Tags : dead

ଗ୍ରେଟର ନଏଡା: ରାବୁପୁରା ଥାନା ଅଧୀନସ୍ଥ ନାଗଲା ଶ୍ରୀଗୋପାଳ ଗ୍ରାମରେ ଏକ ଘଟଣା ସାମ୍ନାକୁ ଆସିଛି, ଯେଉଁଠାରେ ଗୋଟିଏ ପରିବାରର ପାଞ୍ଚ ଜଣ ସଦସ୍ୟ ସ୍ବାମୀ, ସ୍ତ୍ରୀ ଏବଂ ସେମାନଙ୍କର ତିନି ସନ୍ତାନମୃତ୍ୟୁବରଣ କରିଛନ୍ତି। ସ୍ଥାନୀୟ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।
ପ୍ରାଥମିକ ସୂଚନା ଅନୁଯାୟୀ, ନାଗଲା ପଦମ ଗ୍ରାମର ବାସିନ୍ଦା ମହେଶ, ତାଙ୍କ ପତ୍ନୀ ଲଲତେଶ ଏବଂ ସେମାନଙ୍କର ତିନି ନାବାଳକ ସନ୍ତାନ ରାତି ୧୦ଟା ସମୟରେ ‘ମ୍ୟାଗି’ ଖାଇ ଶୋଇବାକୁ ଯାଇଥିଲେ। ସକାଳେ ସେମାନେ ନ ଉଠିବାରୁ ଅନ୍ୟମାନଙ୍କୁ ସନ୍ଦେହ ହୋଇଥିଲା; ଯାଞ୍ଚ କରିବା ପରେ ପାଞ୍ଚ ଜଣଯାକ ନିଜ ବିଛଣାରେ ମୃତ ଅବସ୍ଥାରେ ମିଳିଥିଲେ।
ନାଗଲା ଶ୍ରୀ ପଦମ ଗ୍ରାମରେ ଗୋଟିଏ ପରିବାରର ପାଞ୍ଚ ଜଣ ସଦସ୍ୟଙ୍କ ମୃତ୍ୟୁ ପରେ ଏକ ଘର ବାହାରେ ଲୋକଙ୍କ ଭିଡ଼ ଜମିଥିବା ନେଇ ରାବୁପୁରା ପୋଲିସ ଖବର ପାଇଥିଲା।
ଖବର ପାଇବା ମାତ୍ରେ ସ୍ଥାନୀୟ ପୋଲିସ, ବରିଷ୍ଠ ଅଧିକାରୀ, ଆମ୍ବୁଲାନ୍ସ ଏବଂ ଖାଦ୍ୟ ସୁରକ୍ଷା ବିଭାଗର ଏକ ଦଳ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ। ଏକ ଫିଲ୍ଡ ୟୁନିଟ ଏବଂ ଫୋରେନସିକ ଟିମ ଘଟଣାସ୍ଥଳର ପୁଙ୍ଖାନୁପୁଙ୍ଖ ଯାଞ୍ଚ କରୁଛନ୍ତି ଏବଂ ବୈଜ୍ଞାନିକ ପ୍ରମାଣ ସଂଗ୍ରହ କରୁଛନ୍ତି। ମୃତଦେହଗୁଡ଼ିକ ପାଇଁ ଆବଶ୍ୟକୀୟ ଆଇନଗତ ପ୍ରକ୍ରିୟା (ପଞ୍ଚନାମା) ସମ୍ପନ୍ନ କରାଯାଉଛି ଏବଂ ସେଗୁଡ଼ିକୁ ଶବ ବ୍ୟବଚ୍ଛେଦ (ପୋଷ୍ଟ-ମର୍ଟମ) ପାଇଁ ପଠାଯାଉଛି।
ପ୍ରାଥମିକ ଦୃଷ୍ଟିରୁ, ଏହା ଖାଦ୍ୟ ବିଷାକ୍ତ ହେବା (ଫୁଡ ପଏଜନିଂ) ଯୋଗୁ ଘଟିଥିବା ଏକ ଘଟଣା ବୋଲି ମନେହେଉଛି। ସ୍ଥାନୀୟ ଲୋକ ଏବଂ ମୃତକ ମହେଶଙ୍କ ମା’ଙ୍କ କହିବା ଅନୁଯାୟୀ, ପରିବାର ସଦସ୍ୟମାନେ ଗତ ରାତିରେ ନୁଡୁଲ୍ସ ଖାଇଥିଲେ। ମୃତ୍ୟୁର ପ୍ରକୃତ କାରଣ ଏପର୍ୟ୍ୟନ୍ତ ସ୍ପଷ୍ଟ ହୋଇନାହିଁ। ପୋଷ୍ଟ-ମର୍ଟମ ରିପୋର୍ଟ ଏବଂ ଅନ୍ୟାନ୍ୟ ବୈଜ୍ଞାନିକ ତଦନ୍ତ ଆଧାରରେ ପରବର୍ତ୍ତୀ ଆଇନଗତ କାର୍ୟ୍ୟାନୁଷ୍ଠାନ ଗ୍ରହଣ କରାଯାଉଛି।