣ କରାଯାଉଛି। ସରକାରୀ ସୂତ୍ର ଅନୁଯାୟୀ, ପରୀକ୍ଷା କେନ୍ଦ୍ରଗୁଡ଼ିକୁ ସୁରକ୍ଷିତ ଓ କୌଣସି ବିଶୃଙ୍ଖଳା ବିନା ପ୍ରଶ୍ନପତ୍ର ପରିବହନ ପାଇଁ ଭାରତୀୟ ବାୟୁସେନା ବିମାନ ବ୍ୟବହାର କରିବାର ବିକଳ୍ପ ଉପରେ ସରକାର ଗମ୍ଭୀରତାର ସହ ବିଚାର କରୁଛନ୍ତି।

 ନିଟ୍‌ ପ୍ରଶ୍ନପତ୍ର ଲିକ୍‌କୁ ନେଇ ସରକାରଙ୍କୁ ବିଭିନ୍ନ ଦିଗରୁ ସମାଲୋଚନାର ଶିକାର ହେବା ପରେ ଗୁରୁତ୍ବପୂର୍ଣ୍ଣ ଆଲୋଚନା କରିବା ପାଇଁ ଦିଲ୍ଲୀରେ ଏକ ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହୋଇଥିଲା। ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଏହି ବୈଠକରେ ଅଧ୍ୟକ୍ଷତା କରିଥିଲେ ଓ ଏଥିରେ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ କେନ୍ଦ୍ର ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ ମଧ୍ୟ ଯୋଗ ଦେଇଥିଲେ। ସୂତ୍ର ଅନୁଯାୟୀ, ବୈଠକରେ ମନ୍ତ୍ରୀ ଓ ବରିଷ୍ଠ ଅଧିକାରୀମାନେ ଜୁନ୍ ୨୧ ପରୀକ୍ଷା ପାଇଁ ପ୍ରଶ୍ନପତ୍ର ପରିବହନ ପାଇଁ ବାୟୁସେନା ବିମାନର ସାହାଯ୍ୟ ନିଆଯାଇପାରିବ କି ନାହିଁ ସେ ବିଷୟରେ ଆଲୋଚନା କରିଥିଲେ। ତଥାପି ଏହି ବିକଳ୍ପ ଉପରେ ଏପର୍ୟ୍ୟନ୍ତ କୌଣସି ଚୂଡ଼ାନ୍ତ ନିଷ୍ପତ୍ତି ନିଆଯାଇନାହିଁ।

ସମ୍ପୂର୍ଣ୍ଣ ପ୍ରସ୍ତାବକୁ ଚୂଡ଼ାନ୍ତ ଅନୁମୋଦନ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନିକଟରେ ଉପସ୍ଥାପିତ କରାଯିବ। ସୂତ୍ର ଅନୁସାରେ ପ୍ରଧାନମନ୍ତ୍ରୀ ନିଜେ ଜୁନ୍ ୨୧ ତାରିଖରେ ହେବାକୁ ଥିବା ପୁନଃପରୀକ୍ଷାର ପ୍ରସ୍ତୁତି ଉପରେ ନଜର ରଖିଛନ୍ତି ଓ ପରୀକ୍ଷା ପ୍ରକ୍ରିୟାର ପ୍ରତ୍ୟେକ ଛୋଟ ବଡ଼ ଅପଡେଟ୍ ଉପରେ ନଜର ରଖିଛନ୍ତି। ଗୁରୁବାରର ଉଚ୍ଚସ୍ତରୀୟ ବୈଠକରେ କେବଳ ପରିବହନ ନୁହେଁ ବରଂ ସମଗ୍ର ପରୀକ୍ଷା ବ୍ୟବସ୍ଥାକୁ କଡ଼ାକଡ଼ି କରିବା ଉପରେ ଗୁରୁତ୍ୱାରୋପ କରାଯାଇଥିଲା । ଜାତୀୟ ପରୀକ୍ଷା ଏଜେନ୍ସି (ଏନ୍‌ଟିଏ)ର ମହାନିର୍ଦ୍ଦେଶକ ଅଭିଷେକ ସିଂହ ଓ ଶିକ୍ଷା ମନ୍ତ୍ରଣାଳୟର ଅନେକ ଉଚ୍ଚ ଅଧିକାରୀ ବୈଠକରେ ଉପସ୍ଥିତ ଥିଲେ। ବୈଠକରେ ଶିକ୍ଷକମାନଙ୍କ ଦ୍ୱାରା ପ୍ରଶ୍ନପତ୍ର ସେଟିଂ, ପ୍ରଶ୍ନପତ୍ରର ସୁରକ୍ଷିତ ମୁଦ୍ରଣ, ହେପାଜତ କେନ୍ଦ୍ରଗୁଡ଼ିକୁ ପ୍ରଶ୍ନପତ୍ର ପରିବହନ ଓ ଅନ୍ତିମ ସୁରକ୍ଷା ବ୍ୟବସ୍ଥା ଉପରେ ଗୁରୁତ୍ୱାରୋପ କରାଯାଇଥିଲା।