Tags : cabinet

ଭୁବନେଶ୍ୱର: ରାଜ୍ୟରେ ଶକ୍ତି, ପରିବହନ ଓ ପାନୀୟ ଜଳ କ୍ଷେତ୍ର ସମେତ ୫ଟି ବିଭାଗର ମୋଟ ୧୧ଟି ଗୁରୁତ୍ୱପୂର୍ଣ୍ଣ ପ୍ରସ୍ତାବକୁ ରାଜ୍ୟ କ୍ୟାବିନେଟ୍ ଅନୁମୋଦନ କରିଛନ୍ତି। ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଅଧ୍ୟକ୍ଷତାରେ ଲୋକସେବା ଭବନରେ ଅନୁଷ୍ଠିତ କ୍ୟାବିନେଟ୍ ବୈଠକରେ କେନ୍ଦୁଝରରେ ୧୬୪୭କୋଟି ଟଙ୍କା ବ୍ୟୟରେ ଅତ୍ୟାଧୁନିକ ଗ୍ରୀଡ୍ ସବଷ୍ଟେସନ ସମେତ ଗ୍ରାମାଂଚଳ ପାନୀୟ ଜଳ ସେବା ପାଇଁ ନୂଆ ନୀତି ଓ ରାଜ୍ୟର ସବୁ ଜିଲ୍ଲା,ବ୍ଲକ ଓ ପର୍ୟ୍ୟଟନସ୍ଥଳୀରେ ଅଟଳ ବସଷ୍ଟାଣ୍ଡ ନିର୍ମାଣ ନିମନ୍ତେ ପ୍ରସ୍ତାବକୁ କ୍ୟାବିନେଟ୍ ଅନୁମୋଦନ କରିଛନ୍ତି। କ୍ୟାବିନେଟ୍ ବୈଠକ ପରେ ମୁଖ୍ୟ ସଚିବ ଅନୁ ଗର୍ଗ ଏନେଇ ଗଣମାଧ୍ୟମକୁ ସୂଚନା ଦେଇଛନ୍ତି।
କ୍ୟାବିନେଟ ନିଷ୍ପତ୍ତି ଅନୁସାରେ, ରାଜ୍ୟର ଶିଳ୍ପାୟନକୁ ଗତିଶୀଳ କରିବା ପାଇଁ କେନ୍ଦୁଝର ଜିଲ୍ଲାରେ ୧୬୪୭କୋଟି ଟଙ୍କା ବ୍ୟୟରେ ୨୫୦୦ଏମଭିଏ ବିଶିଷ୍ଟ ଅତ୍ୟାଧୁନିକ ଗ୍ରୀଡ୍ ସବଷ୍ଟେସନ ନିର୍ମାଣ ପ୍ରସ୍ତାବକୁ ରାଜ୍ୟ କ୍ୟାବିନେଟ୍ ଅନୁମୋଦନ କରିଛନ୍ତି। କେନ୍ଦୁଝର ଜିଲ୍ଲାର ବାସୁଦେବପୁରଠାରେ ଏହି ଅତ୍ୟାଧୁନିକ ଜିଆଇଏସ ଗ୍ରୀଡ୍ ସବଷ୍ଟେସନ ନିର୍ମାଣ କରାଯିବ। ଏହି ନୂତନ ଗ୍ରୀଡ୍ କାର୍ୟ୍ୟକ୍ଷମ ହେଲେ କେନ୍ଦୁଝର ଓ ପାର୍ଶ୍ୱବର୍ତ୍ତୀ ସୁନ୍ଦରଗଡ଼ ଜିଲ୍ଲାର କୋଇଡ଼ା ଅଂଚଳରେ ଥିବା ଶିଳ୍ପାନୁଷ୍ଠାନଗୁଡ଼ିକର ବିଦ୍ୟୁତ ଚାହିଦା ପୂରଣ ହୋଇପାରିବ। ଏହି ଗ୍ରୀଡ୍ ନିର୍ମାଣ ପ୍ରକଳ୍ପଟି ୨୦୨୬-୨୭ ଆର୍ଥିକ ବର୍ଷରୁ ୨୦୨୮-୨୯ ମଧ୍ୟରେ ଶେଷ ହେବ। ଏଥିପାଇଁ ରାଜ୍ୟ ସରକାର ୪୯୪.୧୦ କୋଟି ଟଙ୍କାର ଇକ୍ୱିଟି ସହାୟତା ପ୍ରଦାନ କରିବେ ଓ ଅବଶିଷ୍ଟ ୧୧୫୨.୯୦ କୋଟି ଟଙ୍କା ଓପିଟିସିଏଲ୍ ବିଭିନ୍ନ ବ୍ୟାଙ୍କ ଓ ଆର୍ôଥକ ସଂସ୍ଥା ମାଧ୍ୟମରେ ଯୋଗାଡ଼ କରିବ।