ନୂଆଦିଲ୍ଲୀ : ରାଷ୍ଟ୍ରୀୟ ଜନତା ଦଳ ଛାଡ଼ିବେ ଲାଲୁ ଯାଦବଙ୍କ ବଡ଼ ପୁଅ । ଏନେଇ ସେ ଟ୍ୱିଟ କରିଛନ୍ତି । ଲାଲୁ ଯାଦବଙ୍କୁ ଭେଟି ସେ ଦଳର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେବେବୋଲି ତେଜପ୍ରତାପ ଯାଦବ ଘୋଷଣା କରିଛନ୍ତି । ଅପରପକ୍ଷରେ ଏନେଇ ପରୋକ୍ଷରେ ବର୍ଷିଛନ୍ତି ତେଜସ୍ୱୀ ଯାଦବ । ଜଣେ ଯଦି କାବୁରେ ନରହିବ ତେବେ କ’ଣ କରିପାରିବା ବୋଲି ସେ ପ୍ରଶ୍ନ କରିଛନ୍ତି । ଯାହାକୁ ନେଇ ବିହାର ରାଜନୀତି ସରଗରମ ହୋଇଯାଇଛି ।
ସ୍ୱାସ୍ଥ୍ୟଗତ କାରଣରୁ ଜାମିନ ପାଇବା ପରେ ଘରକୁ ଫେରିଛନ୍ତି ଲାଲୁ । ତେବେ ଇଫତାର ପାର୍ଟି ଅବସରରେ ତେଜପ୍ରତାପଙ୍କ ବିରୋଧରେ ଆରଜେଡ଼ିର ଜଣେ ଯୁବ ନେତା ସଂଗୀନ ଅଭିଯୋଗ ଆଣିଥିଲେ । ତେଜ ପ୍ରତାପ ତାଙ୍କୁ ଗୋଟିଏ ଘର ପୂରାଇ ପିଟିବା ସହ ଲାଲୁ ଓ ତେଜସ୍ୱୀଙ୍କ ବିରୋଧରେ ଅପଶବ୍ଦ ପ୍ରୟୋଗ କରିଥିଲେ ।
ଜଣେ ଯୁବ ନେତାଙ୍କ ଏତାଦୃଶ ବ୍ୟବହାର ଲାଲୁଙ୍କ ବଡ଼ପୁଅକୁ ଖୁବ ବାଧିଥିବାବେଳେ ତେଜସ୍ୱୀ ମଧ୍ୟ ଏକଥା ଜାଣିଛନ୍ତି । ତେବେ କିଛି କାର୍ଯ୍ୟାନୁଷ୍ଠାନ ନିଆ ଯାଇନଥିବାରୁ ତେଜପ୍ରତାପ ଏଭଳି ନିଷ୍ପତ୍ତି ନେଇଥିବା କୁହାଯାଉଛି । ଅପରପକ୍ଷରେ ତେଜପ୍ରତାପଙ୍କର କୌଣସି ବରିଷ୍ଠ ନେତାଙ୍କ ସହ ଭଲ ସମ୍ପର୍କ ନାହିଁ । ତାଙ୍କୁ ନେଇ ଦଳର ବହୁ ନେତା ଅତୀତରେ ଅସନ୍ତୋଷ ପ୍ରକାଶ କରିସାରିଛନ୍ତି । ତେଣୁ ତେଜପ୍ରତାପ ଆରଜେଡ଼ି ଛାଡ଼ିଲେ ବି ତାଙ୍କୁ ରହିବାକୁ କେହି ବାଧ୍ୟ କରିବେ ନାହିଁ ବୋଲି ଆରଜେଡ଼ିର ଜଣେ ବରିଷ୍ଠ ନେତା ମତପ୍ରକାଶ କରିଛନ୍ତି ।
Comments ସମସ୍ତ ମତାମତ