Tags : kharbela swain odisha bjp leader

ଧର୍ମେନ୍ଦ୍ର ପ୍ରଥମେ ବିଜେପିର ରାଜ୍ୟ ସଭାପତି ହୁଅନ୍ତୁ
ନବୀନଙ୍କ ବିରୋଧରେ ନକହିବା ପାଇଁ କେନ୍ଦ୍ରୀୟ ନେତାମାନେ କହିଥିଲେ
ଏବେ ଆରଏସଏସରେ ମୋର ବିରୋଧୀ ନାହାନ୍ତି
ଗୌତମ ଆଦାନୀଙ୍କ ପାଇଁ ମୁଁ ୨୦୧୪ରେ ବିଜେପିକୁ ଯାଇପାରିନଥିଲି 

ଭୁବନେଶ୍ୱର : ବରିଷ୍ଠ ବିଜେପି ନେତା ତଥା ପୂର୍ବତନ ସାଂସଦ ମହାମେଘବାହାନ ଐର ଖାରବେଳ ସ୍ୱାଇଁ ରାଜ୍ୟ ରାଜନୀତି ସମ୍ପର୍କରେ ବିସ୍ଫୋରକ ମନ୍ତବ୍ୟ ଦେଇଛନ୍ତି  । ଏକ ସାକ୍ଷାତକାରରେ ଖାରବେଳ ଯାହା କହିଛନ୍ତି ତାହା ବିଜେପି ଶିବିରକୁ ଆଲୋଡ଼ିତ କରିଛି  । ସେହିପରି ବିଜେଡ଼ି ସୁପ୍ରିମୋ ନବୀନ ପଟ୍ଟନାୟକଙ୍କ ସହ ଲଢ଼ିବା ପାଇଁ ବିଜେପିରେ ନେତା ନାହାନ୍ତି  । ନବୀନ ବିଜେପିର ଶ୍ରେଷ୍ଠ ବନ୍ଧୁ ଥିବାରୁ ତାଙ୍କ ବିରୋଧରେ କିଛି ନକହିବା ପାଇଁ କେନ୍ଦ୍ରୀୟ ନେତାମାନେ କହିଥିଲେ  । ଆଡ଼ଭାନୀଙ୍କୁ ପୂର୍ବରୁ ବିଜେପି ନେତାମାନେ ବିଜେଡ଼ିର ଷ୍ଟ୍ରାଟେଜି ସମ୍ପର୍କରେ ଜଣାଇଥିଲେବି ନବୀନଙ୍କ ବିରୋଧରେ ନଲାଗିବାକୁ ପରାମର୍ଶ ଦିଆଯାଇଥିଲା ବୋଲି ସେ କହିଛନ୍ତି  । ବରିଷ୍ଠ ସାମ୍ବାଦିକ ସନ୍ଦୀପ ମିଶ୍ରଙ୍କ ସହ ‘ଜବାବ ସୁଆଲ’ ସାକ୍ଷାତକାର ଅବସରରେ ଖାରବେଳ ଏହା କହିଛନ୍ତି  ।

ଏକ ସାକ୍ଷାତକାରରେ ଖାରବେଳ ସ୍ୱାଇଁ କହିଛନ୍ତିଯେ, ନବୀନ ପଟ୍ଟନାୟକ ବାହା ହୋଇନାହାନ୍ତି  । ସେ ନିଜ ପାଇଁ କିଛି କରିନାହାନ୍ତି  । ତେଣୁୁ ଲୋକଙ୍କର ଧାରଣା ରହିଛି ନବୀନ ବାବୁ ଭଲ ଲୋକ  । ସେ ଭଲ କାମ କରୁଛନ୍ତି ବୋଲି ଲୋକେ ଭାବୁଛନ୍ତି  । ସେହିପରି ବିଜେଡ଼ିକୁ ବିଜେପି ହିଁ ଗଢ଼ିବା ସହ ମଜବୁତ କରିଥିଲା  । ଅନେକ ବିଜେଡ଼ି ନେତାଙ୍କ ପାଇଁ ବାଜପେୟୀ ନିଜେ ଯାଇ ପ୍ରଚାର କରିଥିଲେ  । ନବୀନ ବାବୁ ଜଣେ ବହୁ ଚତୁର ଓ ସୁବିଧାବାଦୀ ନେତା  । ଆମେ ବିଜେପିକୁ ଦୃଢ଼ କରିବାକୁ ଚିନ୍ତା କଲୁନାହିଁ  । ୨୦୦୯ ପରଠାରୁ ଆମେ ନିଷ୍ପତ୍ତି ନେଇପାରିନାହୁଁ  । ତେବେ ୨୦୨୪ରେ ବିଜେପି ରାଜ୍ୟରେ ଏକାକୀ ସରକାର ଗଢ଼ିବ ବୋଲି ଶ୍ରୀ ସ୍ୱାଇଁ ବାହାସ୍ଫୋଟ ମାରିବାକୁ ପଛାଇନାହାନ୍ତି  ।

