Tags : bjp

ଭୁବନେଶ୍ବର: ବିଶ୍ବର ସର୍ବବୃହତ ରାଜନୈତିକ ଦଳ ବିଜେପିର ଆଜି ୪୬ ତମ ପ୍ରତିଷ୍ଠା ଦିବସ । ୪୫ ବର୍ଷ ତଳେ ଆଜିର ଦିନରେ ଅର୍ଥାତ ୬ ଏପ୍ରିଲ ୧୯୮୦ରେ ତିଆରି ହୋଇଥିଲା ଭାରତୀୟ ଜନତା ପାର୍ଟୀ। ବିଜେପିର ପ୍ରତିଷ୍ଠା ଦିବସରେ ଶୁଭେଚ୍ଛା ଜଣାଇଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ବିଜେପି ସର୍ବଦା ଦେଶ ପ୍ରଥମ ନୀତି ଦ୍ୱାରା ପରିଚାଳିତ। ଦେଶ ପ୍ରଥମ ନୀତିରେ ପରିଚାଳିତ ହୋଇ ସମାଜ ସେବାରେ ଆଗୁଆ କାର୍ୟ୍ୟକର୍ତ୍ତାମାନେ ସେବା, ସମର୍ପଣ ଏବଂ ସୁଶାସନ ପ୍ରତି ଆଗ୍ରହ ପାଇଁ ଜଣାଶୁଣା। ବିଜେପିର କାର୍ୟ୍ୟକର୍ତ୍ତା ମାନେ ଲୋକଙ୍କୁ ଆମ ବିଚାରଧାରା ଏବଂ କାର୍ୟ୍ୟ ସହିତ ଯୋଡ଼ିବାରେ ସଫଳ ହୋଇଛନ୍ତି। ବିଜେପି ଲୋକଙ୍କ କଲ୍ୟାଣକୁ ଏହାର ଦୃଷ୍ଟିକୋଣର କେନ୍ଦ୍ରରେ ରଖେ। ବିଜେପି ଏକ ବିକଶିତ ଭାରତ ନିର୍ମାଣ ପାଇଁ ପ୍ରତିବଦ୍ଧ ବୋଲି ସୋସିଆଲ ମିଡିଆରେ ପୋଷ୍ଟ କରି କହିଛନ୍ତି ପ୍ରଧନମନ୍ତ୍ରୀ ମୋଦି।

ବିଜେପିର ପ୍ରତିଷ୍ଠା ଦିବସରେ ସମସ୍ତ ବିଜେପି କର୍ମକର୍ତ୍ତାଙ୍କୁ ହାର୍ଦ୍ଦିକ ଶୁଭେଚ୍ଛା ଜଣାଇଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହ। ଡକ୍ଟର ଶ୍ୟାମା ପ୍ରସାଦ ମୁଖାର୍ଜୀ ଏବଂ ପଣ୍ଡିତ ଦୀନଦୟାଲ ଉପାଧ୍ୟାୟଙ୍କ ଜାତୀୟତାବାଦୀ ଚିନ୍ତାଧାରା ଆଦର୍ଶ ଓ ବୈଚାରିକ ପ୍ରେରଣାରେ ଗଠିତ ଭାରତୀୟ ଜନତା ପାର୍ଟିର ପ୍ରତିଷ୍ଠା କେବଳ ଏକ ରାଜନୈତିକ ଘଟଣା ନଥିଲା, ବରଂ ଦେଶକୁ ପୁନଃନିର୍ମାଣ କରିବାର ଏକ ପ୍ରତିଜ୍ଞା ଥିଲା। ସମାଜର ଶେଷ ଧାଡ଼ିରେ ଥିବା ଲୋକଙ୍କ କଲ୍ୟାଣର ମୂଳ ଭାବନା ସହ ଆରମ୍ଭ ହୋଇଥିବା ବିଜେପି, ମୋଦିଙ୍କ ନେତୃତ୍ୱରେ, "ସବକା ସାଥ, ସବକା ବିକାଶ, ସବକା ବିଶ୍ୱାସ" ମନ୍ତ୍ରକୁ ସାକାର କରିଛି। ଦେଶକୁ ତୁଷ୍ଟୀକରଣରୁ ମୁକ୍ତ କରି ଏବଂ ସୁଶାସନ ଏବଂ ସ୍ୱଚ୍ଛତା ପ୍ରତିଷ୍ଠା କରି ବିଜେପି ଗଣତନ୍ତ୍ରର ମୂଳକୁ ମଜବୁତ କରିଛି। ଆଜି, ବିଜେପି କେବଳ ଏକ ଦଳ ନୁହେଁ, ବରଂ ୧୪୦ କୋଟି ଦେଶବାସୀଙ୍କ ସ୍ୱପ୍ନ ଏବଂ ଆକାଂକ୍ଷାର ପ୍ରତିନିଧି ପାଲଟିଛି ବୋଲି ସୋସିଆଲ ମିଡିଆରେ ପୋଷ୍ଟ କରି କହିଛନ୍ତି ଗୃହମନ୍ତ୍ରୀ ଅମିତ ଶାହ।