Apr 27, 2026
ମୁଖ୍ୟ ଖବର
ବୁଲନ୍ଦସହର: ଉତ୍ତରପ୍ରଦେଶର ବୁଲନ୍ଦସହର ଖୁର୍ଜା ନଗରରେ ଏକ ଜନ୍ମଦିନ ପାର୍ଟିରେ ହତ୍ୟାକାଣ୍ଡ ଘଟିଛି । ମୁହଁରେ କେକ୍ ବୋଳାକୁ କେନ୍ଦ୍ର କରି ଆରମ୍ଭ ହୋଇଥିବା ସାମାନ୍ୟ ବଚସା ଶେଷରେ ଗୁଳିକାଣ୍ଡ ଯାଏ ପହଞ୍ଚିଥିଲା । ଏଥିରେ ୩ ଜଣଙ୍କ ମୃତ୍ୟୁ ଘଟିଛି । ସେମାନେ ହେଲେ ଅମରଦୀପ ସାଇନି, ମନୀଷ ସାଇନି ଏବଂ ଆକାଶ ସାଇନି । ମୁଖ୍ୟ ଅଭିଯୁକ୍ତ ଜିତୁ ସାଇନି ଅନ୍ୟ ସହଯୋଗୀଙ୍କ ସହ ଫେରାର ଅଛନ୍ତି । ସେଠାରେ ଜିତୁଙ୍କ ଜନ୍ମଦିନ ପାଳନ କରାଯାଉଥିଲା ।
ପୁଲିସ ସୂଚନା ଅନୁସାରେ, ଜନ୍ମଦିନ ପାଳନ ବେଳେ ଜିତୁଙ୍କ ମୁହଁରେ ତାଙ୍କ ସାଙ୍ଗମାନେ କେକ୍ ବୋଳି ଦେଇଥିଲେ । ଏହା ଜିତୁଙ୍କୁ ଭଲ ଲାଗି ନ ଥିଲା । ଫଳରେ ଜିତୁ ସେମାନଙ୍କୁ ଗାଳି କରିଥିଲେ । ଏହା ପ୍ରବଳ ଯୁକ୍ତିତର୍କର ରୂପ ନେଇଥିଲା । ପରେ ସେଠାରୁ ଗୁଳିର ଶବ୍ଦ ଶୁଭିଥିଲା । ଏ ନେଇ ଜଣେ ସ୍ଥାନୀୟ ବ୍ୟକ୍ତି ପୁଲିସକୁ ଖବର ଦେଇଥିଲେ । ପୁଲିସ ସେଠାରେ ପହଞ୍ଚି ୩ ଜଣଙ୍କୁ ଗୁରୁତର ଅବସ୍ଥାରେ ଡାକ୍ତରଖାନାରେ ଭର୍ତ୍ତି କରିଥିଲା । କିନ୍ତୁ ଡାକ୍ତର ସେମାନଙ୍କୁ ମୃତ ଘୋଷଣା କରିଥିଲେ ବୋଲି ସ୍ଥାନୀୟ ଏସ୍ପି ଅନ୍ତରୀକ୍ଷ ଜୈନ କହିଛନ୍ତି । ଅଭିଯୁକ୍ତଙ୍କୁ ଧରିବା ଲାଗି ୬ଟି ଟିମ୍ ଗଠନ କରାଯାଇଛି । କେତେଜଣ ସନ୍ଦିଗ୍ଧଙ୍କୁ ଅଟକ ରଖି ପଚରାଉଚରା କରାଯାଉଛି । ମୃତକଙ୍କ ପରିବାର ଲୋକଙ୍କଠାରୁ ଅଭିଯୁକ୍ତଙ୍କ ବାବଦରେ ତଥ୍ୟ ସଂଗ୍ରହ କରାଯାଇଥିବା ଏସ୍ପି କହିଛନ୍ତି ।
Comments ସମସ୍ତ ମତାମତ