Tags : helecaptor crash

ଲଣ୍ଡନ: ଗ୍ରୀସ୍‌ର ସିଫ୍‌ନୋସ୍ ଦ୍ୱୀପରେ ଏକ ହେଲିକପ୍ଟର ଦୁର୍ଘଟଣାଗ୍ରସ୍ତ ହୋଇ ନବବିବାହିତ ବ୍ରିଟିଶ ଦମ୍ପତି ଏବଂ ସେମାନଙ୍କ ଗ୍ରୀକ୍ ପାଇଲଟ୍‌ଙ୍କ ମୃତ୍ୟୁ ଘଟିଛି। ରିପୋର୍ଟ ଅନୁଯାୟୀ ଏହି ଦମ୍ପତି ଆଥେନ୍ସ ନିକଟସ୍ଥ ମାର୍କୋପୋଲୋରୁ ଚାର୍ଟାଡ ହେଲିକପ୍ଟର ଯୋଗେ ସିଫ୍‌ନୋସ୍ ଦ୍ୱୀପକୁ ହନିମୁନ୍ ମନାଇବା ପାଇଁ ଯାଉଥିଲେ। ମୃତ ବ୍ରିଟିଶ ଦମ୍ପତି ହେଉଛନ୍ତି ଆଲେକ୍ସଜାଣ୍ଡାର୍ କ୍ରୋମି (୩୧) ଏବଂ ମ୍ୟାରି ଇବର୍ଟ (୩୦)। ସେହିପରି ୫୩ ବର୍ଷୀୟ ପାଇଲଟ୍ ଜିଓର୍ଗୋସ୍ ରାଇକୋସ୍ ଗ୍ରୀକ୍ ବାୟୁସେନାର ପୂର୍ବତନ ଅଫିସର ଥିଲେ। ଅଗଷ୍ଟ ୧୭ ତାରିଖ (ସୋମବାର) ସନ୍ଧ୍ୟା ପ୍ରାୟ ୬:୧୫ ସମୟରେ, ହେଲିକପ୍ଟରଟି ନିର୍ଦ୍ଧାରିତ ହେଲିପ୍ୟାଡ୍‌ରେ ଅବତରଣ କରିବାର ମାତ୍ର କିଛି ମିନିଟ୍ ପୂର୍ବରୁ ସିଫ୍‌ନୋସ୍‌ର ‘ଥୋଲୋସ୍’ ଅଞ୍ଚଳରେ ଦୁର୍ଘଟଣାଗ୍ରସ୍ତ ହୋଇଥିଲା। ପ୍ରତ୍ୟକ୍ଷଦର୍ଶୀଙ୍କ କହିବା ଅନୁଯାୟୀ, ଅବତରଣ ପୂର୍ବରୁ ହେଲିକପ୍ଟରରୁ ଏକ ଅସାମାନ୍ୟ ଓ ବିଚିତ୍ର ଶବ୍ଦ ଶୁଣାଯାଇଥିଲା। ତେଣୁ ଏଥିରେ ଯାନ୍ତ୍ରିକ ତ୍ରୁଟି ହୋଇଥିବା ସନ୍ଦେହ କରାଯାଉଛି। ଦୁର୍ଘଟଣା ପରେ ହେଲିକପ୍ଟରଟିରେ ନିଆଁ ଲାଗିଯାଇ ସମ୍ପୂର୍ଣ୍ଣ ଜଳିଯାଇଥିଲା।