May 25, 2026
ମୁଖ୍ୟ ଖବର
ନୂଆଦିଲ୍ଲୀ: ଦେଶରେ ଖଇଫୁଟା ତାତି । ଦିନରେ ଘରୁ ବାହାରି ହେଉନି, ରାତିରେ ଅସ୍ତବ୍ୟସ୍ତ କରୁଛି ଗରମ ସାଙ୍ଗକୁ ଗୁଳୁଗୁଳି । ଜନଜୀବନ ଅସ୍ତବ୍ୟସ୍ତ । ସମସ୍ତେ ବିଚଳିତ, ବ୍ୟସ୍ତ ବିବ୍ରତ । ଭାରତରେ ହାରାହାରି ତାପମାତ୍ରା ଗତ ଶତାଦ୍ଦୀରେ ୦.୭ ପ୍ରତିଶତ ବଢିଛି । ତାପମାତ୍ରାରେ ଏହି ବୃଦ୍ଧି ନଗଣ୍ୟ ମନେ ହୋଇଥାଇପାରେ । କିନ୍ତୁ ଆଗାମୀ ଦିନରେ ଏହା ଜୀବନ ଉପରେ ଅତ୍ୟନ୍ତ ଗମ୍ଭୀର ପ୍ରଭାବ ପକାଇବାକୁ ଯାଉଛି । ବିଶେଷଜ୍ଞଙ୍କ ଆକଳନ ଅନୁଯାୟୀ ଭାରତରେ ହିଟ୍ୱେଭ ଚଳିତ ଶତାଦ୍ଦୀ ଶେଷବେଳକୁ ୩୦୦ରୁ ୪୦୦ ପ୍ରତିଶତ ବଢିଯାଇପାରେ ।
ଅନ୍ୟ ଏକ ଚିନ୍ତାର ବିଷୟ ହେଲା ଗରମ ଦିନ ତୁଳନାରେ ଗରମ ରାତି ସଂଖ୍ୟା ଅଧିକ ବଢିଯିବା ଆଶଙ୍କା କରାଯାଉଛି । ପ୍ରତିକୂଳ ସ୍ଥିତିର ମୁକାବିଲା ପାଇଁ ପର୍ଯ୍ୟାପ୍ତ ସୁରକ୍ଷା ବ୍ୟବସ୍ଥାର ଆବଶ୍ୟକତା ରହିଛି । କାରଣ ତାପମାତ୍ରା ବଢିଲେ ଗୁରୁତର ସ୍ୱାସ୍ଥ୍ୟ ସମସ୍ୟା ଦେଖାଦେଇଥାଏ । ଯେପରିକି ଚର୍ମ ଫଳିଯିବା, ମାଂସପେଶୀରେ ଯନ୍ତ୍ରଣା ଓ କ୍ଲାନ୍ତି ଅନୁଭବ କରିବା । ତାପମାତ୍ରା ବୃଦ୍ଧି ପାଇଁ ଅର୍ଥନୀତିକୁ ବହୁ ମୂଲ୍ୟ ଦେବାକୁ ପଡୁଛି । ୨୦୨୪ ମହିସାରେ ଲାନସେଟ୍ ପତ୍ରିକାର ଏକ ତଥ୍ୟ ଅନୁଯାୟୀ, ୧୯୯୦ରୁ ୧୯୯୯ ମଧ୍ୟରେ ତାତି ପାଇଁ ବାର୍ଷିକ ଯେତିକି ଶ୍ରମ ଘଣ୍ଟା ହରାଇବାକୁ ପଡିଥିବା ତାହା ଏବେ ୧୨୪ ପ୍ରତିଶତ ବଢିଯାଇଛି । ଯେଉଁ ଅର୍ଥନୈତିକ କ୍ଷତି ହୋଇଛି ସେଥିରେ କୃଷିର ଭାଗ ପ୍ରାୟ ୬୬ ପ୍ରତିଶତ । ହିଟୱେଭ ବା ଗ୍ରୀଷ୍ମଲହରୀ ସମୟରେ ଶ୍ରମିକଙ୍କ କାର୍ଯ୍ୟଦକ୍ଷତା କମୁଥିବାରୁ ବାର୍ଷିକ ପ୍ରାୟ ୧୯୪ ବିଲିୟନ ଡଲାର ଆୟ ହ୍ରାସ ପାଉଛି ।
୨୦୨୪ରେ ଭାରତରେ ହିଟୱେଭ୍ ଅନୁଭୂତ ହୋଇଥିବା ଦିନ ସଂଖ୍ୟା ୧୯.୮ ରହିଥିଲା । ଯଦି ଜଳବାୟୁରେ ପରିବର୍ତ୍ତନ ହୋଇ ନଥାନ୍ତା ତା ହେଲେ ହିଟୱେଭ୍ ଦିନ ସଂଖ୍ୟା ୬.୬ କମିଯାଇଥାନ୍ତା । ଚଳିତ ଶତାଦ୍ଦୀ ଶେଷବେଳକୁ ଗରମ ଦିନ ସଂଖ୍ୟାରେ ୫୫ ପ୍ରତିଶତ ବୃଦ୍ଧି ହେବ । ଗରମ ରାତି ସଂଖ୍ୟା ୭୦ ପ୍ରତିଶତ ବଢିପାରେ । ତେଣୁ ରାତିରେ ବି ଅସହ୍ୟ ତାତି ଅନୁଭୂତ ହୋଇପାରେ ।ଗରମ ଦିନସଂଖ୍ୟା ଓ ହିଟୱେଭ୍ ବଢୁଥିବାରୁ ଜାତୀୟ ତଥା ରାଜ୍ୟ ବିପର୍ଯ୍ୟୟ ମୁକାବିଲା ପାଣ୍ଠିରୁ କ୍ଷୟକ୍ଷତି ପାଇଁ ସହାୟତା ଦେବାକୁ ବିଭିନ୍ନ ରାଜ୍ୟ ଦାବି କରି ଆସୁଛନ୍ତି । କିନ୍ତୁ ପଞ୍ଚଦଶ ଅର୍ଥ ଆୟୋଗ ଏହି ଦାବିକୁ ଅତୀତରେ ପ୍ରତ୍ୟାଖାନ କରି ଦେଇଥିଲେ । ସଂପ୍ରତି ୧୨ ପ୍ରକାରର ବିପର୍ଯ୍ୟୟ ପାଇଁ ଏହି ପାଣ୍ଠିରୁ ସହାୟତା ଦିଆଯିବାର ବ୍ୟବସ୍ଥା ରହିଛି । ସେଗୁଡିକ ମଧ୍ୟରେ ବାତ୍ୟା, ମରୁଡ଼ି, ଭୂମିକମ୍ପ, ସୁନାମି, କରକାପାତ, ଅଗ୍ନିକାଣ୍ଡ, ଭୂସ୍ଖଳନ, ବରଫସ୍ଖଳନ, ବାଦଲଫଟା ବର୍ଷା, କୀଟ ଆକ୍ରମଣ ଏବଂ ଶୀତଲହର ରହିଛି ।
Comments ସମସ୍ତ ମତାମତ