Jul 12, 2025
ମୁଖ୍ୟ ଖବର
ରାଂଚି : ଝାରଖଣ୍ଡରେ ଓଲଟ ପବନ ବହିଛି । ୨୦୧୯ ସାଧାରଣ ନିର୍ବାଚନରେ ଏନଡ଼ିଏ ଦମଦାର ପ୍ରଦର୍ଶନ କରିଥିବାବେଳେ ମାଟି କାମୁଡ଼ିଥିଲା କଂଗ୍ରେସ-ଜେଏମଏମ ଓ ଆରଜେଡ଼ି ମେଂଟ । କିନ୍ତୁ ୨୦୧୯ ବିଧାନସଭା ନିର୍ବାଚନ କିନ୍ତୁ ବିଜେପିର ସବୁ ଆକଳନକୁ ଓଲଟପାଲଟ କରିଦେଇଛି । ବିଜେପିକୁ ଶକ୍ତ ଧକ୍କା ଲାଗିଛି । ମହାରାଷ୍ଟ୍ର ପରେ ଝାରଖଣ୍ଡ ବି ବିଜେପି ହାତରୁ ଖସିଯାଇଛି । ଗତ ବିଧାନସଭା ନିର୍ବାଚନରେ ବିଜେପି ମେଂଟ ୪୨ ଆସନ ହାତେଇ ନେଇଥିବାବେଳେ ପରବର୍ତୀ ସମୟରେ ଜେଭିଏମର ୬ ବିଧାୟକ ବି ବିଜେପିରେ ସାମିଲ ହୋଇଥିଲେ । ଫଳରେ ୮୧ ଆସନ ବିଶିଷ୍ଟ ଝାରଖଣ୍ଡ ବିଧାନସଭାରେ ବିଜେପି ସୁରୁଖୁରରେ ପାଂଚ ବର୍ଷ ପାର କରିଦେଇଥିଲା । ପ୍ରଥମ ମୁଖ୍ୟମନ୍ତ୍ରୀ ଭାବେ ରଘୁବର ଦାସ ଝାରଖଣ୍ଡରେ ୫ ବର୍ଷ ଧରି ନିରବଚ୍ଛିନ୍ନ ଭାବେ ରାଜ କରିବାରେ ସମର୍ଥ ହୋଇଥିଲେ । ୨୦୧୯ ଲୋକସଭା ନିର୍ବାଚନର ଫଳାଫଳ ବି ଏକପାଖିଆ ଭାବେ ଏନଡ଼ିଏ ସପକ୍ଷରେ ଯାଇଥିଲା । କିନ୍ତୁ ଆଜିର ଭୋଟଗଣତିର ଫଳାଫଳ ବିଜେପିକୁ ଚକିତ କରିଦେଇଛି । ଖୋଦ ମୁଖ୍ୟମନ୍ତ୍ରୀ ରଘୁବର ଦାସ ମଧ୍ୟ ନିଜ ଜାମସେଦପୁର ପୂର୍ବ ନିର୍ବାଚନମଣ୍ଡଳୀରୁ ଜଣେ ସ୍ୱାଧୀନ ପ୍ରାର୍ଥୀଙ୍କ ଠାରୁ ପରାସ୍ତ ହୋଇଛନ୍ତି ।
ମହାରାଷ୍ଟ୍ରରେ ବିଜେପି ସରକାର ଗଢ଼ିବାରୁ ଅଳ୍ପକେ ବଂଚିତ ହେବା ପରେ ଝାରଖଣ୍ଡକୁ ନିଜ କରାୟତରେ ରଖିବାକୁ ଯୋଜନା କରିଥିଲା । ସାଧାରଣ ନିର୍ବାଚନ ପୂର୍ବରୁ ବିଜେପି ହାତରୁ ମଧ୍ୟପ୍ରଦେଶ, ଛତିଶଗଡ଼ ଓ ରାଜସ୍ଥାନ ପଳାଇଥିବାବେଳେ ଝାରଖଣ୍ଡ ନିର୍ବାଚନ ବିଜେପି ପାଇଁ ଅନେକ ମହତ୍ୱ ରଖିଥିଲା । ଯେଉଁଥିପାଇଁ ସମସ୍ତଙ୍କ ନଜର ରହିଥିଲା ଝାରଖଣ୍ଡ ଉପରେ । ତେବେ ସକାଳୁ ସକାଳୁ ଭୋଟ ଗଣତି ଆରମ୍ଭ ହେବା ବେଳଠାରୁ ବିଜେପିର ଅବସ୍ଥା କ’ଣ ହେବ ଜଣାପଡ଼ିଯାଇଥିଲା । କିଛି ସମୟ ପାଇଁ ବିଜେପି ଆଶା ସଂଚାରିତ କରିଥିଲେବି ଗଣତି ଆଗକୁ ବଢ଼ିବା ସହ ବିଜେପିର ପାଦ ଖସିଖସି ଯାଇଥିଲା । ବିଶେଷକରି ରଘୁବର ଦାସ ଗତ ନିର୍ବାଚନରେ ପ୍ରାୟ ୭୦ ହଜାର ଭୋଟ ବ୍ୟବଧାନରେ ବିଜୟୀ ହୋଇଥିଲେ । କିନ୍ତୁ ଚଳିତ ନିର୍ବାଚନରେ ସେ ସ୍ୱାଧୀନ ପ୍ରାର୍ଥୀଙ୍କ ଠାରୁ ପରାସ୍ତ ହୋଇଛନ୍ତି । ଯାହାକି ବିଜେପି ପାଇଁ ଲଜ୍ଜାଜନକ ସ୍ଥିତି ସୃଷ୍ଟି କରିଛି ।
ନିର୍ବାଚନ କମିଶନଙ୍କ ତଥ୍ୟ ଅନୁଯାୟୀ, ବିଜେପି ୪ ଆସନରେ ବିଜୟୀ ହୋଇଥିବାବେଳେ ୨୧ ଆସନରେ ଆଗୁଆ ରହିଛି । ବହୁମତ ପାଇଁ ୪୧ ଆସନ ଆବଶ୍ୟକ ଥିବାବେଳେ ବିଜେପି ଢେ଼ର ପଛରେ ପଡ଼ିଯାଇଛି । ଏମିତିକି ରାତିଅଧିଆ ମିଶନ ପାଇଁ ବି ଅବସର ସୃଷ୍ଟି ହୋଇନାହିଁ । ଅପରପକ୍ଷରେ କଂଗ୍ରେସ, ଜେଏମଏମ ଓ ଆରଜେଡ଼ି ମେଂଟ ଦମଦାର ପ୍ରଦର୍ଶନ କରିଛନ୍ତି । କଂଗ୍ରେସ ୩ ଆସନରେ ବିଜୟୀ ହୋଇଥିବାବେଳେ ୧୨ ଆସନରେ ଆଗୁଆ ରହିଛି । ସେହିପରି ଝାରଖଣ୍ଡ ମୁକ୍ତିମୋର୍ଚ୍ଚା ୪ ଆସନରେ ବିଜୟ ଲାଭ କରିଥିବାବେଳେ ୨୬ ଆସନରେ ଅଗ୍ରଣୀ ରହିଛି । ଅପରପକ୍ଷରେ ଗୋଟିଏ ଆସନରେ ଆଗୁଆ ରହିଛି ରାଷ୍ଟ୍ରୀୟ ଜନତା ଦଳ । ନାସନାଲ କଂଗ୍ରେସ ପାର୍ଟି ବି ଗୋଟିଏ ଆସନରେ ଆଗୁଆ ରହିଛି । ଫଳରେ ଉପା ମେଂଟର ପଲା ଢେ଼ର ଭାରି ରହିଛି । ଏହାଛଡ଼ା ସିପିଆଇଏମଏଲ ଗୋଟିଏ ଆସନରେ ଅଗ୍ରଣୀ ଥିବାବେଳେ ସ୍ୱାଧୀନ ପ୍ରାର୍ଥୀ ୨ଟି ଆସନରେ ଆଗୁଆ ଅଛନ୍ତି । ବିଗତ ଦିନରେ ବିଜେପି ସହ ମେଂଟରେ ଥିବା ଏଜେଏସୟୂ ପାର୍ଟି ଏକାକୀ ଲଢ଼ି ୩ ଆସନରେ ଜିତିବାର ସମ୍ଭାବନା ସୃଷ୍ଟି କରିଛନ୍ତି ।
Comments ସମସ୍ତ ମତାମତ