Tags : bjd

ଭୁବନେଶ୍ଵର: ସିଏଜି ରିପୋର୍ଟକୁ ନେଇ ବିଜେଡିର ପ୍ରତିକ୍ରିୟା । ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ କହିଛନ୍ତି ଯେ, ଯଦି ସିଏଜି ଏପରି ରିପୋର୍ଟ ଦେଇଛନ୍ତି ତାର ଅନୁଧ୍ୟାନ କରାଯାଉ । ଯଦି ଆଗରୁ ଡକାୟିତ ହୋଇଥିଲା ତାକୁ ଆଳ କରି ଆପଣ ଅଧିକ ଦୁର୍ନୀତି କରିବେ କି ବୋଲି ସରକାରଙ୍କୁ ପ୍ରଶ୍ନ କରିଛନ୍ତି । ସେ କହିଛନ୍ତି ଯେ, ଡିଏମଏଫ ଅନିୟମିତତା ବାବଦରେ ପୂର୍ବରୁ ଅନେକ ଥର ଉଠିଛି । ଜନହିତକାରୀ କାର୍ଯ୍ୟରେ ଏ ଟଙ୍କା ବ୍ୟବହାର ନ କରି ଅନ୍ୟ କ୍ଷେତ୍ରରେ ବ୍ୟବହାର ହୋଇଛି । ଖଣି ଅଞ୍ଚଳରେ ଏ ଟଙ୍କା ବ୍ୟବହାର ନ କରି ଖଣି ଅଞ୍ଚଳ ବହାରେ ଟଙ୍କା ଖର୍ଚ୍ଚ ହୋଇଛି । ଆଇନର ଉଲଙ୍ଘନ କରାଯାଇଛି । ଜିଲ୍ଲାପାଳମାନେ ଏ ଟଙ୍କାର ଅପବ୍ୟବହାର କରୁଛନ୍ତି ।
ଏହା ସହ ବିରୋଧୀ ଦଳ ଉପନେତା ସରକାରଙ୍କୁ ଖୋଲା ଚ୍ୟାଲେଞ୍ଜ୍ ଦେଇଛନ୍ତି । ସେ କହିଛନ୍ତି ଯେ, ଯଦି ୫ଟିରେ ଦୁର୍ନୀତି ହୋଇଛି ତଦନ୍ତ କାହିଁକି କରୁନ ? ସରକାରକୁ ଆସିଲା ପରେ ବଡ଼ ବଡ଼ କଥା କହୁଥିଲ । ଜେଲଖାନା ତିଆରି ରଖିଥିବା କଥା କହୁଥିଲ । ଆମେ କାହାକୁ ଭୟ କରୁନୁ । ଯଦି ତୁମ ପାଖରେ ପ୍ରମାଣ ଅଛି । ତୁମେ କାହାକୁ ଡ଼ରାଉଛ ? ସରକାର ତୁମର, ପୋଲିସ ତୁମର, ତଦନ୍ତ ସଂସ୍ଥା ତୁମର, ତୁମେ ସବୁ ନିଜେ ଅନିୟମିତତାର ଗୁରୁ ହୋଇଛ । ଓଡ଼ିଶାର ଜନ ସାଧାରଣ ସବୁ ଦେଖୁଛନ୍ତି ଠିକ୍ ସମୟରେ ଉତ୍ତର ଦେବେ । 
ସେହିପରି ସିଏଜି ରିପୋର୍ଟକୁ ନେଇ ରାଜ୍ୟ ସରକାରଙ୍କୁ ଘେରିଲା କଂଗ୍ରେସ । କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡ଼ାମ୍ କହିଛନ୍ତି ଯେ, ରାଜ୍ୟରେ ବିଜେପି ବିଜେଡି ମିଳିମିଶି ୯ ବର୍ଷ ଶାସନ କଲେ । ଏବେବି ଦୁଇ ଦଳ ଏକାକୀ ଅଛନ୍ତି । ତାହା ନହେଲେ ନିର୍ବାଚନ ପୂର୍ବରୁ କହୁଥିଲେ ଆମେ ସରକାରକୁ ଆସିଲେ ତଦନ୍ତ ହେବ । କୁଆଡେ ଗଲା ତଦନ୍ତ ? କାହା ବିରୁଦ୍ଧରେ କାର୍ଯ୍ୟାନୁଷ୍ଠନ ହୋଇଛି ? ଖଣି ଅଞ୍ଚଳରେ ଗାଁ ଲୋକଙ୍କ ସ୍ୱାର୍ଥକୁ ଦୃଷ୍ଟି ଦିଆଯାଇନି । ଖଣି କାରବାରରେ ବ୍ୟାପକ ହରିଲୁଟ୍ କରିଛନ୍ତି । ଆମେ ସେଥିପାଇଁ ଆଗରୁ ଦାବି କରିଥିଲୁ ଏବେବି କଂଗ୍ରେସ ବିଧାନସଭାରେ ଦାବି କରୁଥିଲା । ହେଲେ ଜାଣିଶୁଣି ବିଧାନସଭାକୁ ବନ୍ଦ କରିଦେଲେ । ଯାହାକୁ ନେଇ କଂଗ୍ରେସ ଦଳ ତୃଣମୂଳ ସ୍ତରକୁ ଯିବ । ସେହିଭଳି MMDR ପ୍ରସଙ୍ଗରେ ରାଜ୍ୟର ସ୍ୱାର୍ଥ ହାନି ହେବ । ଏହାଦ୍ବାରା ରାଜ୍ୟ ୧ ଲକ୍ଷ କୋଟିରୁ ଅଧିକ ଟଙ୍କା କ୍ଷତି ସହୁଥିବା ବେଳେ ଆମ ଦଳ ସ୍ୱତନ୍ତ୍ର ଆଲୋଚନା ପାଇଁ ବିଧାନସଭାରେ ଦାବି କରିଥିଲା । ହେଲେ ସରକାର ଆଲୋଚନା ତ କଲେନି ବରଂ ଗୃହକୁ ବନ୍ଦ କରିଦେଲେ । ହେଲେ କଂଗ୍ରେସ ଚୁପ୍ ବସିବନି । ଓଡ଼ିଶାର ସ୍ୱାର୍ଥ ପାଇଁ ଲଢ଼େଇ ଜାରି ରଖିବ ।