Tags : bjp

ନୂଆଦିଲ୍ଲୀ: ଅରବିନ୍ଦ କେଜ୍ରିୱାଲଙ୍କ ଆମ ଆଦମୀ ପାର୍ଟିକୁ ଏକ ବଡ଼ ଝଟକା ଲାଗିଛି। ରାଜ୍ୟସଭା ରାଘବ ଚଢାଙ୍କ ସମେତ ସମସ୍ତ ବିଦ୍ରୋହୀ ଆପ ସାଂସଦଙ୍କୁ ଭାରତୀୟ ଜନତା ପାର୍ଟିର ସଦସ୍ୟ ଭାବରେ ମାନ୍ୟତା ଦେଇଛି। ରାଜ୍ୟ ସଭା ସଚିବାଳୟ ଏ ସମ୍ପର୍କରେ ଏକ ବିଜ୍ଞପ୍ତି ଜାରି କରିଛି । ରାଜ୍ୟ ସଭା ସଚିବାଳୟ ଆମ ଆଦମୀ ପାର୍ଟିରୁ ବିଜେପିରେ ଯୋଗ ଦେଇଥିବା ସମସ୍ତ ସାଂସଦଙ୍କ ସମ୍ପର୍କରେ ଏକ ବିଜ୍ଞପ୍ତି ଜାରି କରିଛି। ସେମାନଙ୍କୁ ବିଜେପିରେ ସାମିଲ ଘୋଷଣା କରାଯାଇଛି, ଯାହା ଦ୍ୱାରା ଉଚ୍ଚ ସଦନରେ ବିଜେପି ସଦସ୍ୟଙ୍କ ସଂଖ୍ୟା ୧୧୩ କୁ ବୃଦ୍ଧି ପାଇଛି।

ଆମ୍ ଆଦମୀ ପାର୍ଟିର ସାଂସଦ ସଂଜୟ ସିଂହ ରବିବାର ଆପ ଛାଡିଥିବା ସାତ ଜଣ ସାଂସଦଙ୍କୁ ଅଯୋଗ୍ୟ ଘୋଷଣା କରିବାକୁ ଦାବି କରି ରାଜ୍ୟସଭା ଅଧ୍ୟକ୍ଷ ସି.ପି. ରାଧାକୃଷ୍ଣନଙ୍କୁ ଏକ ଚିଠି ଲେଖିଥିଲେ। ଚିଠିରେ ଉଲ୍ଲେଖ ଅଛି, "ଏହି ସାଂସଦ ମାନେ ଆମ ଆଦମୀ ପାର୍ଟି ଟିକେଟରେ ଉଚ୍ଚ ସଦନକୁ ନିର୍ବାଚିତ ହୋଇଥିଲେ, କିନ୍ତୁ ପରେ ଦଳ ଛାଡି ଭାରତୀୟ ଜନତା ପାର୍ଟି (ବିଜେପି)ରେ ଯୋଗ ଦେବାକୁ ନିଷ୍ପତ୍ତି ନେଇଥିଲେ।"

ସଞ୍ଜୟ ସିଂହ କହିଥିଲେ ଯେ, ସାତ ଜଣ ଆପ ସାଂସଦଙ୍କ ଏହି ପଦକ୍ଷେପ ଦଳତ୍ୟାଗ କରିବା ପରି। ଏହା ପଞ୍ଜାବର ଜନସାଧାରଣ ଏବଂ ଭାରତୀୟ ସମ୍ବିଧାନ ପ୍ରତି ବିଶ୍ୱାସଘାତକତା ଥିଲା। ସେ କହିଥିଲେ ଯେ, ଆବଶ୍ୟକ ହେଲେ ଆମ ଆଦମୀ ପାର୍ଟି ଏହି ମାମଲାରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବ। ତଥାପି, ରାଜ୍ୟସଭା ସଚିବାଳୟ ଦ୍ୱାରା ଜାରି ଏକ ବିଜ୍ଞପ୍ତି ଏବେ ସ୍ପଷ୍ଟ କରିଛି ଯେ ଆମ ଆଦମୀ ପାର୍ଟିର ଦାବିକୁ ପ୍ରତ୍ୟାଖ୍ୟାନ କରାଯାଇଛି। ଏହି ସାଂସଦ ମାନଙ୍କୁ ଏବେ ଭାରତୀୟ ଜନତା ପାର୍ଟିର ସଦସ୍ୟ ଭାବରେ ବିବେଚନା କରାଯିବ, ଯାହା ଫଳରେ ଉଚ୍ଚ ସଦନରେ ଆମ ଆଦମୀ ପାର୍ଟିର କେବଳ ତିନି ଜଣ ସାଂସଦ ଅଛନ୍ତି।
ରାଘବ ଚଢା, ସନ୍ଦୀପ ପାଠକ ଏବଂ ଅଶୋକ ମିତ୍ତଲ ଶୁକ୍ରବାର (୨୪ ଏପ୍ରିଲ, ୨୦୨୬) ଏକ ସାମ୍ବାଦିକ ସମ୍ମିଳନୀରେ ଆମ ଆଦମୀ ପାର୍ଟିରୁ ଅଲଗା ହେବାର ଘୋଷଣା କରିଥିଲେ। ସେମାନେ ଦାବି କରିଥିଲେ ଯେ ହରଭଜନ ସିଂହ, ସ୍ୱାତୀ ମାଲିୱାଲ, ବିକ୍ରମ ସାହାଣୀ ଏବଂ ରାଜିନ୍ଦର ଗୁପ୍ତା ମଧ୍ୟ ସେମାନଙ୍କ ସହିତ ଥିଲେ। ଦଳ ଛାଡିଥିବା ସାତ ଜଣଙ୍କ ମଧ୍ୟରୁ ଛଅ ଜଣ ପଞ୍ଜାବର ରାଜ୍ୟସଭା ସଦସ୍ୟ । 

ଏହି ସାଂସଦ ମାନେ ଅଭିଯୋଗ କରିଥିଲେ ଯେ ଅରବିନ୍ଦ କେଜରିୱାଲଙ୍କ ନେତୃତ୍ୱାଧୀନ ଦଳ ଏହାର ନୀତି ଏବଂ ନୈତିକ ମୂଲ୍ୟବୋଧରୁ ବିଚ୍ୟୁତ ହୋଇଛି। ଚଢା କହିଛନ୍ତି, "ସମ୍ବିଧାନ ଅନୁଯାୟୀ, ଗୋଟିଏ ଦଳର ମୋଟ ସାଂସଦଙ୍କ ଦୁଇ-ତୃତୀୟାଂଶ ଅନ୍ୟ ଦଳ ସହିତ ମିଶ୍ରଣ କରିପାରିବେ।"