ସେ କହିଲେଯେ, ବିଜେପି ଓଡ଼ିଶାରେ ନଜିତିଲେ ଚଳିବ ବୋଲି କେନ୍ଦ୍ରୀୟ ନେତାମାନେ ଭାବୁଥିଲେ  । କିନ୍ତୁ ଏବେ ଓଡ଼ିଶାରେ ସରକାର ଗଢ଼ିବାର ଆବଶ୍ୟକତା ରହିଛି ବୋଲି ରାଷ୍ଟ୍ରୀୟ ବିଜେପି ନେତାମାନେ ଅନୁଭବ କରିଛନ୍ତି  । ଓଡ଼ିଶାରେ କିଏ ବିଜେପିର ନେତୃତ୍ୱ ନେବେ ମାସେ ଦି ମାସ ପରେ ଏନେଇ ସଂକେତ ମିଳିବ  । ଯେପର୍ଯ୍ୟନ୍ତ ନବୀନଙ୍କୁ ମୁକାବିଲା କରିବା ଭଳି ସ୍ଥାନୀୟ ନେତୃତ୍ୱ ନବାହାରିବେ ସେପର୍ଯ୍ୟନ୍ତ ବିଜେପି ଜିତିପାରିବ ନାହିଁ  । ନଚେତ ପଶ୍ଚିମବଙ୍ଗ ଭଳି ଅବସ୍ଥା ଭୋଗିବାକୁ ପଡ଼ିବ  । ଧିରେଧିରେ ବିଜେପିକୁ ଶକ୍ତି ଥିବା ଭଳି ଲୋକମାନେ ଆସିବାକୁ ଆରମ୍ଭ କରିଛନ୍ତି  ।

ମୋ ଉପରେ ଅତ୍ୟାଚାର କରାଗଲା ବୋଲି ମୁଁ ସହ୍ୟ କରିପାରିଲିନି  । ତେଣୁ ବିଜେପି ଛାଡ଼ିବା ପାଇଁ ବାଧ୍ୟ ହୋଇଥିଲି  । ଉତ୍କଳ ଭାରତ ଫେଲ ମାରିଗଲା  । ନବୀନଙ୍କୁ ମୁକାବିଲା କରିବା ଭଳି ଆମର ସାମର୍ଥ୍ୟ ନଥିଲା  । ଏବେ ଆରଏସଏସରେ ମୋର ଆଉ କେହି ବିରୋଧି ନାହାନ୍ତି  । ମୁଁ ୨୦୧୪ରେ ପୁଣି ବିଜେପିକୁ ଫେରିଥା’ନ୍ତି  । କିନ୍ତୁ ନବୀନ ବାବୁ ମୋତେ ସାଂସଦ କରାଇ ନଦେବା ପାଇଁ ଏବେକାର ପୁରୀ ସାଂସଦଙ୍କ ଜରିଆରେ ଗୌତମ ଆଦାନୀଙ୍କ ସହ ଯୋଗାଯୋଗ କଲେ  । ତେଣୁ ମୁଁ ଆଉ ବିଜେପିକୁ ଯାଇପାରିଲି ନାହିଁ  । ସେହିପରି ଧର୍ମେନ୍ଦ୍ର ପ୍ରଧାନ ଯଦି ଓଡ଼ିଶାର ମୁଖ୍ୟମନ୍ତ୍ରୀ ହେବେ ତେବେ ରାଜ୍ୟ ସଭାପତି ହୁଅନ୍ତୁ  । ଅନ୍ୟ ରାଜ୍ୟରେ ବିଜେପି ନେତାମାନେ ରାଜ୍ୟ ସଭାପତି ହୋଇ ମୁଖ୍ୟମନ୍ତ୍ରୀ ହେଉଛନ୍ତି  ।