Tags : cabinet

ଭୁବନେଶ୍ବର: ରାଜ୍ୟ କ୍ୟାବିନେଟର ଗୁରୁତ୍ୱପୂର୍ଣ୍ଣ ବୈଠକ ଆଜି ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଛି । ଲୋକସେବା ଭବନରେ ଅନୁଷ୍ଠିତ ବୈଠକରେ ୬ ଟି ବିଭାଗର ୧୧ ଟି ପ୍ରସ୍ତାବରେ ମୋହର ବାଜିଛି । ଅର୍ଥ ବିଭାଗର ୧ଟି, ଆଇନ ବିଭାଗର ୧ଟି, ଅନୁସୂଚିତ ଜନଜାତି, ଅନୁସୂଚିତ ଜାତି ଉନ୍ନୟନ, ସଂଖ୍ୟାଲଘୁ ଓ ପଛୁଆ ବର୍ଗ କଲ୍ୟାଣ ବିଭାଗର ୧ଟି, କୃଷି ଓ କୃଷକ ସଶକ୍ତିକରଣ ବିଭାଗର ୧ଟି, ଗୃହ ନିର୍ମାଣ ଓ ନଗର ଉନ୍ନୟନ ବିଭାଗର ୨ ଟି ଏବଂ ଜଳସମ୍ପଦ ବିଭାଗର ୫ ଟି ପ୍ରସ୍ତାବକୁ କ୍ୟାବିନେଟର ସ୍ବୀକୃତି ମିଳିଛି । ଆଗକୁ ପୌର ନିର୍ବାଚନ ଥିବାରୁ ସହରାଞ୍ଚଳ ବିକାଶ ଉପରେ ଗୁରୁତ୍ୱ ଦେଇଛନ୍ତି । ସେହିପରି ଜଳସମ୍ପଦ ବିଭାଗ ଉପରେ ମଧ୍ୟ ପ୍ରାଧାନ୍ୟ ଦିଆଯାଇଛି । ବୈଠକ ବାବଦରେ ସୂଚନା ଦେଇଛନ୍ତି ମୁଖ୍ୟ ଶାସନ ସଚିବ ଅନୁ ଗର୍ଗ ।

ସହରାଞ୍ଚଳରେ ଗୃହହୀନ ଏବଂ ଯୋଗ୍ୟ ପରିବାରଙ୍କୁ ୨୦୨୯ ସୁଦ୍ଧା ପକ୍କା ଘର ଯୋଗାଇବା ଲକ୍ଷ୍ୟରେ ଓଡ଼ିଶା ସରକାର 'PMAY-(U) BANDHU' ଯୋଜନାକୁ ମଞ୍ଜୁରି ଦେଇଛନ୍ତି । ଏହା ପ୍ରଧାନମନ୍ତ୍ରୀ ଆବାସ ଯୋଜନା (ସହର) ୨.୦ର ପରିପୂରକ ରାଜ୍ୟ ଯୋଜନା ଭାବେ କାର୍ଯ୍ୟକାରୀ ହେବ । ଏହା ମାଧ୍ୟମରେ PMAY-U 2.0ର ସୁବିଧାକୁ ଆହୁରି ସୁଦୃଢ଼ କରି ସମସ୍ତ ଯୋଗ୍ୟ ସହରାଞ୍ଚଳ ପରିବାରଙ୍କୁ ଆବାସ ସହାୟତା ଯୋଗାଇବାକୁ ସରକାର ଲକ୍ଷ୍ୟ ରଖିଛନ୍ତି ।

୨୦୨୫ରେ ସହରାଞ୍ଚଳରେ ପକ୍କା ଘରର ପରିମାଣ ୫୯ ପ୍ରତିଶତ ଥିବାବେଳେ ୨୦୨୯ ସୁଦ୍ଧା ଏହାକୁ ୯୦ ପ୍ରତିଶତରେ ପହଞ୍ଚାଇବା ଲକ୍ଷ୍ୟ ଧାର୍ଯ୍ୟ କରାଯାଇଛି । ଏହି ଅବଧିରେ ପ୍ରାୟ ୩ରୁ ୩.୫ ଲକ୍ଷ ସହରାଞ୍ଚଳ ପରିବାର PMAY-U 2.0 ଅଧୀନରେ ଆବାସ ସହାୟତା ପାଇବେ । ଏହି ଯୋଜନାରେ ମୋଟ ୧,୬୧୫ କୋଟି ଟଙ୍କା ବ୍ୟୟ ହେବ । ଏଥିରେ ସୁଲଭ ଆବାସ ପ୍ରକଳ୍ପ, ଆର୍ଥିକ ପ୍ରୋତ୍ସାହନ, ସ୍ୱଳ୍ପ ସୁଧରେ ଗୃହଋଣ ସୁବିଧା ଏବଂ ବିଶେଷ ପରିସ୍ଥିତିରେ ବିସ୍ଥାପିତ ପରିବାରଙ୍କୁ ଆର୍ଥିକ ସହାୟତା ଭଳି ଚାରିଟି ପ୍ରମୁଖ ଉପାଦାନ ରହିଛି । ବିଭିନ୍ନ ଉପାଦାନ ପାଇଁ ଯଥାକ୍ରମେ ୬୭୫ କୋଟି, ୬୮୫ କୋଟି, ୧୦୦ କୋଟି ଓ ୧୨୫ କୋଟି ଟଙ୍କା ବ୍ୟବସ୍ଥା କରାଯାଇଛି ।

ଯୋଜନା ଅନୁସାରେ ଆଗାମୀ ୫ ବର୍ଷରେ ପ୍ରାୟ ୩୦ ହଜାର Affordable Housing in Partnership (AHP) ଘର ଏବଂ ୧୦ ହଜାର Affordable Rental Housing/Transit House ନିର୍ମାଣକୁ ସହାୟତା ମିଳିବ । ଏଥିସହ ସୁଲଭ ସୁଧରେ ଗୃହଋଣ, ସୁଧ ରିହାତି, ନିଜ ଶ୍ରମଦାନ ପାଇଁ ପ୍ରୋତ୍ସାହନ ଏବଂ ଶୀଘ୍ର ଘର ନିର୍ମାଣ ଶେଷ କରୁଥିବା ହିତାଧିକାରୀଙ୍କୁ ପ୍ରୋତ୍ସାହନ ଦେବାର ବ୍ୟବସ୍ଥା ରହିଛି । ଏହି ପ୍ରକଳ୍ପଗୁଡ଼ିକରେ ସବୁଜ ଓ ଟିକାଉ ବିକାଶକୁ ଗୁରୁତ୍ୱ ଦିଆଯିବ । ଖୋଲା ସ୍ଥାନ, ସୌର ଶକ୍ତି, ବର୍ଷାଜଳ ସଂରକ୍ଷଣ, ଅଙ୍ଗନୱାଡ଼ି କେନ୍ଦ୍ର, ପ୍ରାଥମିକ ସ୍ୱାସ୍ଥ୍ୟକେନ୍ଦ୍ର, ଶିଶୁ ଖେଳ ପଡ଼ିଆ ଓ PDS କେନ୍ଦ୍ର ଭଳି ସାମାଜିକ ଭିତ୍ତିଭୂମି ସୁବିଧା ଉପଲବ୍ଧ କରାଯିବ । ମହିଳା, ଦିବ୍ୟାଙ୍ଗ ଓ ଅନ୍ୟାନ୍ୟ ବଞ୍ଚିତ ବର୍ଗଙ୍କୁ ଘର ବଣ୍ଟନରେ ପ୍ରାଥମିକତା ଦିଆଯିବ ।