Sep 19, 2026
ମୁଖ୍ୟ ଖବର
ରାଉରକେଲା: ସୁନ୍ଦରଗଡ଼ ଜିଲା ଲାଠିକଟା ଅଞ୍ଚଳରେ ଜଣେ ଯୁବକଙ୍କୁ ତାଙ୍କ ନିଜ ବନ୍ଧୁ ନିର୍ମାଣାଧୀନ ପାଣିଟାଙ୍କି ଉପରୁ ଠେଲି ହତ୍ୟା କରିଥିବା ଭଳି ଏକ ସାଂଘାତିକ ଅଭିଯୋଗ ସାମ୍ନାକୁ ଆସିଛି। ଜଣେ ଯୁବତୀଙ୍କୁ ନେଇ ସୃଷ୍ଟି ହୋଇଥିବା ଏକତରଫା ଈର୍ଷାରୁ ଏହି ନୃଶଂସ କାଣ୍ଡ ଘଟିଥିବା ପୋଲିସର ପ୍ରାଥମିକ ତଦନ୍ତରୁ ସ୍ପଷ୍ଟ ହୋଇଛି। ମୃତ ଯୁବକଜଣକ ଲାଠିକଟାର ଅଭିଷେକ ମଲ୍ଲିକ ହୋଇଥିବା ବେଳେ ଅଭିଯୁକ୍ତ ବନ୍ଧୁ ହେଉଛନ୍ତି ୨୫ ବର୍ଷିୟ କୁନା ଦାସ।
ସୂଚନାଯୋଗ୍ୟ ଯେ, ଅଭିଷେକ ଓ କୁନା ଉଭୟ ଜଣେ ଯୁବତୀଙ୍କୁ ଭଲ ପାଉଥିଲେ। ତେବେ ଯୁବତୀଜଣକ ଅଭିଷେକଙ୍କ ପ୍ରତି ଅଧିକ ଆକୃଷ୍ଟ ଥିବାରୁ କୁନା ତାଙ୍କୁ ସହ୍ୟ କରିପାରି ନ ଥିଲେ ଏବଂ ମନରେ ପ୍ରତିଶୋଧ ଓ ଈର୍ଷାଭାବ ରଖିଥିଲେ। ନୂଆଖାଇ ଦିନ ଲାଠିକଟା ବ୍ଲକ ଛକ ନିକଟ ତ୍ରିନାଥ କଲୋନୀରେ ଥିବା ଏକ ନିର୍ମାଣାଧୀନ ପାଣିଟାଙ୍କି ଉପରକୁ ଉଭୟ ବନ୍ଧୁ ଯାଇ ମଦ୍ୟପାନ କରିଥିଲେ। ସେଠାରେ ସମ୍ପୃକ୍ତ ଯୁବତୀଙ୍କୁ ନେଇ ଦୁହିଁଙ୍କ ମଧ୍ୟରେ ତୀବ୍ର ଯୁକ୍ତିତର୍କ ହୋଇଥିଲା।
ଏହି ବାକ୍ଯୁଦ୍ଧ ସମୟରେ ଉତ୍ତ୍ୟକ୍ତ ହୋଇ କୁନା, ଅଭିଷେକଙ୍କୁ ପ୍ରାୟ ୪୦ ଫୁଟ ଉଚ୍ଚ ପାଣିଟାଙ୍କି ଉପରୁ ତଳକୁ ଠେଲି ଦେଇ ଘଟଣାସ୍ଥଳରୁ ଫେରାର ହୋଇଯାଇଥିଲେ। ତଳେ ପଡ଼ିଯିବା ଫଳରେ ଅଭିଷେକଙ୍କର ମୃତ୍ୟୁ ଘଟିଥିଲା। ବୁଧବାର ପୁଲିସ ଅଭିଷେକଙ୍କ ମୃତଦେହ ଉଦ୍ଧାର କରି ସନ୍ଦେହ ଆଧାରରେ କୁନାଙ୍କୁ ଅଟକ ରଖି ପଚରାଉଚରା କରିଥିଲା। ପୋଲିସର ଜେରା ଆଗରେ କୁନା ତାଙ୍କ ଅପରାଧ ସ୍ୱୀକାର କରିବା ପରେ ଗୁରୁବାର ପୋଲିସ ତାଙ୍କୁ ଗିରଫ କରି କୋର୍ଟଚାଲାଣ କରିଛି। ଘଟଣାର ଅଧିକ ତଦନ୍ତ ଜାରି ରହିଛି।
Comments ସମସ୍ତ ମତାମତ