ମୁଖ୍ୟ ଖବର
ନୂଆଦିଲ୍ଲୀ: ଆସିଆନ୍-ଭାରତ ଶିଖର ସମ୍ମିଳନୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଏହି କାର୍ଯ୍ୟକ୍ରମରେ ଯୋଗ ଦେଇ ପ୍ରଧାନମନ୍ତ୍ରୀ କହିଛନ୍ତି ଯେ, ଦୁନିଆ ଏବେ ବହୁ ସଙ୍କଟ ଦେଇ ଗତି କରୁଛି । ଏବେ ବିଶ୍ଵକୁ ଶାନ୍ତି ଏବଂ ସ୍ଥିରତାର ଆବଶ୍ୟକତା ରହିଛି । ଆମ ପାଖରେ ସାମର୍ଥ୍ୟ ଏବଂ ସଂକଳ୍ପ ଅଛି । ଯାହାଦ୍ଵାରା ଆମେ ଆପୋସ ସହଭାଗୀତାକୁ ନୂତନ ଦିଗ ଦେଇପାରିବା । ଭାରତର ବିକାଶ ଏବଂ ଆସିଆନର ସମୃଦ୍ଧି ଗଭୀର ଭାବରେ ଜଡ଼ିତ । ଆଗାମୀ ବର୍ଷଗୁଡ଼ିକରେ, ଆସିଆନ କମ୍ୟୁନିଟି ଭିଜନ ୨୦୪୫ ଏବଂ ବିକଶିତ ଭାରତ ୨୦୪୭ ଆମର ଆକାଂକ୍ଷା ପୂରଣ କରିବାରେ ଏକ ପ୍ରମୁଖ ଭୂମିକା ଗ୍ରହଣ କରିବ ।
ପ୍ରଧାନମନ୍ତ୍ରୀ କହିଛନ୍ତି ଯେ, ଗତ ୧୨ ବର୍ଷ ମଧ୍ୟରେ ଆମେ ଆମର ସହଭାଗୀତାକୁ ନୂତନ ଗତି ଦେଇଛୁ । ଏବେ ଏକାଠି ହୋଇ ଆମକୁ ଭବିଷ୍ୟତ ପାଇଁ ଏକ ନୂତନ ମାର୍ଗ ପ୍ରସ୍ତୁତ କରିବାକୁ ପଡିବ । ASEANର ଏକତା ଏବଂ ଏହି ସହଭାଗୀତାରେ ଏହାର କେନ୍ଦ୍ରୀୟ ଭୂମିକା ପ୍ରତି ଭାରତର ପ୍ରତିବଦ୍ଧତା ଅଟଳ ରହିବ । ଆଜିର ବୈଠକ ଆମର ବ୍ୟାପକ ରଣନୈତିକ ସହଭାଗୀତାକୁ ନୂତନ ଉଚ୍ଚତାରେ ପହଞ୍ଚାଇବ ଏବଂ ଏକ ସୁରକ୍ଷିତ, ଅନ୍ତର୍ଭୁକ୍ତ ଏବଂ ସମୃଦ୍ଧ ଭାରତ-ପ୍ରଶାନ୍ତ ମହାସାଗରୀୟ କ୍ଷେତ୍ର ନିର୍ମାଣରେ ଯୋଗଦାନ ଦେବ ବୋଲି ମୋର ବିଶ୍ଵାସ ।
ପ୍ରଧାନମନ୍ତ୍ରୀ କହିଛନ୍ତି ଯେ, ଗତ କିଛି ବର୍ଷ ଧରି, ଭାରତର କାର୍ଯ୍ୟ ନୀତି ଆସିଆନ ସମ୍ପର୍କକୁ ନୂଆ ଦିଗ ଦେଇଛି । ଆମର ସହଭାଗୀତା ଏବେ ସାଧାରଣ ସଂସ୍କୃତି ଏବଂ ଐତିହ୍ୟଠାରୁ ଅଧିକ ବିସ୍ତାରିତ ହୋଇ ଡିଜିଟାଲ୍, ପ୍ରତିରକ୍ଷା ଏବଂ ମହାକାଶ ଭଳି କ୍ଷେତ୍ରରେ ଉପଲବ୍ଧି ପାଇଛି । ୨୦୧୪ ପରଠାରୁ, ଜନ ସମ୍ପର୍କକୁ ସୁଦୃଢ଼ କରିବା ପାଇଁ ୧୦୦ରୁ ଅଧିକ ପଦକ୍ଷେପ ନିଆଯାଇଛି । ପ୍ରାୟ ୨୫୦ଟି କ୍ଵିକ୍ ଇମ୍ପାକ୍ଟ ପ୍ରକଳ୍ପ ଆରମ୍ଭ କରାଯାଇଛି ଏବଂ ଦକ୍ଷତା ବିକାଶ ପାଇଁ ୧୦ ହଜାରରୁ ଅଧିକ ଛାତ୍ରବୃତ୍ତି ପ୍ରଦାନ କରାଯାଇଛି । ଆଜି ଭାରତ ଏବଂ ନଅଟି ଆସିଆନ ଦେଶ ମଧ୍ୟରେ ସିଧାସଳଖ ବିମାନ ଏବଂ ପର୍ଯ୍ୟଟନ ଆମର ଦୃଢ଼ ସମ୍ପର୍କର ଏକ ଦୃଢ଼ ପ୍ରମାଣ ।
Comments ସମସ୍ତ ମତାମତ