Tags : flood

ଭୁବନେଶ୍ୱର: ଗଞ୍ଜାମ ଜିଲ୍ଲାରେ ହୋଇଥିବା ବନ୍ୟା ମନୁଷ୍ୟକୃତ ନୁହେଁ । ଡ୍ୟାମ୍ ପରିଚାଳନାରେ କୌଣସି ତ୍ରୁଟି  ହୋଇନାହିଁ।ଜିଲ୍ଲାର ଡ୍ୟାମଗୁଡ଼ିକୁ ସଠିକ୍ ସମୟରେ ଖୋଲାଯାଇଛି।  ଅତ୍ୟଧିକ ବର୍ଷା ଯୋଗୁଁ ଜିଲ୍ଲାରେ ବନ୍ୟା ପରିସ୍ଥିତି ସୃଷ୍ଟି ହୋଇଥିଲା  ବୋଲି ଜଳସମ୍ପଦ ବିଭାଗର ସର୍ବୋଚ୍ଚ ଯନ୍ତ୍ରୀ ଦିଲ୍ଲୀପ କୁମାର ରାଉତ କହିଛନ୍ତି। ଗଞ୍ଜାମ ବନ୍ୟାକୁ ନେଇ ଡ୍ୟାମ୍ ପରିଚାଳନାରେ ତ୍ରୁଟି ରହିଥିଲା। ଏହା ମନୁଷ୍ୟକୃତ ବୋଲି ଅଭିଯୋଗ ହେବା ପରେ ସର୍ବୋଚ୍ଚ ଯନ୍ତ୍ରୀ ଏହି ପ୍ରତିକ୍ରିୟା ରଖିଛନ୍ତି।

ସେ କହିଛନ୍ତି, ଲଗାଣ ବର୍ଷା ପୂର୍ବରୁ ଜିଲ୍ଲାର ଅନେକ ଡ୍ୟାମରେ ଜଳସ୍ତର ମଧ୍ୟମ ଧରଣର ରହିଥିଲା। ଫାଇଲିନ୍ ବାତ୍ୟା ସମୟରେ ମଧ୍ୟ ଅନେକ ଡ୍ୟାମରେ ସମାନ ସ୍ଥିତି ରହିଥିଲା। ଏଥର ମଧ୍ୟ ଅର୍ଣ୍ଣବ ପରିସ୍ଥିତିର ମୁକାବିଲା ପାଇଁ ଫାଇଲିନ୍ ସମୟ ଭଳି ବିଭିନ୍ନ ପଦକ୍ଷେପ ନିଆଯାଇଥିଲା। ଜିଲ୍ଲାର ସମସ୍ତ ଡ୍ୟାମକୁ ସଠିକ୍ ସମୟରେ ଖୋଲାଯାଇଥିଲା। ତେବେ ଧନେଇ ଓ ସୋରଡ଼ା ଡ୍ୟାମର ପରିଚାଳନା ଜଳସମ୍ପଦ ବିଭାଗ ଅଧୀନରେ ନଥିଲା ବୋଲି ସେ ସ୍ପଷ୍ଟ କରିଛନ୍ତି।

ବନ୍ୟା ଯୋଗୁଁ ଜିଲ୍ଲାର ବିଭିନ୍ନ କେନାଲ, ଡ୍ୟାମ୍ ଓ ଆନିକଟର ମରାମତି ଏବଂ ପୁନର୍ନିର୍ମାଣ ପାଇଁ ବ୍ୟାପକ କ୍ଷୟକ୍ଷତି ହୋଇଛି। ଏହାର ଆକଳନ କରି ଜଳସମ୍ପଦ ବିଭାଗ ପକ୍ଷରୁ ୩୩୪ କୋଟି ଟଙ୍କାର କ୍ଷୟକ୍ଷତି ରିପୋର୍ଟ ସ୍ୱତନ୍ତ୍ର ରିଲିଫ୍ କମିଶନର (ଏସ୍ଆରସି)ଙ୍କୁ ପ୍ରଦାନ କରାଯାଇଛି ବୋଲି ଜଳସମ୍ପଦ ବିଭାଗ ପକ୍ଷରୁ ସୂଚନା ଦିଆଯାଇଛି।