Jun 30, 2026
ମୁଖ୍ୟ ଖବର
ଲଣ୍ଡନ : ଏଫ୍ଆଇଏଚ୍ ପୁରୁଷ ପ୍ରୋ ଲିଗ୍ ହକି ୨୦୨୫-୨୬ରେ ପାକିସ୍ତାନ ବିପକ୍ଷରେ ଭାରତ ରୋମାଞ୍ଚକର ବିଜୟ ହାସଲ କରିଛି। ମଙ୍ଗଳବାର ଲଣ୍ଡନରେ ଖେଳାଯାଇଥିବା ମ୍ୟାଚରେ ଭାରତ ୪-୩ ଗୋଲରେ ପାକିସ୍ତାନକୁ ପରାସ୍ତ କରିଛି। ଏହି ବିଜୟ ସହ ଭାରତ ୩ ପଏଣ୍ଟ ପାଇଛି। ଟୁର୍ଣ୍ଣାମେଣ୍ଟରେ ଭାରତର ଏହା ତୃତୀୟ ବିଜୟ। ଦୁଇ ପାରମ୍ପରିକ ପ୍ରତିଦ୍ବନ୍ଦ୍ବିଙ୍କ ମଧ୍ୟରେ ଖେଳାଯାଇଥିବା ହାଇପ୍ରୋଫାଇଲ ମ୍ୟାଚ ପ୍ରାରମ୍ଭରୁ େଶଷ ପର୍ଯ୍ୟନ୍ତ ଉତ୍କଣ୍ଠାପୂର୍ଣ୍ଣ ରହିଥିଲା। ପାକିସ୍ତାନ ୮ ମିନିଟ୍ରେ ଗୋଲ ଦେଇ ଅଗ୍ରଣୀ ହାସଲ କରିଥିଲା। ଏକ ପେନାଲ୍ଟି କର୍ଣ୍ଣରକୁ ନଦିମ ଅହମ୍ମଦ ଗୋଲରେ ପରିଣତ କରି ଦଳକୁ ୧-୦ରେ ଆଗୁଆ କରିଥିଲେ। ପ୍ରଥମ କ୍ବାର୍ଟର ସୁଦ୍ଧା ପାକିସ୍ତାନ ୧-୦ ଗୋଲରେ ଅଗ୍ରଣୀ ରହିଥିଲା। ଦ୍ବିତୀୟ କ୍ବାର୍ଟର ତଥା ଖେଳର ୨୨ ମିନିଟ୍ରେ ଭାରତ ଗୋଲ ବରାବର କରି ନେଇଥିଲା। ଭାରତ ପକ୍ଷରୁ ମନପ୍ରୀତ ସିଂହ ଗୋଲ ଦେଇ ମ୍ୟାଚକୁ ୧-୧ ବରାବର କରିଥିଲେ। ୨୪ ମିନିଟ୍ରେ ଭାରତକୁ ଏକ ପେନାଲ୍ଟି କର୍ଣ୍ଣର ମିଳିଥିଲା। ଏହାକୁ ନୀଳକାନ୍ତ ଶର୍ମା ଗୋଲରେ ପରିଣତ କରି ଦଳକୁ ୨-୧ରେ ଆଗୁଆ କରିଥିଲେ।
ପ୍ରଥମାର୍ଦ୍ଧ ସୁଦ୍ଧା ଭାରତ ୨-୧ ଗୋଲରେ ଆଗୁଆ ରହିଥିଲା। ତୃତୀୟ କ୍ବାର୍ଟରରେ ମଧ୍ୟ ଭାରତର ଗୋଲ ଦେବା ଧାରା ଜାରି ରହିଥିଲା। ୪୦ ମନିଟ୍ରେ ଭାରତ ପକ୍ଷରୁ ସୁଖଜିତ ସିଂହ ଗୋଲ ଦେଇ ଦଳକୁ ୩-୧ରେ ଆଗୁଆ କରିଥିଲେ। ତୃତୀୟ କ୍ବାର୍ଟର ସୁଦ୍ଧା ଭାରତ ୩-୧ ଗୋଲରେ ଆଗୁଆ ରହିଥିଲା। ଅନ୍ତିମ କ୍ବାର୍ଟରରେ ଉଭୟ ଦଳ ଗୋଲ ଦେବା ନେଇ ଆକ୍ରମଣ ଓ ପ୍ରତି ଆକ୍ରମଣ କରିଥିଲେ। ୫୨ ମିନିଟ୍ରେ ଭାରତକୁ ଏକ ପେନାଲ୍ଟି କର୍ଣ୍ଣର ମିଳିଥିଲା। ଏହାକୁ ରାଜୀନ୍ଦର ସିଂହ ଗୋଲରେ ପରିଣତ କରି ଦଳକୁ ୪-୧ରେ ଆଗୁଆ କରିଥିଲେ। ୫୩ ମିନିଟ୍ରେ ପାକିସ୍ତାନକୁ ଏକ ପେନାଲ୍ଟି କର୍ଣ୍ଣର ମିଳିଥିଲା। ଏହାକୁ ଅଧିନାୟକ ମହମ୍ମଦ ଆବୁ ଗୋଲେର ପରିଣତ କରି ମ୍ୟାଚକୁ ୨-୪ ସ୍ତରକୁ ଆଣିଥିଲେ। ୬୦ ମିନିଟ୍ରେ ପାକିସ୍ତାନ ପାଇଥିବା ଆଉ ଏକ ପେନାଲ୍ଟି କର୍ଣ୍ଣରକୁ ସକିଲ ମୋଇନ ଗୋଲ ଦେଇ ମ୍ୟାଚକୁ ୩-୪ ସ୍ତରକୁ ଆଣିଥିଲେ ମଧ୍ୟ ଦଳକୁ ପରାଜୟରୁ ରକ୍ଷା କରିପାରିନଥିଲେ। ଦୁଇ ଦଳ ମଧ୍ୟରେ ଦ୍ବିତୀୟ ରାଉଣ୍ଡ ମ୍ୟାଚ ୨୬ରେ ଖେଳାଯିବ। ଭାରତ ୧୩ଟି ମ୍ୟାଚ ଖେଳି ୩ଟି ବିଜୟ, ଗୋଟିଏ ସୁଟ୍ଆଉଟ୍ ବିଜୟ, ଦୁଇଟି ସୁଟ୍ଆଉଟ୍ ପରାଜୟ ଓ ୭ଟି ପରାଜୟ ସହ ୧୩ ପଏଣ୍ଟ ପାଇ ଟେବୁଲର ସପ୍ତମ ସ୍ଥାନରେ ରହିଛି।
Comments ସମସ୍ତ ମତାମତ