Jul 18, 2026
ମୁଖ୍ୟ ଖବର
ଇସ୍ଲାମାବାଦ୍ : ବଲୁଚିସ୍ତାନକୁ ନେଇ ଚିନ୍ତାରେ ପଡ଼ିଛି ପାକିସ୍ତାନ ସରକାର। ବଲୁଚିସ୍ତାନରେ ବାରମ୍ବାର ପାକିସ୍ତାନ ସେନା ଉପରେ ଆକ୍ରମଣ ହେଉଛି। ବଲୁଚିସ୍ତାନ ଲେବରେସନ୍ ଆର୍ମି (ବିଏଲ୍ଏ) ତରଫରୁ ବାରମ୍ବାର ଆକ୍ରମଣରେ ବହୁସଂଖ୍ୟକ ପାକିସ୍ତାନ ସୈନିକ ପ୍ରାଣ ହରାଉଛନ୍ତି।
ଏହି କ୍ରମରେ ଗୁରୁବାର ପାକିସ୍ତାନର ୪୫ଜଣ ସୈନିକଙ୍କୁ ହତ୍ୟା କରିଥିବା ଦାବି କରିଛି ବିଏଲ୍ଏ। ବଲୁଚିସ୍ତାନର ମାସ୍ତୁଙ୍ଗ ଅଞ୍ଚଳରେ ଏହି ଆକ୍ରମଣ ହୋଇଥିବା ବିଏଲ୍ଏ ତରଫରୁ ସୂଚନା ପ୍ରଦାନ କରାଯାଇଛି। ଗତ ଦୁଇ ସପ୍ତାହ ମଧ୍ୟରେ ପାକିସ୍ତାନ ସେନା ଉପରେ ତୃତୀୟ ବଡ଼ ଆକ୍ରମଣ ବୋଲି ଜଣାପଡ଼ିଛି। ବିଏଲ୍ଏର ସୂଚନାନୁଯାୟୀ ମସ୍ତୁଙ୍ଗ ଜିଲାର ଖଡକୋଚା ଅଞ୍ଚଳରେ ପାକ୍ ଯବାନଙ୍କୁ ନେଇ ଯାଉଥିବା ଗାଡ଼ି ଉପରେ ଏହି ଆକ୍ରମଣ ହୋଇଥିଲା। ଏଥିରେ ୪୫ ଜଣ ପାକ୍ ଯବାନ ପ୍ରାଣ ହରାଇଛନ୍ତି। ଏହାସହ ଅନେକ ଗୁରୁତର ହୋଇ ପଡ଼ିଛନ୍ତି। ବିଏଲଏର ପ୍ରବକ୍ତା କହିଛନ୍ତି ଯେ, ସଙ୍ଗଠନର ଫତେହ ସ୍କ୍ୱାଡ୍ ଏହି ଆକ୍ରମଣ କରିଥିଲା। ଯବାନଙ୍କ ବସ୍ ବ୍ୟତୀତ ସେମାନଙ୍କୁ ଏସକର୍ଟ କରି ନେଉଥିବା ଅନ୍ୟ ଏକ ଗାଡ଼ି ଉପରେ ଆକ୍ରମଣ ହୋଇଥିଲା। ଆକ୍ରମଣରେ ଅନେକ ସୈନିକ ଗୁରୁତର ଥିବାରୁ ଆଗକୁ ମୃତ୍ୟୁସଂଖ୍ୟା ବଢ଼ିପାରେ ବୋଲି ଆଶଙ୍କା କରାଯାଉଛି। ଅନ୍ୟପଟେ ପାକିସ୍ତାନ ସେନା ତରଫରୁ ହୋଇଥିବା ସ୍ବୀକାର କରାଯାଇଥିଲେ ମଧ୍ୟ କେତେଜଣ ପ୍ରାଣ ହରାଇଛନ୍ତି ସେ ସମ୍ପର୍କରେ କୌଣସି ସୂଚନା ପ୍ରଦାନ କରାଯାଇ ନାହିଁ।
Comments ସମସ୍ତ ମତାମତ