ମୋହନ ବାଗାନ ହେଉଛି କଲିକତାର ସବୁଠୁ ପୁରୁଣା ଫୁଟବଲ ଟିମ । ୧୮୮୯ରେ ଏହି ଟିମ ଗଠନ ହୋଇଥିଲା । ତେବେ ୧୯୨୦ରେ ମୋହନବାଗାନର ଏକ ମ୍ୟାଚରେ ଏହାର ଷ୍ଟାର ହାଫବ୍ୟାକ ଶୈଳେଶ ବୋଷଙ୍କୁ ଖେଳିବାକୁ ସୁଯୋଗ ମିଳିନଥିଲା । ଏଥିରେ କ୍ଷୁବ୍ଧ ହୋଇ ମୋହନବାଗାନ କ୍ଲବର ଭାଇସ ପ୍ରେସିଡେ଼ଂଟ ସୁରେଶ ଚନ୍ଦ୍ର ଚୌଧୁରୀ ଏକ ନୂଆ କ୍ଲବ ଗଢ଼ିବାକୁ ନିଷ୍ପତି ନେଇଥିଲେ ।
ଚୌଧୁରୀ ଇଷ୍ଟ ବେଙ୍ଗଲର ହୋଇଥିବାରୁ ଏହି କ୍ଲବର ନାମ ଇଷ୍ଟ ବେଙ୍ଗଲ ରଖାଯାଇଥିଲା । ଏବେ ଇଷ୍ଟ ବେଙ୍ଗଲକୁ ଆମେ ବାଂଲାଦେଶ ବୋଲି ଜାଣୁଛୁ । ୧୯୨୧ରେ କୁଚବିହାର ଟ୍ରଫିରେ ମୋହନ ବାଗାନ ଓ ଇଷ୍ଟବେଙ୍ଗଲ ମଇଦାନକୁ ଓହ୍ଲାଇଥିଲେ । ଏହାର ପ୍ରଥମ ମ୍ୟାଚ ବିନା ଗୋଲରେ ଶେଷ ହୋଇଥିଲା । କିନ୍ତୁ ୧୯୨୧ ଅଗଷ୍ଟ ୨୧ରେ ଉଭୟଙ୍କ ମଧ୍ୟରେ ହୋଇଥିବା ସେମିଫାଇନାଲ ମ୍ୟାଚରେ ମୋହନବାଗାନ ଟିମ ଇଷ୍ଟବେଙ୍ଗଲକୁ ୩-୦ରେ ହରାଇ ଦେଇଥିଲା ।
ଏଯାବତ ଉଭୟଙ୍କ ମଧ୍ୟରେ ୩୭୧ଟି ମ୍ୟାଚ ଖେଳା ଯାଇଥିବାବେଳେ ଇଷ୍ଟବେଙ୍ଗଲ ଟିମ ୧୨୯ ଓ ମୋହନ ବାଗାନ ଟିମ ୧୨୧ ଥର ବାଜିମାତ କରିଛନ୍ତି । ଗୋଟିଏ ଜିଦ ପାଇଁ ଦୁଇଟି ଦଳ ଗଢ଼ା ହୋଇଥିଲେବି ଏହାଦ୍ୱାରା ଭାରତରେ ଫୁଟବଲ ବେଶ ଲୋକପ୍ରିୟ ହୋଇପାରିଥିଲା । ଏବେବି ଉଭୟ ଟିମକୁ ପାରମ୍ପରିକ ପ୍ରତିଦ୍ୱନ୍ଦ୍ୱୀ କୁହାଯାଉଥିବାବେଳେ ବିଶ୍ୱରେ ବି ଉଭୟ ଦଳକୁ ନେଇ ଚର୍ଚ୍ଚା ହୋଇଥାଏ ।
Comments ସମସ୍ତ ମତାମତ