Tags : LOOT

ଭୁବନେଶ୍ବର:ଭୁବନେଶ୍ବରରେ ପୁଣି ଆକ୍ଟିଭ୍‌ ହେଲେ ଅପରାଧୀ । ପୋଲିସ୍‌କୁ ଖୋଲା ଚ୍ୟାଲେଞ୍ଜ ଦେଇ ବେଧଡକ ଲୁଟ୍‌ପାଟ୍‌ କରୁଛନ୍ତି । ଗୁରୁବାର ଭୁବନେଶ୍ବରରେ ଜଣେ ବ୍ୟବସାୟୀଙ୍କୁ ହାଣି ୨୦ ଲକ୍ଷ ଟଙ୍କା ଲୁଟି ନେଇଛନ୍ତି । ପାହାଳ ଥାନା ଅଞ୍ଚଳରେ ଏଭଳି ଘଟଣା ଘଟିଛି । ତେବେ ଏହି ଲୁଟ୍‌ର ଶିକାର ହୋଇଛନ୍ତି ବାଲେଶ୍ବରର ପ୍ରଭାତ କୁମାର ସାହୁ । ସେପଟେ ଏନେଇ ପ୍ରଭାତ ଥାନାରେ ଅଭିଯୋଗ କରିବା ପରେ ପୋଲିସ୍‌ ଏହି ଘଟଣାର ତଦନ୍ତ ଜାରି ରଖିଛି ।
ମିଳିଥିବା ସୂଚନା ଅନୁସାରେ, ପ୍ରଭାତ କୁମାର ସାହୁଙ୍କ ଘର ବାଲେଶ୍ଵର ଜିଲ୍ଲା ସଦ ସଦର ଥାନା ଓଡଙ୍ଗୀ ଗାଁରେ । ବ୍ୟବସାୟ ପାଇଁ ତାଙ୍କର କିଛି ଟଙ୍କା ଆବଶ୍ୟକ ଥିଲା । ଏଥିପାଇଁ ସେ ତାଙ୍କ ଦୁଇ ସାଙ୍ଗ ସୁରେଶ ଓ ସରୋଜଙ୍କୁ ନେଇ ଭୁବନେଶ୍ବର ଆସିଥିଲେ । ଭୁବନେଶ୍ବରରୁ ପ୍ରଭାତ ତାଙ୍କ ସହଯୋଗୀଙ୍କଠାରୁ ୨୦ ଲକ୍ଷ ଟଙ୍କା ନେଇ ବାଲେଶ୍ବର ଫେରୁଥିଲେ । ଆଉ ଫେରିବା ବାଟରେ ସେମାନେ ପାହାଳ ଥାନାଠାରୁ କିଛି ଦୂରରେ କାର୍‌ ସାଇଡ୍‌ କରି ଚା' ପିଉଥିଲେ । ଠିକ୍ ଏହି ସମୟରେ ୨ଟି ବାଇକ୍‌ରେ ୫ ଜଣ ଅପରାଧୀ ସେମାନଙ୍କ ପାଖକୁ ଆସିଥିଲେ । ଆଉ ପ୍ରଭାତ, ସରୋଜ ଓ ସୁରୋଶ କିଛି ବୁଝିବା ଆଗରୁ ଅପରାଧୀମାନେ ଖଣ୍ଡା, ଭୁଜାଲି ଆଦି ମାରଣାସ୍ତ୍ରରେ ସେମାନଙ୍କୁ ଆକ୍ରମଣ କରିଥିଲେ । ଆଉ ତାଙ୍କଠୁ କାର ଚାବି ନେଇ ୨୦ ଲକ୍ଷ ଟଙ୍କା ଭର୍ତ୍ତି ବ୍ୟାଗ୍‌କୁ ନେଇ ଫେରାର୍‌ ହୋଇଯାଇଥିଲେ । ତେବେ ଲୁଟ୍‌ ବେଳେ ପ୍ରଭାତ ପ୍ରତିବାଦ କରିବାରୁ ଅପରାଧୀମାନେ ତାଙ୍କ ହାତକୁ ହାଣି ଦେଇଥିବା ସୂଚନା ମିଳିଛି ।
ତେବେ ଲୁଟ୍‌ର ଶିକାର ହେବା ପରେ ପ୍ରଭାତ ପୋଲିସ୍ କଣ୍ଟ୍ରୋଲ ରୁମ୍‌କୁ ଫୋନ୍‌ କରି ଘଟଣା ବିଷୟରେ କହିଥିଲେ । ପାହାଳ ଥାନା ପୋଲିସ୍‌ ଘଟଣାସ୍ଥଳରେ ପହଞ୍ଚି ପ୍ରଥମେ ୩ ଜଣଙ୍କୁ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରିଥିଲା । ପ୍ରାଥମିକ ଚିକିତ୍ସା ପରେ ପ୍ରଭାତ ପାହାଳ ଥାନାରେ ଅଭିଯୋଗ ଦାଖଲ କରିଛନ୍ତି । ପୋଲିସ୍‌ ଏବେ ଏହି ଘଟଣାର ତଦନ୍ତ ଜାରି ରଖିଛି ।