Tags : accident

ବୌଦ୍ଧ: ଏକ ଦୁଃଖଦ ଘଟଣାରେ, ଗତକାଲି ରାତିରେ ଓଡ଼ିଶାର ବୌଦ୍ଧ ଜିଲ୍ଲାରେ ଏକ ସଡ଼କ ଦୁର୍ଘଟଣାରେ ଦମ୍ପତିଙ୍କ ମୃତ୍ୟୁ ଘଟିଛି। ସବୁଠାରୁ ଦୁଃଖଦ କଥା ହେଉଛି ବ୍ୟକ୍ତି ଜଣଙ୍କ ପତ୍ନୀଙ୍କ ସହିତ ପିତାଙ୍କ ଅନ୍ତିମ ସଂସ୍କାରରେ ଯୋଗଦେବାକୁ ଯାଉଥିଲେ ବେଳେ ତାଙ୍କ କାର୍‌ଟି ଦୁର୍ଘଟଣାଗ୍ରସ୍ତ ହୋଇଥିଲା। ନୂଆପଡା ଜିଲ୍ଲାରେ କୁରୁମପୁରୀ ହାଇସ୍କୁଲରେ ପ୍ରଧାନ ଶିକ୍ଷକ କରୁଥିଲେ ରାଜକିଶୋର ସାହୁ । ହଠାତ ବାପା ବଲ୍ଲଭ ସାହୁଙ୍କ ମୃତ୍ୟୁ ଖବର ପାଇ ଉଭୟ ପୁଅ ରାଜକିଶୋର ସାହୁ ଓ ବୋହୂ ମିନାକ୍ଷୀ ସାହୁ ନିଜ ଗାଁ ନୟାଗଡ ଜିଲ୍ଲା ଗଣିଆ ଥାନା ପାଟଣାସାହିକୁ ବୁଧବାର ବାହାରିଥିଲେ । ସେମାନଙ୍କ କାର୍ ଖୋର୍ଦ୍ଧା-ବଲାଙ୍ଗୀର ଜାତୀୟ ରାଜପଥ ନମ୍ବର ୫୭ରେ ବୌଦ୍ଧ ଜିଲ୍ଲାର ନୂଆପଡ଼ା ଅଞ୍ଚଳ ଦେଇ ଯାଉଥିବା ସମୟରେ ବୌଦ୍ଧ ଥାନା ରାମ୍ଭୀକଟା ଟୋଲ୍ ଗେଟ୍ ନିକଟରେ ରାସ୍ତା କଡ଼ରେ ଠିଆ ହୋଇଥିବା ଖୁଦ ବୋଝେଇ ଟ୍ରକ୍ ସହିତ ମୁହାଁମୁହିଁ ଧକ୍କା ହୋଇଥିଲା। ଫଳରେ ରାଜ କିଶୋର ସାହୁ ଓ ପତ୍ନୀ ମିନାକ୍ଷୀ ସାହୁ ଗୁରୁତର ହୋଇଥିଲେ । ବିଳମ୍ବିତ ରାତିରେ ତାଙ୍କୁ ତୁରନ୍ତ ବୌଦ୍ଧ ମେଡିକାଲରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ଉଭୟଙ୍କୁ ମୃତ ଘୋଷଣା କରିଥିଲେ । ଏଭଳି ଘଟଣାକୁ ନେଇ ପରିବାର ଓ ଗଣିଆ ଅଞ୍ଚଳରେ ଶୋକର ଛାୟା ଖେଳିଯାଇଛି ।ସୂଚନା ପାଇବା ପରେ ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।