Tags : bjp and congress

ଜୟପୁର: ରାଜସ୍ଥାନର ଜୟପୁର, କୋଟା ଓ ଯୋଧପୁରର ୯ଟି ଆସନ ମଧ୍ୟରୁ ୮ଟିର ନିର୍ବାଚନ ଫଳାଫଳ ଘୋଷଣା ହୋଇଛି। ଏହି ଆସନଗୁଡ଼ିକରେ ସେପ୍ଟେମ୍ବର ୧୬ ତାରିଖରେ ପୁନଃ ମତଦାନ ହୋଇଥିଲା। ଘୋଷିତ ଫଳାଫଳରେ କଂଗ୍ରେସ ୬ଟି ଆସନରେ ବିଜୟୀ ହୋଇଥିବା ବେଳେ ବିଜେପିକୁ ୨ଟି ଆସନରେ ସଫଳତା ମିଳିଛି।

ଜୟପୁର ନଗର ନିଗମର ୪ଟି ୱାର୍ଡରେ ହୋଇଥିବା ପୁନଃ ମତଦାନରେ କଂଗ୍ରେସ ସମସ୍ତ ଆସନ ଜିତିଛି। ୱାର୍ଡ ନମ୍ବର ୦୯ରୁ କଂଗ୍ରେସର କୈଲାଶୀ ୭୬୪ ଭୋଟରେ ବିଜୟୀ ହୋଇଛନ୍ତି। ସେହିପରି ୱାର୍ଡ ନମ୍ବର ୧୮ରୁ ବନ୍ଦିତା ଶର୍ମା ୧୮୧ ଭୋଟରେ, ୱାର୍ଡ ନମ୍ବର ୨୫ରୁ ରେଖା ଦେବୀ ୩୯୭ ଭୋଟରେ ଏବଂ ୱାର୍ଡ ନମ୍ବର ୩୪ରୁ ସୁରେଶ ଯାଦବ ୧୪୯ ଭୋଟରେ ବିଜୟ ହାସଲ କରିଛନ୍ତି।

ଜୟପୁର ନଗର ନିଗମରେ ଭାଜପା ପୂର୍ବରୁ ବହୁମତ ହାସଲ କରିସାରିଥିଲେ ମଧ୍ୟ ଏହି ୪ଟି ୱାର୍ଡର ଫଳାଫଳ ଦଳ ପାଇଁ ଝଟକା ବୋଲି ରାଜନୈତିକ ମହଲରେ ଆଲୋଚନା ହେଉଛି। ଭୋଟ ସଂଖ୍ୟାରେ ଭାଜପା ପୂର୍ବରୁ କଂଗ୍ରେସଠାରୁ ପଛରେ ଥିବା ବେଳେ ଏହି ଫଳାଫଳ ପରେ ଦୁଇ ଦଳ ମଧ୍ୟରେ ଭୋଟ ବ୍ୟବଧାନ ଆହୁରି ବଢ଼ିଛି।

ଜୟପୁର ସହିତ କୋଟା ନଗର ନିଗମର ୩ଟି ଏବଂ କୋଟା ଜିଲାର ସୁକେତ ନଗରପାଳିକାର ଗୋଟିଏ ଆସନରେ ହୋଇଥିବା ପୁନଃ ମତଦାନର ଫଳାଫଳ ମଧ୍ୟ ପ୍ରକାଶ ପାଇଛି। କୋଟାର ୪ଟି ଆସନ ମଧ୍ୟରୁ ଭାଜପା ୨ଟି ଏବଂ କଂଗ୍ରେସ ୨ଟି ଆସନ ଜିତିଛି। କୋଟା ନଗର ନିଗମର ୱାର୍ଡ ନମ୍ବର ୪୪ରୁ ଭାଜପାର ପ୍ରେମ ସିଂହ ୭୧ ଭୋଟରେ ବିଜୟୀ ହୋଇଛନ୍ତି। ୱାର୍ଡ ନମ୍ବର ୮୭ରୁ ବିଜେପିର ପୁଷ୍ପା ଚୌଧୁରୀ ୩୦୫ ଭୋଟରେ ବିଜୟ ହାସଲ କରିଛନ୍ତି।

ଅନ୍ୟପଟେ ୱାର୍ଡ ନମ୍ବର ୧୧ରୁ କଂଗ୍ରେସର କମଲେଶ କୁମାରୀ ୫୩୭ ଭୋଟରେ ବିଜୟୀ ହୋଇଛନ୍ତି। କୋଟାର ସୁକେତ ନଗରପାଳିକା ୱାର୍ଡ ନମ୍ବର ୪ରୁ କଂଗ୍ରେସର ମହମ୍ମଦ ରଫିକ ୧୧୭ ଭୋଟରେ ନିର୍ବାଚନ ଜିତିଛନ୍ତି। ଯୋଧପୁର ନଗର ନିଗମର ଗୋଟିଏ ଆସନରେ ଭାଜପା ପ୍ରାର୍ଥୀ ଆଗରେ ଥିବା ଜଣାପଡ଼ିଛି। ତେବେ ଏଠାରେ ଏଯାଏ ଔପଚାରିକ ଭାବେ ଫଳାଫଳ ଘୋଷଣା ହୋଇନାହିଁ। ଏହିପରି ୯ଟି ଆସନ ମଧ୍ୟରୁ ବର୍ତ୍ତମାନ ସୁଦ୍ଧା ୮ଟିର ଫଳାଫଳ ଘୋଷିତ ହୋଇଥିବା ବେଳେ କଂଗ୍ରେସ ୬ଟି ଏବଂ ଭାଜପା ୨ଟି ଆସନରେ ବିଜୟୀ ହୋଇଛି।