Tags : congress vs bjp

ଭୁବନେଶ୍ବର: 'ରାଜ୍ୟରେ ୟୁ ଟର୍ଣ୍ଣ ସରକାର ଚାଲିଛି '। ଏଭଳି ଅଭିଯୋଗ ଆଣିଛି ଓଡି଼ିଶା ପ୍ରଦେଶ କଂଗ୍ରେସ । ସରକାର ନିଷ୍ପତ୍ତି ନେଉଛନ୍ତି ପରେ ପୁଣି ସେହି ନିଷ୍ପତ୍ତିକୁ ପରିବର୍ତ୍ତନ କରୁଛନ୍ତି । ଓଡ଼ିଶାରେ ଡବଲ ଇଞ୍ଜିନ ସରକାର କ୍ଷମତାକୁ ଆସିବା ପରେ ନିଷ୍ପତ୍ତିକୁ ବାରମ୍ବାର ପରିବର୍ତ୍ତନ କରିବା, ଯାହା ସରକାରଙ୍କ ପାରିବାପଣିଆ ଉପରେ ପ୍ରଶ୍ନ ଉଠାଇଛି ବୋଲି କହିଛି କଂଗ୍ରେସ । ଗତକାଲି (ସୋମବାର) ରାଜ୍ୟ କଂଗ୍ରେସ ଭବନରେ ଏକ ସାମ୍ବାଦିକ ସମ୍ମିଳନୀରେ ମୋହନ ସରକାର ଉପରେ ପ୍ରବଳ ବର୍ଷିଛନ୍ତି କଂଗ୍ରେସର ମୁଖପାତ୍ର ସୋନାଲି ସାହୁ । ସେପଟେ କଡ଼ା ଜବାବ ରଖିଛନ୍ତି ବିଜେପି ମୁଖପାତ୍ର ସୁରଥ ବିଶ୍ୱାଳ । ସେ କହିଛନ୍ତି,"ଆମ ସରକାର ଲୋକଙ୍କ ପାଇଁ ସମ୍ବେଦନଶୀଳ, ତେଣୁ ଲୋକଙ୍କ ହିତରେ ନିଷ୍ପତ୍ତି ପରିବର୍ତ୍ତନ ହେଲେ କୌଣସି ଅସୁବିଧା ନାହିଁ ।"

କଂଗ୍ରେସର ମୁଖପାତ୍ର ସୋନାଲି ସାହୁ କହିଛନ୍ତି,"୧୯ ମାସର ସରକାର ୧୯ ଥରରୁ ଅଧିକ ନିଷ୍ପତ୍ତି ଉପରେ ୟୁ ଟର୍ଣ୍ଣ ନେଇଛନ୍ତି । ରାଜ୍ୟରେ ୟୁ-ଟର୍ଣ୍ଣ ସରକାର ଚାଲିଛି । ବିଜେପି କ୍ଷମତାକୁ ଆସିବା ପରେ, ରତ୍ନଭଣ୍ଡାର ଗଣତି-ମଣତି ହେବ କହିଥିଲେ କିନ୍ତୁ ଆଜି ପର୍ଯ୍ୟନ୍ତ ଏହି ନିଷ୍ପତ୍ତି କାର୍ଯ୍ୟକାରୀ ହୋଇପାରିଲା ନାହିଁ । SC, STଙ୍କ ଜମି ବିକ୍ରି ପାଇଁ ଆଇନ ଆଣିବେ କହିଲେ ପରେ ଚୁପ ହୋଇଗଲେ । ଜାନୁଆରୀ ୧ ରୁ ପୁରୀ ଶ୍ରୀମନ୍ଦିରରେ ଧାଡି ଦର୍ଶନ ବ୍ୟବସ୍ଥା କରିବା ପାଇଁ ନିଷ୍ପତ୍ତି ନେଇଥିଲେ, ତାହା ମଧ୍ୟ କାର୍ଯ୍ୟକାରୀ ହୋଇପାରିଲା ନାହିଁ । ବିଜୁ ପଟ୍ଟନାୟକ କ୍ରୀଡା ସମ୍ମାନ ନାଁ ପରିବର୍ତ୍ତନ କରି ଓଡ଼ିଶା କ୍ରୀଡା ସମ୍ମାନ କରିବେ ବୋଲି ସକାଳେ କହିଲେ ହେଲେ ମୁଖ୍ୟମନ୍ତ୍ରୀ ପରେ କହିଲେ ସେମିତି କୌଣସି ପ୍ରସ୍ତାବ ନାହିଁ । ଶ୍ରୀମନ୍ଦିରର ୪ ଦ୍ଵାର ଖୋଲିବେ ବୋଲି କହିଲେ ପରେ ନିଷ୍ପତ୍ତିକୁ ପରିବର୍ତ୍ତନ କଲେ । ସେହିପରି ଗୁଟଖା ବ୍ୟାନ କରିବା ପାଇଁ ମଧ୍ୟ ଘୋଷଣା କରିଥିଲେ ହେଲେ ସେଥିରେ ମଧ୍ୟ ୟୁ ଟର୍ଣ୍ଣ ମାରିଲେ ରାଜ୍ୟ ସରକାର ।"