Tags : madras high court

ଚେନ୍ନାଇ: ହିନ୍ଦୁ ମନ୍ଦିରରେ ଟଙ୍କା ନେଇ ଭିଆଇପି ଦର୍ଶନ କରାଯିବା ବ୍ୟବସ୍ଥା ସମ୍ପୂର୍ଣ୍ଣ ଭୁଲ ଓ ଭେଦଭାବପୂର୍ଣ୍ଣ । ମସ୍‌ଜିଦ କିମ୍ବା ଚର୍ଚ୍ଚରେ ଏଭଳି କୌଣସି ପ୍ରଥା ପ୍ରଚଳିତ ହୁଏ ନାହିଁ ବୋଲି ମାଡ୍ରାସ ହାଇକୋର୍ଟ ଟିପ୍ପଣୀ କରିଛନ୍ତି । ତାମିଲନାଡୁର ସୁବ୍ରମଣିୟ ସ୍ୱାମୀ ମନ୍ଦିରରେ ଭିଆଇପି ଦର୍ଶନ ଓ ସ୍ୱତନ୍ତ୍ର ଦର୍ଶନ ବ୍ୟବସ୍ଥାକୁ ରଦ୍ଦ କରିବା ଲାଗି ଆଗତ ଏକ ପିଟିସନ ଉପରେ ଶୁଣାଣି କରିବା ଅବସରରେ ବିଚାରପତି ଜି.ଆର ସ୍ୱାମୀନାଥନ ଓ ବିଚାରପତି ଭି. ଲକ୍ଷ୍ମୀନାରାୟଣନଙ୍କୁ ନେଇ ଗଠିତ ଖଣ୍ଡପୀଠ ମୌଖିକ ଭାବେ ଏଭଳି ମନ୍ତବ୍ୟ ଦେଇଛନ୍ତି ।
ହାଇକୋର୍ଟ କହିଛନ୍ତି ଯେ ଭଗବାନଙ୍କ ପାଖରେ ସମସ୍ତେ ସମାନ । ମନ୍ତ୍ରୀ ଓ ଅନ୍ୟ ଭିଆଇପିଙ୍କ ଦର୍ଶନ ଯୋଗୁ ସାଧାରଣ ଲୋକମାନେ ହଇରାଣ ହେବା ଉଚିତ ନୁହେଁ । ମନ୍ତ୍ରୀ ଓ ବିଧାୟକମାନେ ଏକଥା ଭାବିବା ଉଚିତ ନୁହେଁ ଯେ ସେମାନେ ଯେତେବେଳେ ଚାହିଁବେ ମନ୍ଦିରକୁ ଯାଇ ଦର୍ଶନ କରିବେ ଏବଂ ଭଗବାନ ସେମାନଙ୍କ ପାଇଁ ଅପେକ୍ଷା କରିଥିବେ । ଭିଆଇପି ଦର୍ଶନର ଆବଶ୍ୟକତା କଣ? ଭଗବାନଙ୍କ ନିକଟରେ ସମସ୍ତେ ସମାନ । ଅତିରିକ୍ତ ଆଡଭୋକେଟ ଜେନେରାଲ ଜଣାଇଥିଲେ ଯେ ଧାଡିରେ ଭିଡ କମାଇବା ସହ ମନ୍ଦିର ନିମନ୍ତେ କିଛି ଅର୍ଥ ଉପାର୍ଜନ ଲାଗି ଭିଆଇପି ଓ ସ୍ୱତନ୍ତ୍ର ଦର୍ଶନ ବ୍ୟବସ୍ଥା କରାଯାଇଛି । କିଛିଦିନ ତଳେ ମନ୍ତ୍ରୀ ସିଟିଆର ନିର୍ମଳ କୁମାର ସୁବ୍ରମଣିୟ ସ୍ୱାମୀ ମନ୍ଦିରକୁ ଦର୍ଶନ ପାଇଁ ଯିବା ବେଳେ ସାଧାରଣ ଲୋକଙ୍କୁ ଅଟକାଇ ଦିଆଯାଇଥିଲା । ଯାହାକୁ ବିରୋଧ କରି ଏହି ପିଟିସନ ଫାଇଲ କରାଯାଇଛି । ଭିଏଚ୍ପି ଉତ୍ତର ତାମିଲନାଡୁ ସଭାପତି ପି. ଚୋକାଲିଙ୍ଗମ ଏହି ପିଟିସନ ଦାଖଲ କରିଛନ୍ତି । ସେଥିରେ ସେ ଦର୍ଶାଇଛନ୍ତି ଯେ ଜାତି, ସାମାଜିକ ପ୍ରତିଷ୍ଠା ଓ ଧନ ଆଧାରରେ ଭେଦଭାବକୁ ସନାତନ ଧର୍ମ ଅନୁମତି ଦିଏନାହିଁ । ମନ୍ଦିରକୁ ଦର୍ଶନ ନିମନ୍ତେ ଆସୁଥିବା ସବୁ ଶ୍ରଦ୍ଧାଳୁଙ୍କୁ ସମାନ ଭାବେ ବ୍ୟବହାର କରାଯିବା ଉଚିତ ।