Tags : modi

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଅପରାହ୍ନ ୨ଟାରେ ଲୋକସଭାକୁ ସମ୍ବୋଧିତ କରିବେ । ପଶ୍ଚିମ ଏସିଆ ସ୍ଥିତି ନେଇ ମୋଦୀ ଗୃହକୁ ଅବଗତ କରିବେ । ପଶ୍ଚିମ ଏସିଆରେ ଚାଲିଥିବା ଯୁଦ୍ଧ ପରିସ୍ଥିତି ଦିନକୁ ଦିନ ଅଧିକ ବିପଦପୂର୍ଣ୍ଣ ହେବାରେ ଲାଗିଛି। ଆମେରିକା ଏବଂ ଇସ୍ରାଏଲର ଭୟଙ୍କର ଆକ୍ରମଣରେ ଇରାନ ମଧ୍ୟ ଇସ୍ରାଏଲ ଏବଂ ଉପସାଗରୀୟ ଦେଶଗୁଡ଼ିକରେ ଥିବା ଆମେରିକୀୟ ସାମରିକ ଘାଟି ଉପରେ ପ୍ରତିଆକ୍ରମଣ ଆରମ୍ଭ କରୁଛି। କ୍ଷେପଣାସ୍ତ୍ର ଏବଂ ଡ୍ରୋନର ପ୍ରବଳ ଆକ୍ରମଣ ମଧ୍ୟରେ, ଯୁଦ୍ଧ ଆଜି ୨୫ ଦିନରେ ପହଞ୍ଚିଛି। ଏପରି ଏକ ଗୁରୁତ୍ୱପୂର୍ଣ୍ଣ ସମୟରେ, ଭାରତ ମଧ୍ୟ ସତର୍କତାର ସହିତ ଆଗକୁ ବଢ଼ୁଛି।  ମଧ୍ୟପ୍ରାଚ୍ୟରେ ଲାଗି ରହିଥିବା ଯୁଦ୍ଧ ଯୋଗୁଁ ଦେଶରେ ପେଟ୍ରୋଲିୟମ୍‌, ଅଶୋଧିତ ତୈଳ, ଗ୍ୟାସ ଓ ସାର ଆଦି ଯୋଗାଣ ବାଧାପ୍ରାପ୍ତ ହୋଇଛି। ଏପରି ସ୍ଥିତିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରବିବାର ଏକ ଉଚ୍ଚସ୍ତରୀୟ ବୈଠକରେ ଇନ୍ଧନ ଓ ଶକ୍ତି ପରିସ୍ଥିତି ଉପରେ ସମୀକ୍ଷା କରିଛନ୍ତି। ବୈଠକ କାଳରେ ମୋଦୀ ଦେଶବ୍ୟାପୀ ନିରବଚ୍ଛିନ୍ନ ଇନ୍ଧନ ଓ ଶକ୍ତି ଯୋଗାଣ ଉପରେ ଗୁରୁତ୍ବ ଦେଇଥିଲେ। ବୈଠକରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ, ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହାଙ୍କ ସମେତ ଅନ୍ୟ ବରିଷ୍ଠ ମନ୍ତ୍ରୀ ଓ ଅଧିକାରୀମାନେ ଉପସ୍ଥିତ ଥିଲେ।

ରବିବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏକ ଉଚ୍ଚସ୍ତରୀୟ ବୈଠକରେ ପେଟ୍ରୋଲିୟମ, ଗ୍ୟାସ, ବିଦ୍ୟୁତ ଏବଂ ସାର ଯୋଗାଣର ସମୀକ୍ଷା କରିଛନ୍ତି। ଯୁଦ୍ଧ ସମୟରେ ଅଶୋଧିତ ତୈଳ ଏବଂ ଗ୍ୟାସର ନିରନ୍ତର ଯୋଗାଣ ବଜାୟ ରଖିବା ପାଇଁ ପ୍ରଧାନମନ୍ତ୍ରୀ ନିର୍ଦ୍ଦେଶ ଦେଇଛନ୍ତି। ଘରୋଇ LPG ସିଲିଣ୍ଡର ଯୋଗାଣ ସ୍ବାଭାବିକ ରହିଛି। ଶିକ୍ଷାନୁଷ୍ଠାନ ଓ ଡାକ୍ତରଖାନାକୁ ଅଗ୍ରାଧିକାର ଭିତ୍ତିରେ ବାଣିଜ୍ୟିକ LPG ଯୋଗାଇବାକୁ ନିଷ୍ପତ୍ତି ନିଆଯାଇଛି। LPG ହୋର୍ଡିଂ ଏବଂ କଳାବଜାରୀ ରୋକିବାକୁ ବିଭିନ୍ନ ରାଜ୍ୟରେ ଚଢ଼ାଉ ଜାରି ରହିଛି।