Tags : jail

ବ୍ରହ୍ମପୁର: ଗଞ୍ଜାମ ଜିଲା ଅତିରିକ୍ତ ଦୌରା ଜଜ-୩ ବିବଶ୍ବତ ଗୌତମ ଗୁରୁବାର ଏକ ହତ୍ୟା ମାମଲାର ଶୁଣାଣି କରି ଚୂଡାନ୍ତ ରାୟ ପ୍ରକାଶ କରିଛନ୍ତି। ମାମଲାର ଅଭିଯୁକ୍ତ ଥିବା ଦୁଇ ଭାଇଙ୍କୁ ଦୋଷୀ ସାବ୍ୟସ୍ତ କରିବା ସହ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି। ଅଭିଯୁକ୍ତ ଦୁଇ ଭାଇ ହେଲେ ଦିଗପହଣ୍ଡି ଥାନା ଅର୍ନ୍ତଗତ ବନ୍ଥପଲ୍ଲୀର କଙ୍ଗାରୁ ଭୂୟାଁ (୫୪) ଏବଂ ସାନ ଭାଇ କାଳିଅ ଓରଫ ସୁଶାନ୍ତ ଭୂୟାଁ(୨୪)। ଏଥିସହ ପ୍ରତ୍ୟେକଙ୍କୁ ୫ ହଜାର ଟଙ୍କା ଲେଖାଏ ଜରିମାନା ଦେବାକୁ ବିଚାରପତି ରାୟରେ ଉଲ୍ଲେଖ କରିଛନ୍ତି।ଘଟଣାରୁ ପ୍ରକାଶ ଯେ, ୨୦୨୦ ଅକ୍ଟୋବର ୨୪ରେ ଗ୍ରାମରେ ଚାଲିଥିବା ଏକ ଜୁଆ ଖେଳରେ ଦୁଇ ଗୋଷ୍ଠୀ ମଧ୍ୟରେ ବଚସା ହୋଇଥିଲା। ଏଥିରେ ଗୋଟିଏ ଗୋଷ୍ଠୀର କଙ୍ଗାରୁ ଓ କାଳିଆ ମାରଣାସ୍ତ୍ର ଧରି ବଚ୍ଚନଙ୍କୁ ମାରିବାକୁ ଗୋଡାଇଥିଲେ। ହେଲେ ବଚ୍ଚନ ସେଠାରୁ ଦୌଡି ପଳାଇବାକୁ ଚେଷ୍ଟା କରିଥିଲେ। ସେତିକିବେଳେ କଙ୍ଗାରୁ ଏକ ଠେଙ୍ଗାରେ ବଚ୍ଚନଙ୍କୁ ଆକ୍ରମଣ କରିଥିଲେ।

ଫଳରେ ବଚ୍ଚନ ତଳେ ପଡି ଯାଇଥିଲେ। ସେତିକିବେଳେ କାଳିଆ ଏକ ଛୁରୀରେ ବଚ୍ଚନଙ୍କ ପେଟକୁ ଭୁସି ହତ୍ୟା କରିଥିଲେ। ଖବର ପାଇ ଘରେ ଥିବା ବଚ୍ଚନଙ୍କ ଭଉଣୀ ଲକ୍ଷ୍ମୀ ସ୍ବାଇଁ ଘଟଣା ସ୍ଥଳରେ ପହଞ୍ଚିଥିଲେ। ସେଠାରେ ଦୁର୍ବତ୍ତମାନେ ତାଙ୍କୁ ଗାଳିଗୁଳଜ କରିବା ସହ ହତ୍ୟାର ଧମକ ଦେଇଥିଲେ। ଭଉଣୀଙ୍କ ଅଭିଯୋଗ କ୍ରମେ ଦିଗପହଣ୍ଡି ଥାନା ପୋଲିସ ଏକ ହତ୍ୟା ମାମଲା(ନଂ.୨୫୦/୨୦) ରୁଜୁ କରି ଉପରୋକ୍ତ ଦୁଇ ଭାଇଙ୍କୁ ଗିରଫ କରି କୋଟ ଚାର୍ଲାଣ କରିଥିଲା। ସେତିକିବେଳେ ପୋଲିସ ହତ୍ୟାରେ ବ୍ୟବହୃତ ଠେଙ୍ଗା ଓ ଛୁରୀକୁ ଜବତ କରିଥିଲା।

ତତ୍କାଳୀନ ଥାନା ଅଧିକାରୀ ତଥା ତଦନ୍ତକାରୀ ଅଧିକାରୀ ବସନ୍ତ ସେଠୀ ଉଭୟଙ୍କୁ ଦୋଷୀ ଦର୍ଶାଇ କୋର୍ଟରେ ଚାର୍ଜସିଟ ଦାଖଲ କରିଥିଲେ। ମାମଲାର ବିଚାରଣା ବେଳେ ୧୮ଜଣ ସାକ୍ଷୀଙ୍କ ବୟାନ ରେକର୍ଡ କରାଯାଇଥିଲା। ମାମଲାର ୫ଜଣ ପ୍ରତ୍ୟେକ୍ଷଦର୍ଶୀଙ୍କ ବୟାନ ଆଧାରରେ ଉପଯୁକ୍ତ ସାକ୍ଷ୍ୟ ଓ ପ୍ରମାଣକୁ ଭିତ୍ତି କରି ବିଚାପତି ରାୟ ପ୍ରକାଶ କରିଛନ୍ତି। ସରକାରଙ୍କ ପକ୍ଷରୁ ଅତିରିକ୍ତ ପିପି ପ୍ରଭାତ କୁମାର ଜେନା ମାମଲା ପରିଚାଳନା କରିଥିଲେ।