Tags : lightening

ବରଗଡ: ସୋହେଲା ବ୍ଲକ ଅନ୍ତର୍ଗତ କୁସୁର୍ଡାରେ ବଜ୍ରାଘାତରେ ଦୁଇ ମହିଳା ମୃତ। ଗୁରୁବାର ଅପରାହ୍ନ 4ଟା ବେଳେ ସୋହେଲା ନିକଟସ୍ଥ ପାଣିମୋରା ପଞ୍ଚାୟତର କୁସୁର୍ଡା ଗ୍ରାମରେ ବଜ୍ରାଘାତରେ ଦୁଇ ମହିଳାଙ୍କ ମୃତ୍ୟୁ ଘଟିଥିବା ସୂଚନା ମିଳିଛି । ମୃତକମାନେ ହେଲେ କଟାପାଲି ଗ୍ରାମର 45 ବର୍ଷୀୟା ଜାହ୍ନବୀ ପଧାନ ଓ 32 ବର୍ଷୀୟ ରିତା ପଧାନ । ଉଭୟ ମହିଳା ସମ୍ପର୍କୀୟ ହୋଇଥିବା ବେଳେ ବଜ୍ରାଘାତରେ ଏକା ସାଙ୍ଗରେ ଚାଲି ଯାଇଛି ଉଭୟଙ୍କ ଜୀବନ ।
ସୂଚନା ଅନୁଯାୟୀ, ଉଭୟ ମହିଳା ଚାଷ କାମ ପାଇଁ କୁସୁର୍ଡା ଗ୍ରାମକୁ ଆସିଥିଲେ । ତେବେ ଚାଷଜମିରେ କାମ କରୁଥିବା ସମୟରେ ସେମାନେ ଏକ ଗଛ ତଳେ ବସି ବିଶ୍ରାମ କରୁଥିଲେ । ଏହି ସମୟରେ ହଠାତ ବଜ୍ରପାତ ହୋଇଥିଲା ଏବଂ ବଜ୍ରାଘାତର ଶିକାର ହୋଇ ଘଟଣାସ୍ଥଳରେ ହିଁ ଉଭୟଙ୍କ ମୃତ୍ୟୁ ଘଟିଥିଲା । ତେବେ ଗଛ ତଳେ ଦୀର୍ଘ ସମୟ ଧରି ଦୁଇଜଣ ଯାକ ପଡିରହିଥିବା କିଛି ଲୋକେ ଦେଖି ପରିବାର ଲୋକଙ୍କୁ ଖବର ଦେଇଥିଲେ । ଘଟଣାସ୍ଥଳରେ ଗ୍ରାମବାସୀ ପହଁଛି ଉଭୟ ମହିଳାଙ୍କୁ ଉଦ୍ଧାର କରି ସୋହେଲା ସରକାରୀ ଡାକ୍ତରଖାନାକୁ ନେଇଥିଲେ । ସେଠାରେ ଡାକ୍ତର ଉଭୟଙ୍କୁ ମୃତ ଘୋଷଣା କରିଥିଲେ । ଉଭୟ ମହିଳାଙ୍କ ମୃତ୍ୟୁ ଖବର ପ୍ରଚାରିତ ହେବା ପରେ ଗ୍ରାମରେ ଶୋକର ଛାୟା ଖେଳିଯାଇଥିଲା ।

ବଜ୍ରାଘାତରେ ମୃତ୍ୟୁ ହୋଇଥିବା ଖବର ପାଇ ଯୁବ ନେତା ସୁବ୍ରତ ସିଂ ସୋହେଲା ହସ୍ପିଟାଲ ଯାଇ ସମବେଦନା ଜଣାଇଥିବା ବେଳେ ସରକାରୀ ସହାୟତା ଯୋଗାଇ ଦେବା ପାଇଁ ପ୍ରଶାସନ ଠାରେ ଦାବି କରିଛନ୍ତି ।