Tags : live in

ନୂଆଦିଲ୍ଲୀ: ବିବାହିତ ପୁରୁଷ ଯଦି କୌଣସି ପ୍ରାପ୍ତ ବୟସ୍କ ମହିଳାଙ୍କ ସହ ତାଙ୍କ ସହମତିରେ ଲିଭ୍-ଇନ୍‌ରେ ରହିବେ ତେବେ ତାହା ଅପରାଧ ନୁହେଁ ବୋଲି ଆହ୍ଲାବାଦ ହାଇକୋର୍ଟ ରାୟ ଦେଇଛନ୍ତି । ବିଚାରପତି ଜେ.ଜେ ମୁନିର ଓ ବିଚାରପତି ତରୁଣ ସାକ୍ସେନାଙ୍କୁ ନେଇ ଗଠିତ ଖଣ୍ଡପୀଠ କହିଛନ୍ତି ଯେ ନୈତିକତା ଓ ଆଇନ ଭିନ୍ନ ଭିନ୍ନ । ନିଷ୍ପତ୍ତି ନୈତିକତାରେ ନୁହେଁ, ଆଇନ ଅନୁସାରେ ହୋଇଥାଏ ।

ହାଇକୋର୍ଟ ଶାହଜାହାନପୁର ଅଞ୍ଚଳର ଏକ ମାମଲାର ଶୁଣାଣି କରିବା ଅବସରରେ ଏଭଳି ରାୟ ଶୁଣାଇଛନ୍ତି । ଯେଉଁଠାରେ ଲିଭ୍‌ଇନ୍‌ରେ ରହୁଥିବା ଏକ ଦମ୍ପତି ସେମାନଙ୍କ ପରିବାର ଠାରୁ ମିଳୁଥିବା ଧମକ ଲାଗି ସୁରକ୍ଷା ମାଗିଥିଲେ । କୋର୍ଟ ଉଭୟଙ୍କୁ ଅନ୍ତରୀଣ ଆଶ୍ୱସ୍ତି ଦେବା ସହ ସେମାନଙ୍କ ଗିରଫଦାରୀ ଉପରେ ରୋକ୍ ଲଗାଇଛନ୍ତି । ଏଥିସହ ମହିଳାଙ୍କ ପରିବାରକୁ କୌଣସି ପ୍ରକାର ସମ୍ପର୍କ ରଖିବା କିମ୍ବା କ୍ଷତି ପହଞ୍ଚାଇବାରୁ ଦୂରେଇ ରହିବାକୁ କହିଛନ୍ତି । ହାଇକୋର୍ଟ କହିଛନ୍ତି ଯଦି ଆଇନ ଅନୁସାରେ ଏହା ଅପରାଧ ନୁହେଁ,ତେବେ ସାମାଜିକ ବିଚାର ଓ ନୈତିକତା କୋର୍ଟଙ୍କ ନିଷ୍ପତ୍ତିକୁ ପ୍ରଭାବିତ କରିପାରିବ ନାହିଁ । ମହିଳା ତାଙ୍କ ପିଟିସନରେ ଦର୍ଶାଇଥିଲେ କି ସେ ସାବାଳିକା ଏବଂ ନିଜ ଇଚ୍ଛାରେ ସମ୍ପୃକ୍ତ ପୁରୁଷଙ୍କ ସହ ଲିଭ୍-ଇନ୍‌ରେ ରହୁଛନ୍ତି । କିନ୍ତୁ ତାଙ୍କ ପରିବାର ସେମାନଙ୍କୁ ଜୀବନରେ ମାରିଦେବାକୁ ଚାହୁଁଛନ୍ତି । ସେମାନେ ଧମକ ମଧ୍ୟ ଦେଉଛନ୍ତି ।

ପୁଲିସର ଭୂମିକା ପରେ ପ୍ରଶ୍ନ ଉଠାଇ କୋର୍ଟ କହିଛନ୍ତି ଯେ ଦୁଇ ସାବାଳକଙ୍କୁ ସୁରକ୍ଷା ସୁନିଶ୍ଚିତ କରିବା ପୁଲିସର ଦାୟିତ୍ୱ । ଦମ୍ପତିଙ୍କୁ ସୁରକ୍ଷା ଯୋଗାଇଦେବା ଶାହଜାହାନପୁର ଏସ୍ପିଙ୍କ ବ୍ୟକ୍ତିଗତ ଦାୟିତ୍ୱ ବୋଲି କୋର୍ଟ କହିଛନ୍ତି । ଯୁବତୀଙ୍କ ମା ଗତ ଜାନୁଆରୀ ୮ରେ ଥାନାରେ ଅଭିଯୋଗ କରିଥିଲେ ଯେ ନେତ୍ରପାଲ ନାମକ ଜଣେ ପୁରୁଷ ଜଣକ ତାଙ୍କ ଝିଅକୁ ଭୁଲାଇ ନେଇଯାଇଛନ୍ତି । ଏଥିରେ କ୍ଷେତ୍ରପାଲ ନାମକ ଅନ୍ୟ ଜଣେ ବ୍ୟକ୍ତି ସହଯୋଗ କରିଛନ୍ତି । ତେଣୁ ଉଭୟଙ୍କ ବିରୋଧରେ ବିଏନ୍‌ଏସ୍‌ର ଧାରା ୮୭ ଅନୁସାରେ ଥାନାରେ ଏଫଆଇଆର ରୁଜୁ ହୋଇଥିଲା । ତେବେ ନେତ୍ରପାଲ ଓ ଯୁବତୀ ଜଣକ ଏହା ବିରୋଧରେ ହାଇକୋର୍ଟ ଯାଇଥିଲେ ।