Jun 24, 2026
ମୁଖ୍ୟ ଖବର
ସମ୍ବଲପୁର: ମହାନଦୀ ଜଳ ବିବାଦ ଟ୍ରାଇବୁନାଲ୍ ଗତ ଫେବୃଆରୀ ୨୬ରୁ ମାର୍ଚ୍ଚ ୨ ତାରିଖ ମଧ୍ୟରେ ଓଡ଼ିଶା ଗସ୍ତରେ ଆସିଥିଲେ। ତେବେ ଏହି ଗସ୍ତକାଳରେ ରାଜ୍ୟ ରାଜକୋଷରୁ ପ୍ରାୟ ୨ କୋଟି ୪୧ ଲକ୍ଷ ଟଙ୍କା ଖର୍ଚ୍ଚ ହୋଇଥିବାକୁ ନେଇ ଝଡ଼ ସୃଷ୍ଟି ହୋଇଛି। ଗସ୍ତ ସମୟରେ ସରକାରୀ ଅତିଥି ଗୃହର ବ୍ୟବହାର ବଦଳରେ ଝାରସୁଗୁଡ଼ାର ଏକ ମହଙ୍ଗା ହୋଟେଲରେ ରହିଥିଲେ। ଟ୍ରାଇବୁନାଲ ସଦସ୍ୟଙ୍କ ଏଠାରେ ଦୁଇଦିନ ରହଣି ପାଇଁ ୫୪ ଲକ୍ଷ ଟଙ୍କା ଖର୍ଚ୍ଚ ହୋଇଥିଲା। ଏପରିକି ଏକ ଇଭେଣ୍ଟ ମ୍ୟାନେଜମେଣ୍ଟ ସଂଗଠନକୁ ମଧ୍ୟ ୮୫ ଲକ୍ଷ ଟଙ୍କା ଦିଆଯାଇଥିଲା। ଏଥିସହ ସ୍ଥାନୀୟ ପରିଦର୍ଶନ ପାଇଁ ଏକ ଟ୍ରାଭେଲ୍ ଏଜେନ୍ସିକୁ ମଧ୍ୟ ୫ଲକ୍ଷ ଟଙ୍କା ଦିଆଯାଇଥିବା ଅଭିଯୋଗ ହୋଇଛି। ଆରଟିଆଇ ମାଧ୍ୟମରେ ମିଳିଥିବା ସୂଚନା ଅନୁଯାୟୀ, ଓଡ଼ିଶାର ମହାନଦୀ ଉପର ମୁଣ୍ଡକୁ ଟ୍ରାଇବୁନାଲ ସଦସ୍ୟଙ୍କ ଗସ୍ତ ଲାଗି ୧.୪୫ କୋଟି ଟଙ୍କାରୁ ଅଧିକ ଖର୍ଚ୍ଚ ହୋଇଥିଲା। ସେହିପରି ପୁରୀ, ଚିଲିକା ଓ ଉପକୂଳବର୍ତ୍ତୀ ଅଞ୍ଚଳ ସମେତ ତଳ ଜଳଭଣ୍ଡାର ପରିଦର୍ଶନ ସମୟରେ ଆଉ ୯୫ ଲକ୍ଷ ୫୮ ହଜାର ଟଙ୍କା ଖର୍ଚ୍ଚ ହୋଇଥିଲା।
ମହାନଦୀ ବଞ୍ଚାଓ ଆନ୍ଦୋଳନର ଆବାହକ ସୁଦର୍ଶନ ଦାସ କହିଛନ୍ତି, ଏପରି ଖର୍ଚ୍ଚ ଜଣେ ବ୍ୟକ୍ତିଙ୍କ ବିଶ୍ୱ ଯାତ୍ରା ପାଇଁ ମଧ୍ୟ ଅଧିକ ହୋଇଥାନ୍ତା। ଏକ ସରକାରୀ ପରିଦର୍ଶନ ପାଇଁ କାହିଁକି ଏକ ଇଭେଣ୍ଟ ମ୍ୟାନେଜମେଣ୍ଟ ଫାର୍ମକୁ ନିଯୁକ୍ତି ଦିଆଯାଇଥିଲା ବୋଲି ପ୍ରଶ୍ନ କରିଛନ୍ତି। ଶ୍ରୀ ଦାସ ଅଭିଯୋଗ କରିଛନ୍ତି ଯେ, ୪ ଜଣ ଟ୍ରାଇବୁନାଲ ସଦସ୍ୟ ନିଜ ପରିବାର ସହ ଆସିଥିଲେ, ଯାହା ସରକାରୀ ଗସ୍ତକୁ ଏକ ପାରିବାରିକ ପର୍ୟ୍ୟଟନରେ ପରିଣତ କରିଥିଲା। ଶ୍ରୀ ଦାସ ଏହାକୁ ‘ସାର୍ବଜନୀନ ଟଙ୍କାର ଅପଚୟ’ କହିବା ସହ ଏହାର ସିଏଜି ଅଡିଟ ଦାବି କରିଛନ୍ତି। ମହାନଦୀ ଟ୍ରାଇବୁନାଲ ସଦସ୍ୟଙ୍କ ଗସ୍ତ ପାଇଁ ଖର୍ଚ୍ଚ ହୋଇଥିବା ୨.୪୧ କୋଟି ଟଙ୍କାର ସ୍ପଷ୍ଟୀକରଣ ଓଡ଼ିଶା ସରକାର ଦେବା ଉଚିତ ବୋଲି ସେ ଦାବି କରିଛନ୍ତି।
Comments ସମସ୍ତ ମତାମତ