Tags : meeting

ନୂଆଦିଲ୍ଲୀ :ଭାରତର ସହରୀ ବିକାଶର ରୂପରେଖ ପରିବର୍ତ୍ତନ ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ସ୍ୱରୂପ, ନୂଆଦିଲ୍ଲୀସ୍ଥିତ ଇଣ୍ଡିଆ ହାବିଟାଟ୍ ସେଣ୍ଟରଠାରେ 'ଅର୍ବାନ ଚ୍ୟାଲେଞ୍ଜ ଫଣ୍ଡ' (UCF) ଉପରେ ଏକ ଉଚ୍ଚସ୍ତରୀୟ ରଣନୈତିକ ପରାମର୍ଶ ବୈଠକ ଅନୁଷ୍ଠିତ ହୋଇଯାଇଛି। ଗତ ଏପ୍ରିଲ ୧୫, ୨୦୨୬ରେ ଏହି ପାଣ୍ଠିର ପରିଚାଳନା ନିର୍ଦ୍ଦେଶାବଳୀ ପ୍ରକାଶ ପାଇବା ପରେ ଏହି ବୈଠକ ଆୟୋଜିତ ହୋଇଥିଲା।

କେନ୍ଦ୍ର ଗୃହ ନିର୍ମାଣ ଓ ସହରୀ ବ୍ୟାପାର ମନ୍ତ୍ରୀ ମନୋହର ଲାଲ ଖଟ୍ଟରଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ବିଭିନ୍ନ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ମନ୍ତ୍ରୀ ଏବଂ ବରିଷ୍ଠ ପଦାଧିକାରୀମାନେ ଯୋଗଦେଇ ଏହି ଯୁଗାନ୍ତକାରୀ ପଦକ୍ଷେପର କାର୍ଯ୍ୟକାରିତା ରଣନୀତି ଉପରେ ଆଲୋଚନା କରିଥିଲେ।

ଏହି ସମ୍ମିଳନୀକୁ ସମ୍ବୋଧିତ କରି ଓଡ଼ିଶାର ଗୃହ ନିର୍ମାଣ ଓ ନଗର ଉନ୍ନୟନ ମନ୍ତ୍ରୀ ଡଃ କୃଷ୍ଣ ଚନ୍ଦ୍ର ମହାପାତ୍ର UCF କୁ ଭାରତର ସହରୀ ରୂପାନ୍ତରଣ କ୍ଷେତ୍ରରେ ଏକ 'ନୂତନ ପ୍ରାରମ୍ଭ' ଭାବେ ବର୍ଣ୍ଣନା କରିଛନ୍ତି, ଯାହା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ 'ବିକଶିତ ଭାରତ @ ୨୦୪୭' ଦୂରଦୃଷ୍ଟି ସହିତ ସମାନ୍ତରାଳ। ସେ କହିଛନ୍ତି ଯେ, ଏହି ପାଣ୍ଠି ବଜାର-ଭିତ୍ତିକ ବ୍ୟବସ୍ଥା ଏବଂ ଘରୋଇ ପୁଞ୍ଜି ବିନିଯୋଗକୁ ବିନିଯୋଗ କରି ଆତ୍ମନିର୍ଭରଶୀଳ ତଥା ଅଭିବୃଦ୍ଧି-ମୁଖୀ ସହର ଗଠନରେ ସହାୟକ ହେବ।
ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ନେତୃତ୍ୱରେ ଓଡ଼ିଶାର ସକ୍ରିୟ ଆଭିମୁଖ୍ୟ ଉପରେ ଆଲୋକପାତ କରି ମନ୍ତ୍ରୀ ଶ୍ରୀ ମହାପାତ୍ର ଭୁବନେଶ୍ୱର–କଟକ–ପୁରୀ–ପାରାଦୀପ ଅର୍ଥନୈତିକ କରିଡରକୁ ବିକାଶର ପ୍ରମୁଖ ଇଞ୍ଜିନ ଭାବେ ଚିହ୍ନିତ କରିଛନ୍ତି। ବିଶ୍ୱସ୍ତରୀୟ ଭିତ୍ତିଭୂମି ଯୋଗାଇବା, ଜଳବାୟୁ ସହନଶୀଳତା ବୃଦ୍ଧି କରିବା ଏବଂ ବ୍ୟାପକ ନିଯୁକ୍ତି ସୁଯୋଗ ସୃଷ୍ଟି କରିବା ପାଇଁ ରାଜ୍ୟରେ ଏକାଧିକ "ପୁଞ୍ଜିନିବେଶ-ଉପଯୋଗୀ" ପ୍ରକଳ୍ପ ପ୍ରସ୍ତୁତ କରାଯାଉଛି।

ଗୃହ ନିର୍ମାଣ ଓ ନଗର ଉନ୍ନୟନ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ଶ୍ରୀମତୀ ଉଷା ପାଢୀ ଏକ ରଣନୈତିକ ଦୃଷ୍ଟିକୋଣ ଉପସ୍ଥାପନ କରି 'ବିକଶିତ ଓଡ଼ିଶା @ ୨୦୩୬' ପାଇଁ ଏକ ବ୍ୟାପକ ରୋଡମ୍ୟାପ୍ ବାବଦରେ ସୂଚନା ଦେଇଥିଲେ। ସେ ସମନ୍ୱିତ ଯୋଜନା, ତଥ୍ୟ-ଭିତ୍ତିକ ଶାସନ ଏବଂ ପ୍ରତିଷ୍ଠାନିକ ଦକ୍ଷତା ବୃଦ୍ଧି ଉପରେ ଗୁରୁତ୍ୱାରୋପ କରିଥିଲେ। ଓଡ଼ିଶାର ସହରୀ ପରିବେଶକୁ ଅଧିକ ନିବେଶ-ଉପଯୋଗୀ, ସ୍ଥାୟୀ ଏବଂ ଅଭିନବ କରିବା ପାଇଁ ସଂସ୍କାରମୂଳକ ପଦକ୍ଷେପ ନିଆଯାଉଛି ବୋଲି ସେ ପ୍ରକାଶ କରିଥିଲେ।

ସହରୀ ଭିତ୍ତିଭୂମି ପାଇଁ କେନ୍ଦ୍ର ସରକାରଙ୍କ ଦ୍ୱାରା ଧାର୍ଯ୍ୟ ୧ ଲକ୍ଷ କୋଟି ଟଙ୍କାର ବ୍ୟୟବରାଦ ସହିତ ଏହି ବୈଠକରେ ପ୍ରକଳ୍ପର ପ୍ରାଥମିକତା, ତ୍ୱରିତ ଅନୁମୋଦନ ଏବଂ ପାଣ୍ଠିର ଦକ୍ଷ ବିନିଯୋଗ ଉପରେ ଧ୍ୟାନ ଦିଆଯାଇଥିଲା। ଏଥିରେ ମୁଖ୍ୟତଃ ଇଣ୍ଟିଗ୍ରେଟେଡ୍ କମାଣ୍ଡ ଆଣ୍ଡ କଣ୍ଟ୍ରୋଲ୍ ସେଣ୍ଟର, ପୌର ପରିଚାଳନାର ଡିଜିଟାଇଜେସନ୍, ଡ୍ରୋନ୍-ଭିତ୍ତିକ ଜମି ପରିଚାଳନା, ଟ୍ରାଞ୍ଜିଟ୍-ଓରିଏଣ୍ଟେଡ୍ ଡେଭଲପମେଣ୍ଟ , ଡମ୍ପସାଇଟ୍ ସଂସ୍କାର ଏବଂ ମୌଳିକ ସହରୀ ଭିତ୍ତିଭୂମିର ସୁଦୃଢ଼ିକରଣ ଉପରେ ଗୁରୁତ୍ୱାରୋପ କରାଯାଇଛି।

ଏହି ସମ୍ମିଳନୀରେ ଓଡ଼ିଶାର ଗୃହ ନିର୍ମାଣ ଓ ନଗର ଉନ୍ନୟନ ବିଭାଗର ବରିଷ୍ଠ ପଦାଧିକାରୀଙ୍କ ମଧ୍ୟରେ ପୌର ପ୍ରଶାସନ ନିର୍ଦ୍ଦେଶକ ଅରିନ୍ଦମ ଦାକୁଆ, ଅତିରିକ୍ତ ସଚିବ ଶତ୍ରୁଘ୍ନ କର  , ଆର୍ଥିକ ପରାମର୍ଶଦାତା ତଥା ଅତିରିକ୍ତ ସଚିବ ଶ୍ରୀମତୀ ଶିଖା ବିଶ୍ୱାଳ ,ବି ଏମ୍ ସି କମିଶନର ଚଞ୍ଚଲ ରାଣା,  ପୁରୀ ମହାନଗର ନିଗମର କମିଶନର ସ୍ନେହା ଅରୁଗୁଲା ପ୍ରମୁଖ ଅଂଶଗ୍ରହଣ କରିଥିଲେ।

ଏହି ପରାମର୍ଶ ବୈଠକ ସହରୀ ପୁଞ୍ଜିନିବେଶକୁ ପ୍ରୋତ୍ସାହିତ କରିବା ଦିଗରେ ଏକ ମାଇଲଖୁଣ୍ଟ ସଦୃଶ ଏବଂ ଏହା ସ୍ଥାୟୀ, ଅନ୍ତର୍ଭୁକ୍ତ ଓ ଭବିଷ୍ୟତ-ଉପଯୋଗୀ ସହର ଗଠନ ପାଇଁ ଭାରତ ସରକାରଙ୍କ ପ୍ରତିବଦ୍ଧତାକୁ ଦୋହରାଇଛି।