Tags : dead

ନୂଆଦିଲ୍ଲୀ: ଶୁକ୍ରବାର ରାତିରେ ପାକିସ୍ତାନ ଏବଂ ଆଫଗାନିସ୍ତାନରେ ଏକ ଶକ୍ତିଶାଳୀ ଭୂମିକମ୍ପ ଅନୁଭୂତ ହୋଇଛି। ପାକିସ୍ତାନ ପାଣିପାଗ ବିଭାଗ (ପିଏମଡି) ରିପୋର୍ଟ କରିଛି ଯେ, ଦେଶର ବିଭିନ୍ନ ସ୍ଥାନରେ ୬.୧ ତୀବ୍ରତାର ଭୂମିକମ୍ପ ଅନୁଭୂତ ହୋଇଛି। ଭୂମିକମ୍ପର କେନ୍ଦ୍ର ଭୂପୃଷ୍ଠରୁ ୧୯୦ କିଲୋମିଟର ଗଭୀରତାରେ ଥିଲା। ଆଫଗାନିସ୍ତାନର ହିନ୍ଦୁକୁଶ ଅଞ୍ଚଳରେ ୫.୯ ତୀବ୍ରତାର ଭୂମିକମ୍ପ ଅନୁଭୂତ ହେବା ପରେ ଦିଲ୍ଲୀ-ଏନସିଆର ଏବଂ ଉତ୍ତର ଭାରତର ବିଭିନ୍ନ ସ୍ଥାନରେ ପ୍ରବଳ ଭୂମିକମ୍ପ ଅନୁଭୂତ ହୋଇଥିଲା। ଆଫଗାନିସ୍ତାନରେ ୮ ଜଣଙ୍କର ମୃତ୍ୟୁ ହୋଇଛି। ହଠାତ୍ ଭୂଇଁ ଥରିବା ଯୋଗୁଁ ଲୋକଙ୍କ ମଧ୍ୟରେ ଆତଙ୍କ ସୃଷ୍ଟି ହୋଇଥିଲା, ଅନେକ ସହରର ବାସିନ୍ଦା ଭୟରେ ଘରୁ ଏବଂ ଅଫିସ କୋଠାରୁ ବାହାରକୁ ବାହାରି ଆସିଥିଲେ।
ରାତି ପ୍ରାୟ ୯ଟା୫୦ ସମୟରେ ରେକର୍ଡ କରାଯାଇଥିବା ଏହି ଭୂମିକମ୍ପର ଝଟକା ନୋଏଡା, ଚଣ୍ଡିଗଡ଼, ପଞ୍ଜାବର ଲୁଧିଆନା ଏବଂ ଜମ୍ମୁ ଓ କାଶ୍ମୀରର ପୁଞ୍ଚ, ଶ୍ରୀନଗର ଏବଂ ଉଧମପୁର, ଡେରାଡୁନ ସମେତ ଅନ୍ୟାନ୍ୟ ସ୍ଥାନରୁ ଅନୁଭୂତ ହୋଇଥିଲା। କାବୁଲରେ ଭୂମିକମ୍ପ ଯୋଗୁଁ ଏକ ଘର ଭୁଶୁଡ଼ି ପଡ଼ିବା ଫଳରେ ଆଠ ଜଣଙ୍କର ମୃତ୍ୟୁ ଘଟିଥିବାବେଳେ ଜଣେ ଶିଶୁ ଆହତ ହୋଇଥିବା ଆଫଗାନ କର୍ତ୍ତୃପକ୍ଷ କହିଛନ୍ତି। ଭୂମିକମ୍ପର କେନ୍ଦ୍ରସ୍ଥଳ ଆଫଗାନିସ୍ତାନର ବାଦାଖଶାନ ପ୍ରଦେଶରେ ଥିଲା, ଯାହା ହିନ୍ଦୁକୁଶ ଅଞ୍ଚଳର ପାକିସ୍ତାନ-ତାଜିକିସ୍ତାନ ସୀମା ନିକଟରେ ଅବସ୍ଥିତ। ଇସଲାମାବାଦ, ପଞ୍ଜାବର କିଛି ଅଂଶ, ଖାଇବର ପଖତୁନଖ୍ୱା, ପେଶାୱର ଏବଂ ଅନ୍ୟାନ୍ୟ ଅଞ୍ଚଳ ସମେତ ପାକିସ୍ତାନର ଅନେକ ସହରରେ ମଧ୍ୟ ଭୂମିକମ୍ପର ଝଟକା କିଛି ସମୟ ପାଇଁ ଅନୁଭୂତ ହୋଇଥିଲା।