May 6, 2026
ମୁଖ୍ୟ ଖବର
ଭୁବନେଶ୍ୱର : ଭୁବନେଶ୍ୱରରେ ମଦ ଦୋକାନ ବଣ୍ଟନ ପାଇଁ ଲଟେରି ଘୋଷଣା । ୫୦ରୁ ଅଧିକ ଦୋକାନ ପାଇଁ ଆବେଦନ ଆହ୍ୱାନ । ଖୋର୍ଦ୍ଧା ଜିଲ୍ଲା ପ୍ରଶାସନ ତରଫରୁ ଭୁବନେଶ୍ୱର ଏକ୍ସାଇଜ୍ ଜିଲ୍ଲାରେ ଆଇଏମଏଫଏଲ ଅଫ୍ ଶପ୍ ଏବଂ ଦେଶୀ ମଦ ଦୋକାନ ବଣ୍ଟନ ପାଇଁ ଲଟେରି ପ୍ରଣାଳୀରେ ଆବେଦନ ଆହ୍ୱାନ କରାଯାଇଛି । ୨୦୨୬-୨୭ ଆର୍ଥିକ ବର୍ଷ ପାଇଁ ନିର୍ଦ୍ଧାରିତ ହୋଇଥିବା ବେଳେ ଆଗ୍ରହୀ ଆବେଦକମାନେ ଅନଲାଇନ୍ ମାଧ୍ୟମରେ ଆବେଦନ କରିପାରିବେ । ଜିଲ୍ଲା ପ୍ରଶାସନଙ୍କ ପକ୍ଷରୁ ଜାରି ବିଜ୍ଞପ୍ତି ଅନୁଯାୟୀ, ଲଟେରି ପ୍ରକ୍ରିୟା ୨୬ ମେ ୨୦୨୬ ରେ ସକାଳ ୭ଟାରୁ ଖୋର୍ଦ୍ଧାର ଡିଆରଡିଏ କନ୍ଫରେନ୍ସ ହଲରେ ଆୟୋଜିତ ହେବ । ଆବେଦନ ଦାଖଲ କରିବାର ଶେଷ ତାରିଖ ୧୮ ମେ ସନ୍ଧ୍ୟା ୫ଟା ପର୍ୟ୍ୟନ୍ତ ନିର୍ଦ୍ଧାରିତ ହୋଇଛି ।
ଏହି ଲଟେରି ମାଧ୍ୟମରେ ଭୁବନେଶ୍ୱର ସହରର ବିଭିନ୍ନ ଅଞ୍ଚଳରେ ପ୍ରାୟ ୫୦ଟି ମଦ ଦୋକାନ ବଣ୍ଟନ କରାଯିବ। ନୟାପଲ୍ଲୀ, ସାହିଦ ନଗର, ଚନ୍ଦ୍ରଶେଖରପୁର, ପାତ୍ରପଡ଼ା, ରସୁଲଗଡ଼, ଖଣ୍ଡଗିରି ଓ ଲିଙ୍ଗରାଜ ଅଞ୍ଚଳ ଭଳି ମୁଖ୍ୟ ସ୍ଥାନଗୁଡ଼ିକରେ ଦୋକାନ ରହିବା ନିର୍ଦ୍ଧାରିତ ହୋଇଛି। ପ୍ରତ୍ୟେକ ଦୋକାନ ପାଇଁ ମାସିକ ନ୍ୟୁନତମ ଗ୍ୟାରାଣ୍ଟି ଏକ୍ସାଇଜ୍ ରେଭେନ୍ୟୁ ବା ଏମଜିଇଆର ସରକାରଙ୍କ ଦ୍ୱାରା ନିର୍ଣ୍ଣୟ ହେବ। ଆବେଦନ ପାଇଁ ଆଇଏମଏଫଏଲ ଅଫ୍ ଦୋକାନ ପାଇଁ ୩ ଲକ୍ଷ ଟଙ୍କା ଓ ଦେଶୀ ମଦ ଦୋକାନ ପାଇଁ ୨ ଲକ୍ଷ ଟଙ୍କା ଶୁଳ୍କ ନିର୍ଦ୍ଧାରିତ ହୋଇଛି । ଆବେଦକଙ୍କୁ ଆଧାର/ଭୋଟର କାର୍ଡ, ପାନ୍ କାର୍ଡ, ଫଟୋ ଓ ଅନ୍ୟାନ୍ୟ ଆବଶ୍ୟକ ଦଲିଲ ଦାଖଲ କରିବାକୁ ପଡ଼ିବ ।
ଏହା ସହିତ, ୨୧ ବର୍ଷରୁ କମ୍ ବୟସ୍କ ବ୍ୟକ୍ତିଙ୍କୁ ଲାଇସେନ୍ସ ଦିଆଯିବ ନାହିଁ ଓ ଗତ ୫ ବର୍ଷ ମଧ୍ୟରେ ଏକ୍ସାଇଜ୍ ନିୟମ ଉଲ୍ଲଂଘନ କରିଥିବା ବ୍ୟକ୍ତିମାନେ ଅଯୋଗ୍ୟ ହେବେ । ଏହା ସହ ଲାଇସେନ୍ସଧାରୀଙ୍କୁ ନିର୍ଦ୍ଧାରିତ ସ୍ଥାନରେ ୧୫ ଦିନ ମଧ୍ୟରେ ଦୋକାନ ଖୋଲିବାକୁ ପଡ଼ିବ । ଲଟେରି ପ୍ରକ୍ରିୟା ପୂର୍ଣ୍ଣ ପାରଦର୍ଶୀ ଭାବେ ଆବେଦକମାନଙ୍କ ଉପସ୍ଥିତିରେ କରାଯିବ ବୋଲି ଜିଲ୍ଲା ପ୍ରଶାସନ ପକ୍ଷରୁ କୁହାଯାଇଛି । ଅନ୍ତିମ ଚୟନ ପରେ ଜିତୁଥିବା ଆବେଦକଙ୍କୁ ଜମା ରାଶି ଓ ଆବଶ୍ୟକ ଦଲିଲ ଦାଖଲ ପରେ ଲାଇସେନ୍ସ ଦିଆଯିବ ।
Comments ସମସ୍ତ ମତାମତ