Tags : modi

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବୁଧବାର ‘ଜେନ୍‌ ଜି’ଙ୍କୁ ଶକ୍ତିଶାଳୀ ବାର୍ତ୍ତା ଦେଇଛନ୍ତି। ପ୍ରଧାନମନ୍ତ୍ରୀ କହିଛନ୍ତି ଯେ, ଭବିଷ୍ୟତରେ ଆମକୁ ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦଙ୍କ ପରି ଲକ୍ଷ ଲକ୍ଷ ଯୁବକଙ୍କ ଆବଶ୍ୟକତା ଅଛି। ସେ ଯୁବପିଢ଼ିଙ୍କୁ ଆହ୍ୱାନ ଦେଇ କହିଛନ୍ତି ଯେ, ଏହା ରିଲ୍‌ର ଯୁଗ ଓ ସୋସିଆଲ ମିଡିଆ ଇନଫ୍ଲୁଏନ୍ସର୍‌ମାନେ ଆପଣଙ୍କୁ ଆକର୍ଷିତ କରୁଛନ୍ତି। ସର୍ଟକଟରୁ ସାବଧାନ ରୁହନ୍ତୁ। ପ୍ରଧାନମନ୍ତ୍ରୀ ମୋଦୀ ଯୁବପିଢ଼ିଙ୍କୁ ଦୀର୍ଘ ଓ ଅଧିକ ଅର୍ଥପୂର୍ଣ୍ଣ ପଥ ବାଛିବାକୁ ଆହ୍ୱାନ କରିଛନ୍ତି। ମୋଦୀ କହିଛନ୍ତି ଯେ, ରେଳଷ୍ଟେସନରେ କିଛି ଲୋକ ପାଦଚଲା ପୋଲ ବ୍ୟବହାର କରିବା ପରିବର୍ତ୍ତେ ରେଳ ଟ୍ରାକ ପାର କରନ୍ତି କାରଣ ସେମାନେ ଏହାକୁ ଏକ ସର୍ଟକଟ୍‌ ଭାବରେ ଦେଖନ୍ତି। କିନ୍ତୁ ସର୍ଟକଟ୍ ତୁମ ଜୀବନକୁ ଛୋଟ କରିଦେବ। ସର୍ଟକଟ୍‌ ପ୍ରତି ସାବଧାନ ଓ ଇନଫ୍ଲୁଏନ୍ସର୍‌ଙ୍କ ଠାରୁ ସତର୍କ ରହିବାକୁ ପରାମର୍ଶ ଦେଇଛନ୍ତି। ସେ ଯୁବପିଢ଼ିଙ୍କୁ ଆତ୍ମଜୀବନୀ ପଢ଼ିବାକୁ ଆହ୍ୱାନ କରିଛନ୍ତି।
ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦଙ୍କ ଆତ୍ମଜୀବନୀ ‘ଟ୍ରାଏମ୍ଫ ଅଫ୍ ଦି ଇଣ୍ଡିଆନ୍ ରିପବ୍ଲିକ୍: ମାଇ ଲାଇଫ୍, ମାଇ ଷ୍ଟ୍ରଗଲ୍ସ’ ଉନ୍ମୋଚନ ଅବସରରେ ପ୍ରଧାନମନ୍ତ୍ରୀ ମୋଦୀ କହିଛନ୍ତି, ରାଷ୍ଟ୍ରପତି ପରି ସର୍ବୋଚ୍ଚ ପଦବୀରୁ ଅବସର ନେବା ପରେ ମଧ୍ୟ କୋବିନ୍ଦ ବିଶ୍ରାମ ନେଇନାହାନ୍ତି। ସେ ଏବେବି ଏକ ରାଷ୍ଟ୍ର, ଏକ ନିର୍ବାଚନ ଭଳି ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ କାମ କରୁଛନ୍ତି। ସେ ଦେଶକୁ ଜାଗ୍ରତ କରୁଛନ୍ତି। ଏହା ଏପରି ଏକ ବିଷୟ ଯାହାର ସଂକଳ୍ପ ଦେଶର ଗଣତନ୍ତ୍ରରେ ଏକ ନୂତନ ଅଧ୍ୟାୟ ଖୋଲିପାରେ। ମୁଁ ବିଶ୍ୱାସ କରେ ଦେଶର ଲୋକମାନେ ଏହି ସମର୍ପଣ ଓ ସେବା ମନୋଭାବରୁ ବହୁତ କିଛି ଶିଖିପାରିବେ।
ମୋଦୀ କହିଛନ୍ତି, ଦୈନନ୍ଦିନ ଜୀବନରେ ସକ୍ରିୟ ଥିବା ସମୟରେ ଆତ୍ମଜୀବନୀ ପାଇଁ ସମୟ ବାହାର କରିବା ବହୁତ କଷ୍ଟକର। ରାମନାଥ କୋବିନ୍ଦ ଆମ ସମସ୍ତଙ୍କ ପାଇଁ ଏହା କରିଛନ୍ତି। କାରଣ ତାଙ୍କ ଜୀବନରେ ଏପରି ବହୁତ କିଛି ଅଛି ଯେଉଁଥିରେ ଗରିବ ଓ ବଞ୍ଚିତ ପୃଷ୍ଠଭୂମିର ଅନେକ ଲୋକ ନିଜ ଜୀବନର ପ୍ରତିଫଳନ ଦେଖିପାରିବେ। ସାଧାରଣ ପରିବାରଗୁଡ଼ିକ କିପରି କଠିନ ପରିସ୍ଥିତିରେ ମଧ୍ୟ ସଚ୍ଚୋଟ ରୁହନ୍ତି, କିପରି ସେହି ଆଦର୍ଶଗୁଡ଼ିକ ପରବର୍ତ୍ତୀ ସମୟରେ ଆମ ଜୀବନର ମୂଳଦୁଆ ହୋଇଯାଏ। କିପରି ଆମର କଠିନ ସମୟର ମୂଲ୍ୟବୋଧ ଆମକୁ ସାରା ଜୀବନ ଆଲୋକିତ କରିଚାଲିଥାଏ। କିପରି ଏହି ପବିତ୍ରତା ଆମକୁ ରାଷ୍ଟ୍ର ସେବା କରିବାକୁ ଶକ୍ତି ପ୍ରଦାନ କରେ ତାହା ଆତ୍ମଜୀବନୀରୁ ଜାଣିବାକୁ ମିଳିପାରିବ।
ପ୍ରଧାନମନ୍ତ୍ରୀ ମୋଦୀ କହିଛନ୍ତି, ରାମନାଥ କୋବିନ୍ଦ ବିଭିନ୍ନ ସ୍ଥିତିରେ ସମାଜକୁ ନିରନ୍ତର ପ୍ରେରଣା ଦେଇଛନ୍ତି। ପ୍ରଧାନମନ୍ତ୍ରୀ ଯୁବପିଢ଼ିଙ୍କୁ ଅନୁରୋଧ କରିଛନ୍ତି ଯେ, ଯଦି ସେମାନେ ସର୍ଟକଟ ନେଇ କୌଣସି ସ୍ଥାନରୁ ବାହାରିବାକୁ ଚାହାଁନ୍ତି, ତେବେ ସେମାନେ ପସନ୍ଦ କରୁଥିବା ଯେକୌଣସି ଆତ୍ମଜୀବନୀ ପଢ଼ନ୍ତୁ।