Tags : modi

ନୂଆଦିଲ୍ଲୀ: ରାଜ୍ୟସଭାରେ ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବ ଉପରେ ଆଲୋଚନା କରିଛନ୍ତି ପ୍ରଧାନମନ୍ତ୍ରୀ ମୋଦୀ। ଏହି ସମୟରେ ପ୍ରଧାନମନ୍ତ୍ରୀ କହିଛନ୍ତି ଯେ, ସାରା ବିଶ୍ୱ ଭରସାର ସହିତ ଭାରତ ଆଡ଼କୁ ଦେଖୁଛି। ସମଗ୍ର ବିଶ୍ୱ ଏବେ ଭାରତ ଏବଂ ୟୁରୋପୀୟ ସଂଘ ମଧ୍ୟରେ ବାଣିଜ୍ୟିକ ଚୁକ୍ତିକୁ ପ୍ରଶଂସା କରୁଛି। ତେବେ ପ୍ରଧାନମନ୍ତ୍ରୀ ତାଙ୍କ ଅଭିଭାଷଣ ଆରମ୍ଭ କରିବା ମାତ୍ରେ ବିରୋଧୀ ସାଂସଦ ମାନେ ବିଭିନ୍ନ ନାରାବାଜି ଦେବା ଆରମ୍ଭ କରିଥିଲେ। ରାଜ୍ୟସଭାରେ ବିରୋଧୀ ଦଳ ନେତା ମଲ୍ଲିକାର୍ଜୁନ ଖାର୍ଗେ ମଧ୍ୟ ଏହି ନାରାବାଜିରେ ସାମିଲ ଥିଲେ, ଯାହାକୁ ପ୍ରଧାନମନ୍ତ୍ରୀ ମୋଦୀ କଟାକ୍ଷ କରିଥିଲେ।

ବିରୋଧୀଙ୍କ ନାରାବାଜି ସମୟରେ ପ୍ରଧାନମନ୍ତ୍ରୀ ମୋଦୀ ପରାମର୍ଶ ଦେଇଥିଲେ ଯେ କଂଗ୍ରେସ ସାଂସଦ ମଲ୍ଲିକାର୍ଜୁନ ଖାର୍ଗେ ତାଙ୍କ ବୟସକୁ ବିଚାରକୁ ନେଇ, ତାଙ୍କ ଆସନରେ ବସି ସ୍ଲୋଗାନ ଦେବା ଉଚିତ। ଏହି ସମୟରେ ବିରୋଧୀ ଦଳର ସାଂସଦ ମାନେ ହଙ୍ଗାମା କରି ଗୃହରୁ ଚାଲିଗଲେ। ପ୍ରଧାନମନ୍ତ୍ରୀ ମୋଦୀ ତାଙ୍କ ଅଭିଭାଷଣରେ ବିରୋଧୀ ଦଳ ଉପରେ ମଧ୍ୟ କଠୋର ଆକ୍ରମଣ କରିଛନ୍ତି। ମୋଦୀ କହିଥିଲେ ଯେ, କଂଗ୍ରେସର ନା ଇଚ୍ଛାଶକ୍ତି ଅଛି ନା ଦୃଷ୍ଟିକୋଣ...ଆଜି ଭାରତ ନୀତି ଆଧାରରେ ଆଗକୁ ବଢ଼ୁଛି... ଦେଶ ନିରନ୍ତର ବିକାଶ ଦିଗରେ ଅଗ୍ରସର ହେଉଛି...

ପିଏମ ମୋଦୀ ତାଙ୍କ ଭାଷଣରେ ଭାରତ-ୟୁରୋପୀୟ ସଂଘ, ଏବଂ ଭାରତ- ଆମେରିକା ମଧ୍ୟରେ ବାଣିଜ୍ୟ ଚୁକ୍ତି ବିଷୟରେ ଆଲୋଚନା କରିଥିଲେ। ସେ କହିଥିଲେ ଯେ, ଆଜି ଭାରତ ପ୍ରତି ବିଶ୍ୱର ବିଶ୍ୱାସ ବୃଦ୍ଧି ପାଉଛି। ଭାରତ ବିଶ୍ୱ ଦକ୍ଷିଣର ଏକ ଦୃଢ଼ ସ୍ୱର ପାଲଟିଛି। କଂଗ୍ରେସ ଦଳକୁ ଟାର୍ଗେଟ କରି ପ୍ରଧାନମନ୍ତ୍ରୀ ମୋଦୀ କହିଥିଲେ ଯେ, ପୂର୍ବରୁ ଭୋଟ ବ୍ୟାଙ୍କ ରାଜନୀତି ସାଧାରଣ ଥିଲା। ଲାଲକିଲ୍ଲାର ପ୍ରାଚୀରରୁ ଯେକୌଣସି କଂଗ୍ରେସ ପ୍ରଧାନମନ୍ତ୍ରୀଙ୍କ ଭାଷଣକୁ ବିଶ୍ଳେଷଣ କଲେ, କେହି ବୁଝିପାରିବେ ଯେ ସେମାନଙ୍କର କେଉଁ ଦୃଷ୍ଟିକୋଣର ଅଭାବ ଥିଲା।

ପ୍ରଧାନମନ୍ତ୍ରୀ ମୋଦୀ ତାଙ୍କ ଭାଷଣ ସମୟରେ କହିଥିଲେ ଯେ, ତାଙ୍କର ଅଧିକାଂଶ ସମୟ କଂଗ୍ରେସ ଦଳର ଭୁଲକୁ ସଂଶୋଧନ କରିବାରେ ବିତୁଛି। ଆଜି ଭାରତ ବିଶ୍ୱ ସହିତ ପ୍ରତିଯୋଗିତା କରିବାକୁ ସମ୍ପୂର୍ଣ୍ଣ ପ୍ରସ୍ତୁତ। ଭାରତର MSME କ୍ଷେତ୍ର ବିକାଶରେ ଗୁରୁତ୍ୱପୂର୍ଣ୍ଣ ଅବଦାନ ଦେଉଛି। ଭାରତରେ ବିଶ୍ୱର ବିଶ୍ୱାସ ନିରନ୍ତର ବୃଦ୍ଧି ପାଉଛି।