Tags : dead

ଜଳେଶ୍ୱର: ବିଳମ୍ବିତ ରାତିରେ ଘର ଭାଙ୍ଗି ଦେଲା ହାତୀ । କାନ୍ଥ ତଳେ ଚାପିହୋଇ ଚାଲିଗଲା ୨ ବର୍ଷର ଶିଶୁର ଜୀବନ । ବାଲେଶ୍ୱର ଜିଲ୍ଲା ରାଇବଣିଆ ଥାନା କେନ୍ଦୁଖୁଣ୍ଟା ଗ୍ରାମରେ ଅଘଟଣ । ସୂଚନା ଅନୁଯାୟୀ, ରାଇବଣିଆ ଅଞ୍ଚଳର ଆଖପାଖ ଜଙ୍ଗଲରେ ୩୦ ଟିକିଆ ହାତୀପଲ ଦୀର୍ଘ ଦିନ ଧରି ରହୁଛନ୍ତି । ଦିନ ସମୟରେ ହାତୀପଲ ଜଙ୍ଗଲରେ ରହୁଥିବା ବେଳେ ରାତିରେ ଗାଁ ଆଡ଼କୁ ଆସି ଘରବାଡ଼ିରେ ପଶି ଉପଦ୍ରବ କରୁଛନ୍ତି ।
ଗତକାଲି ରାତିରେ ହାତୀପଲ କେନ୍ଦୁଖୁଣ୍ଟା ଗ୍ରାମର ଉଦ୍ଧବ ମାରାଣ୍ଡିଙ୍କ ଘର ଭାଙ୍ଗି ଦେଇଛନ୍ତି । ଫଳରେ ରାତିରେ ଶୋଇଥିବା ବେଳେ ପରିବାର ଲୋକଙ୍କ ଉପରେ କାନ୍ଥ ଭୁଶୁଡ଼ିପଡ଼ିବାରୁ ଉଦ୍ଧବଙ୍କ ୨ ବର୍ଷର ପୁଅ ରାମ୍ ଗୁରୁତର ଆହତ ହୋଇଥିଲେ । ପରିବାର ଲୋକେ ହାତୀଗଡ଼ ଡାକ୍ତରଖାନାକୁ ନେଇଥିବା ବେଳେ ଡାକ୍ତର ମୃତ ଘୋଷଣା କରିଛନ୍ତି । ବିଳମ୍ବିତ ରାତିରେ ହାତୀ ଉପଦ୍ରବ ଖବର ପାଇ ବନବିଭାଗ କର୍ମଚାରୀ ପହଞ୍ଚି ହାତୀମାନଙ୍କୁ ଘଉଡ଼ାଇଥିଲେ । ଉଦ୍ଧବ ଜଣେ ଗରିବ ପରିବାରର ହୋଇଥିବାରୁ ସରକାରୀ ସହାୟତା ପାଇଁ ନିବେଦନ କରିଛନ୍ତି ପରିବାର ଲୋକେ ।