Tags : bmc

ଭୁବନେଶ୍ୱର:ଭୁବନେଶ୍ୱର ମହାନଗର ନିଗମ ପକ୍ଷରୁ  ସହିଦ ନଗରସ୍ଥିତ ଭବାନୀ ମଲରେ ନବ ନିର୍ମିତ ପିଣ୍ଡି ଓ ଦୋକାନ ଗୃହ ଲଟେରୀ ମାଧ୍ୟମରେ ଆବଣ୍ଟନ କରାଯାଇଛି । ଏହି ଉପଲକ୍ଷେ ଆୟୋଜିତ କାର୍ଯ୍ୟକ୍ରମରେ ଅତିରିକ୍ତ କମିଶନର ଶ୍ରୀ କୈଳାସ ଚନ୍ଦ୍ର ଦାସ, ସହିଦ ନଗର କର୍ପୋରେଟର ରାଜକିଶୋର ଦାସ, ଡେପୁଟି କମିଶନର ଅଜୟ କୁମାର ମହାନ୍ତି, ପ୍ରିୟଙ୍କା ମଲ୍ଲିକ, ଦକ୍ଷିଣ-ପୂର୍ବ ଜୋନାଲ କମିଶନର ଧନଞ୍ଜୟ ମହାନ୍ତି, ମୁଖ୍ୟ ଅଡିଟର ସୌଦାମିନୀ ବେହେରା ପ୍ରମୁଖ ମଂଚାସୀନ ଥିଲେ । ଅନ୍ୟମାନଙ୍କ ମଧ୍ୟରେ ସହିଦ ନଗର ହାଟ ବ୍ୟବସାସୀମାନେ ଉପସ୍ଥିତ ଥିଲେ ।  
ସହିଦ ନଗର ଭବାନୀ ମଲ ତଳେ ଭୁବନେଶ୍ୱର ମହାନଗର ନିଗମ ପକ୍ଷରୁ ନୂତନ ପିଣ୍ଡି ଓ ଦୋକାନ ଗୃହ ନିର୍ମାଣ କରାଯାଇଛି । ଅମାନତ ରାଶି ଜମା କରିଥିବା ମୋଟ 139 ଜଣ ବ୍ୟବସାୟୀଙ୍କୁ ଆଜି ପିଣ୍ଢି ପ୍ରଦାନ କରିବା ପାଇଁ ଡକାଯାଇଥିଲା । ମାତ୍ର ସେମାନଙ୍କ ମଧ୍ୟରୁ 61 ଜଣ ହିତାଧିକାରୀ ଉପସ୍ଥିତ ଥିଲେ । ସେମାନଙ୍କୁ ଆଜି ଲଟେରୀ ମାଧ୍ୟମରେ ପିଣ୍ଡି ଆବଣ୍ଟନ କରାଯାଇଛି । ଆବଣ୍ଟନରେ ସ୍ୱଚ୍ଛତା ରକ୍ଷା କରିବା ପାଇଁ ଲଟେରୀ ମାଧ୍ୟମରେ ପିଣ୍ଡି ଓ ଦୋକାନ ଗୃହ ଆବଣ୍ଟନ କରାଯାଇଛି । ଖୁବ୍ ଶୀଘ୍ର ଅନ୍ୟମାନଙ୍କୁ ପିଣ୍ଡି ଆବଣ୍ଟନ କରାଯିବ ବୋଲି ବିଏମ୍ ସି ପକ୍ଷରୁ କୁହାଯାଇଛି । 
ସେହିପରି ଅମାନତ ରାଶି ଜମା କରିଥିବା ଦୁଇଜଣ ବ୍ୟବସାୟୀଙ୍କୁ ଲଟେରୀ ମାଧ୍ୟମରେ 2ଟି ଦୋକାନ ଘର ଆବଣ୍ଟନ କରାଯାଇଛି । ଅବଶିଷ୍ଟ  ଦୋକାନ ଗୃହ ଆବଣ୍ଟନ ଖୁବ୍ ଶୀଘ୍ର କରାଯିବ ।