Tags : disa salian

ମୁମ୍ବାଇ: ବଲିଉଡ୍ ଅଭିନେତା ସୁଶାନ୍ତ ସିଂହ ରାଜପୁତଙ୍କ ସେଲିବ୍ରିଟି ମ୍ୟାନେଜର ଦିଶା ସାଲିଆନ୍ ଙ୍କ ୨୦୨୦ ମସିହାରେ ହୋଇଥିବା ରହସ୍ୟଜନକ ମୃତ୍ୟୁ ମାମଲାରେ ବମ୍ବେ ହାଇକୋର୍ଟ ଏକ ବଡ଼ ନିଷ୍ପତ୍ତି ଶୁଣାଇଛନ୍ତି। ବୁଧବାର ହାଇକୋର୍ଟ ଏହି ଘଟଣାର କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) ତଦନ୍ତ ପାଇଁ ନିର୍ଦ୍ଦେଶ ଦେଇଛନ୍ତି। ଜଷ୍ଟିସ୍ ସାରଙ୍ଗ କୋଟୱାଲ ଏବଂ ଜଷ୍ଟିସ୍ ରଣଜିତସିଂହ ରାଜା ଭୋଂସଲେଙ୍କ ଖଣ୍ଡପୀଠ ସିବିଆଇକୁ ଏକ ଏଫଆଇଆର୍ ରୁଜୁ କରି ଦିଶାଙ୍କ ବାପା ସତୀଶ ସାଲିଆନଙ୍କ ବୟାନ ରେକର୍ଡ କରିବାକୁ କହିଛନ୍ତି। ହାଇକୋର୍ଟ ନିଜ ନିର୍ଦ୍ଦେଶରେ କହିଛନ୍ତି ଯେ, ସିବିଆଇର ଜଣେ ବରିଷ୍ଠ ଓ ଅଭିଜ୍ଞ ଅଧିକାରୀ ଏହି ମାମଲାର ସମସ୍ତ ଦିଗର ତଦନ୍ତ କରିବେ। ଯେପର୍ଯ୍ୟନ୍ତ କୌଣସି ପକ୍ଷପାତହୀନ ପ୍ରମାଣ ନମିଳିଛି, ସେପର୍ଯ୍ୟନ୍ତ କାହାକୁ ବି ଅଭିଯୁକ୍ତ ଭାବେ ବିବେଚନା କରାଯାଇପାରିବ ନାହିଁ। କୋର୍ଟଙ୍କ ଏହି ରାୟ ପରେ ସତୀଶ ସାଲିଆନ୍ ସନ୍ତୋଷ ପ୍ରକାଶ କରିଛନ୍ତି।

୨୦୨୦ ଜୁନ୍ ୮ ତାରିଖରେ ମୁମ୍ବାଇ ମଲାଡସ୍ଥିତ ଏକ ବହୁତଳ ଆବାସିକ ଭବନର ୧୪ ମହଲାରୁ ଖସିପଡ଼ି ୨୮ ବର୍ଷୀୟା ଦିଶାଙ୍କ ମୃତ୍ୟୁ ଘଟିଥିଲା। ମୁମ୍ବାଇ ପୁଲିସମୁମ୍ବାଇ ପୁଲିସ ଏହାକୁ ଆତ୍ମହତ୍ୟା ଦର୍ଶାଇ ଅପମୃତ୍ୟୁ ମାମଲା ରୁଜୁ କରିଥିଲା। ତେବେ ଦିଶାଙ୍କ ବାପା ସତୀଶ ସାଲିଆନ୍ ଗତବର୍ଷ ହାଇକୋର୍ଟରେ ଆବେଦନ କରି ଅଭିଯୋଗ ଆଣିଥିଲେ ଯେ, ତାଙ୍କ ଝିଅକୁ ଗଣଦୁଷ୍କର୍ମ ପରେ ହତ୍ୟା କରାଯାଇଛି ଏବଂ କିଛି ପ୍ରଭାବଶାଳୀ ବ୍ୟକ୍ତିଙ୍କୁ ବଞ୍ଚାଇବା ପାଇଁ ରାଜନୈତିକ ଚାପରେ ପୁଲିସ ମାମଲାକୁ ଚାପିଦେବାକୁ ଚେଷ୍ଟା କରିଛି। ଆବେଦନକାରୀ ଶିବସେନା ନେତା ଆଦିତ୍ୟ ଠାକରେଙ୍କ ବିରୋଧରେ ଏଫଆଇଆର୍ ଓ ସିବିଆଇ ତଦନ୍ତ ଦାବି କରିଥିଲେ।