Tags : income tax

ନୂଆଦିଲ୍ଲୀ: ନୂଆ ଆର୍ଥିକ ବର୍ଷ ସହ ଏପ୍ରିଲ ୧ରୁ ସାରା ଦେଶରେ କାର୍ଯ୍ୟକାରୀ ହେଉଛି ନୂଆ ଆୟକର ଆଇନ । ଏହା ୬ ଦଶନ୍ଧି ପୁରୁଣା ପ୍ରତ୍ୟକ୍ଷ ଟିକସ ଆଇନକୁ ବାଦ ଦେବ । ଅନୁପାଳନ ବ୍ୟବସ୍ଥା, ଶବ୍ଦ ଏବଂ ଟିକସ କ୍ଷେତ୍ରରେ ବିଭିନ୍ନ ପରିବର୍ତ୍ତନ ଦେଖିବାକୁ ମିଳିବ । ଏଥିରେ ଆର୍ôଥକ ବର୍ଷ ଏବଂ ଆସେସ୍ମେଣ୍ଟ ବର୍ଷ ପରିବର୍ତ୍ତେ ଟିକସ ବର୍ଷ ଭଳି ନୂଆ ସଂସ୍କାର କାର୍ଯ୍ୟକାରୀ ହେଉଛି । ଆୟକର ଫାଇଲିଂକୁ ସରଳୀକରଣ କରିବା ଏବଂ ଟିକସଦାତାଙ୍କ ବୁଝିବା ଭଳି ଶବ୍ଦ ଗୁଡ଼ିକୁ ପ୍ରାଥମିକତା ଦିଆଯାଇଛି । ଏହାବାଦ ଆୟକର ରିଟର୍ଣ୍ଣ ଫାଇଲ କରିବା ସମୟ ସୀମାରେ ମଧ୍ୟ ପରିବର୍ତ୍ତନ କରାଯାଇଛି ।
ବେତନଭୋଗୀ କର୍ମଚାରୀଙ୍କ ଲାଗି ଏହି ଅବଧି ଜୁଲାଇ ୩୧ ଅପରିବର୍ତ୍ତିତ ରହିଛି । ଅଡିଟ୍ ଆବଶ୍ୟକତା ନ ଥିବା କ୍ଷେତ୍ରରେ ସ୍ୱରୋଜଗାର ଟିକସଦାତା ପ୍ରଫେଶନାଲଙ୍କ ପାଇଁ ଏହା ଅଗଷ୍ଟ ୩୧ ରହିଛି । ଫ୍ୟୁଚର ଏବଂ ଅପ୍ସନ କ୍ଷେତ୍ରରେ ପ୍ରତିଭୂତି ବିନିମୟ ଟିକସ (ଏସ୍ଏସ୍ଟି) ବୃଦ୍ଧି ହୋଇଥିବାରୁ ଡେରିଭେଟିଭ ଟ୍ରେଡିଂ ମହଙ୍ଗା ହେବ । ସେହିଭଳି ଘରଭଡା ଭତ୍ତା (ଏଚ୍ଆର୍ଏ) ନିୟମକୁ କଡାକଡି କରାଯାଇଛି । ଏଥିଲାଗି ଘର ମାଲିକଙ୍କ ସମ୍ପର୍କରେ ତଥ୍ୟ, ପାନ୍ ତଥ୍ୟ ପ୍ରଦାନ କରିବାକୁ ହେବ । ଉଚ୍ଚ ଏଚ୍ଆର୍ଏ ଛାଡ କ୍ଷେତ୍ରରେ ସହର ଗୁଡ଼ିକର ଯୋଗ୍ୟତା ନିୟମକୁ ମଧ୍ୟ ବ୍ୟାପକ କରାଯାଇଛି ।
ବେଙ୍ଗାଲୁରୁ, ହାଇଦ୍ରାବାଦ, ପୁନେ ଏବଂ ଅହମ୍ମଦାବାଦ ଭଳି ସହର ଗୁଡ଼ିକ ବର୍ତ୍ତମାନ ଏଥିରେ ଯୋଡ଼ି ହୋଇଛନ୍ତି । ସେହିଭଳି କର୍ମଚାରୀଙ୍କ ସମ୍ପର୍କିତ ଟିକସ ସୁବିଧାକୁ ମଧ୍ୟ ସମ୍ପ୍ରସାରଣ କରାଯାଇଛି । ମିଲ୍ ବେନିଫିଟ୍ କୋହଳ ଏବଂ ଟିକସମୁକ୍ତ ଉପହାର ସୀମା ବଢ଼ିଛି । ଷ୍ଟକ୍ ବାଏବ୍ୟାକ ଉପରେ ଏବେ ଟିକସ ଲାଗିବ । ବିଭିନ୍ନ ଉତ୍ସରୁ ଆୟ ଉପରେ ଟିଡିଏସ୍ କ୍ଷେତ୍ରରେ ଏକକ ଡିକ୍ଲାରେସନ କରିବେ ଟିକସଦାତା । ଏନ୍ଆର୍ଆଇଙ୍କଠାରୁ ସମ୍ପତ୍ତି କ୍ରୟ ଉପରେ ପାନ୍ ଜରିଆରେ ଟିଡିଏସ୍ ଡିଡକ୍ସନ କରିପାରିବେ । ବିଦେଶ ଗସ୍ତ ଉପରେ ଟିସିଏସ୍ ୨% ଥିବାରୁ ବିଦେଶୀ ଖର୍ଚ୍ଚ କ୍ଷେତ୍ରରେ ଆଶ୍ୱସ୍ତି ମିଳିବ ।

ଶିକ୍ଷା ଓ ଡାକ୍ତରୀ ଖର୍ଚ୍ଚ ଲାଗି ଦିଦେଶକୁ ଅର୍ଥ ପଠାଇଲେ ଟିସିଏସ୍ ମଧ୍ୟ କମ୍ ରହିବ । ପରିବର୍ତ୍ତିତ ରିଟର୍ଣ୍ଣ ସୀମା ମାର୍ଚ୍ଚ ୩୧କୁ ବୃଦ୍ଧି କରାଯାଇଛି । ମାତ୍ର ଡିସେମ୍ବର ପରେ ଆବେଦନ କଲେ ଅତିରିକ୍ତ ଦେୟ ଲାଗିବ । ଆସେସମେଣ୍ଟ ବର୍ଷ ୨୦୨୬-୨୭ ଲାଗି ଆୟକର ରିଟର୍ଣ୍ଣ ଫର୍ମ ୧ ଓ ୭ ଜାରି ହୋଇଛି । ଧାର୍ଯ୍ୟ ସମୟ ଅବଧି ମଧ୍ୟରେ ଏହାକୁ ଫାଇଲ କରିବେ ଟିକସଦାତା । ନୂଆ ଆଇଟିଆର୍-୧ (ସହଜ) ଦ୍ୱାରା ରିଟର୍ଣ୍ଣ ଫାଇଲ ଆହୁରି ସରଳ ହେବ ବୋଲି କହିଛନ୍ତି ବିଶେଷଜ୍ଞ ।