Tags : niranjan_patnaik_odisha_politics

ଭୁବନେଶ୍ୱର : ମୋଡ଼ ବଦଳାଇଛି ରାଜ୍ୟ ରାଜନୀତି । ଏକଦା ୨୦୧୯ ରାଜନୈତିକ ଦୌଡ଼ ପାଇଁ ମାତ୍ର ଦୁଇ ପ୍ରତିଯୋଗୀ ଟ୍ରାକ୍ରେ ଠିଆ ହୋଇଥିବା ପ୍ରତୀୟମାନ ହେଉଥିଲା । ଅନ୍ୟ ପ୍ରତିଯୋଗୀମାନେ ଠିଆ ହୋଇଥିଲେ ବି ରାଜନୈତିକ ଦୃଷ୍ଟିକୋଣରୁ ସେମାନେ ଝାପସା ଝାପସା ପରିଲକ୍ଷିତ ହେଉଥିଲେ । କିନ୍ତୁ ଏବେ ଦୁଇ ପ୍ରତିଯୋଗୀଙ୍କ ସହ ପ୍ରତିଦ୍ୱନ୍ଦ୍ୱିତା କରିବା ପାଇଁ ପୂରା ଜୋଶ୍ରେ ଠିଆ ହୋଇସାରିଲେଣି ଆଉ ଏକ ପ୍ରତିଯୋଗୀ । ଏଭଳି ଗୌରଚନ୍ଦି୍ରକା କରି ଆମେ ରାଜ୍ୟର ତିନି ପ୍ରମୁଖ ଦଳ ବିଜେଡି, ବିଜେପି ଓ କଂଗ୍ରେସ କଥା ହିଁ କହୁଛୁ । ଏକଦା ସାରା ରାଜ୍ୟର ରାଜନୀତି ବିଜେଡି ଓ ବିଜେପି ଉପରେ କେନ୍ଦ୍ରୀଭୂତ ହୋଇଥିବା ବେଳେ ନିରଞ୍ଜନ ପଟ୍ଟନାୟକ କଂଗ୍ରେସ ମଙ୍ଗ ଧରିବା ପରେ ସେ ମଧ୍ୟ ଆକର୍ଷଣର କେନ୍ଦ୍ରବିନ୍ଦୁ ପାଲଟିଛନ୍ତି । ଦୀର୍ଘଦିନ ପରେ କଂଗ୍ରେସ ତା’ର କାର୍ଡ ଖୋଲିଥିବା ବେଳେ ବିଜେଡି ଓ ବିଜେପିର ପୂର୍ବ ରଣନୀତି ବଦଳିବା ସହ ରାଜ୍ୟ ରାଜନୀତିର ସମୀକରଣ ମଧ୍ୟ ବଦଳିଯାଇଛି ବୋଲି ରାଜନୈତିକ ବିଶ୍ଳେଷକମାନେ ମତପୋଷଣ କରିଛନ୍ତି । 

ବିଜେଡି ଓ ବିଜେପିର ସାଂଗଠନିକ ସ୍ଥିତି ସହ ବିପୁଳ ଅର୍ଥ ଲଢେ଼ଇରେ ପ୍ରସାଦ ହରିଚନ୍ଦନ କଂଗ୍ରେସ ବହୁ ପଛରେ ପଡ଼ିଯାଇଥିଲା । ଫଳରେ କଂଗ୍ରେସ କର୍ମୀମାନେ ବୀତସ୍ପୃହ ହୋଇପଡ଼ିବା ସ୍ୱାଭାବିକ  । ପ୍ରତି ନିର୍ବାଚନରେ କଂଗ୍ରେସ ଶୋଚନୀୟ ଭାବେ ପରାଜୟ ବରଣ କରିଥିଲା  । ଗତ ଦୁଇ ଦଶନ୍ଧି ମଧ୍ୟରେ କଂଗ୍ରେସ ବହୁବାର ପରାଜୟର ସାମ୍ନା କରିଥିଲେ ମଧ୍ୟ ୨୦୧୪ ପରେ ଧୀରେଧୀରେ କଂଗ୍ରେସ ତୃତୀୟ ସ୍ଥାନକୁ ଠେଲି ହୋଇଯାଇଥିଲା । ୨୦୧୭ ପଞ୍ଚାୟତ ନିର୍ବାଚନରେ କଂଗ୍ରେସର ସ୍ଥିତି ଯେଉଁଭଳି ଭାବେ ବିପର୍ଯ୍ୟସ୍ତ ହୋଇପଡ଼ିଥିଲା ଅତୀତରେ ସେମିତି କେବେ ଦେଖିବାକୁ ମିଳିନଥିଲା । କଂଗ୍ରେସକୁ ହଟାଇ ବିଜେପି ହିଁ ବିକଳ୍ପ ଭାବେ ଉଭା ହୋଇଥିଲା । ଯେଉଁଥିପାଇଁ ବିଜେପି ୧୨୦ ମିଶନର ସ୍ୱପ୍ନ ଦେଖିଥିବାବେଳେ କଂଗ୍ରେସ ଓଡ଼ିଶାରୁ ପୂରା  ନିଶ୍ଚିହ୍ନ ହୋଇପଡ଼ିଲା ବୋଲି ମନେ ହୋଇଥିଲା । ଦଳର ଏଭଳି ବେହାଲ୍ ହାଲ୍ ଦେଖି ଜଣଙ୍କ ପରେ ଜଣେ କଂଗ୍ରେସ ନେତା ଦଳ ଛାଡ଼ିବାକୁ ବାଧ୍ୟ ହୋଇଥିଲେ । ସ୍ଥିତି ଏମିତି ହୋଇଥିଲାଯେ, ଯଦି କଂଗ୍ରେସ ନେତାମାନେ ଏକାଠି ନହୁଅନ୍ତି ତେବେ ୨୦୧୯ ନିର୍ବାଚନ ପୂର୍ବରୁ ଭାଡ଼ି ଖାଲି ହୋଇଯିବ ବୋଲି ମନେ ହେଉଥିଲା । ଏମିତିକି କେହି କେହି କଂଗ୍ରେସକୁ ୧୪୭ ଆସନ ପାଇଁ ପ୍ରାର୍ଥୀ ମିଳିବେନି ବୋଲି କହିବାକୁ ପଛେଇନଥିଲେ । ବିଶେଷକରି କଂଗ୍ରେସର ଏଭଳି ଦୋଦୂଲ୍ୟମାନ ସ୍ଥିତି ବିଜେପି ପାଇଁ ଟନିକ୍ ଭଳି କାମ କରିଥିଲା । ଗାଁ ଗାଁରେ ବିଜେଡ଼ି ଓ କଂଗ୍ରେସ ମଧ୍ୟରେ ଲଢେ଼ଇ ହୋଇ ଆସୁଥିବାରୁ ବିଜେଡ଼ି ନେତାମାନଙ୍କୁ ପାନେ ଦେବା ପାଇଁ ସେମାନେ ବିଜେପିକୁ ଭୋଟ୍ ଦେବା ପାଇଁ ବାଧ୍ୟ ହୋଇଥିଲେ । ବସ୍ତୁତଃ ତୃଣମୂଳସ୍ତରର କଂଗ୍ରେସିଆଙ୍କ ସେହି ରଣନୀତି କାମ କରିଥିଲା । ବିଜେଡ଼ିକୁ ଝଟକା ଲାଗିଥିଲା । ତେବେ ଏହାର ଦୀର୍ଘମିଆଦୀ ଫାଇଦା ବିଜେପିକୁ ହିଁ ମିଳିଥିଲା । ଏହି ମଉକାରେ ଅନେକ କଂଗ୍ରେସ କର୍ମୀ ବିଜେପି ଆଡ଼କୁ ମନ ବଳାଇବାକୁ ବାଧ୍ୟ ହୋଇଥିଲେ । ଏପରିକି ବିଜେପୁର ନିର୍ବାଚନରେ ବି କଂଗ୍ରେସ ଅମାନତ ହରାଇବାକୁ ବାଧ୍ୟ ହୋଇଥିଲା । ଗୋଟିଏ ପଟେ ଗୋଷ୍ଠୀକନ୍ଦଳର ଭାଇରସ୍ କଂଗ୍ରେସର ବଡ଼ ନେତାମାନଙ୍କୁ ଘାଇଲା କରିଦେଇଥିବାବେଳେ ଅପରପକ୍ଷରେ ତୃଣମୂଳସ୍ତରର ନେତାମାନେ ଆଶା ଛାଡ଼ି ଦେଇଥିଲେ  । କିନ୍ତୁ ଅକ୍ଷୟତୃତୀୟାରେ ନୂଆ ବିହନ ବୁଣିବା ଆରମ୍ଭ କରିଥିଲା କଂଗ୍ରେସ  । ଏକଦା ଅକ୍ଷୟତୃତୀୟାରେ ହିଁ ନିରଞ୍ଜନ ପଟ୍ଟନାୟକଙ୍କ ପିସିସି ଚଉକିକୁ କାଢ଼ି ନେଇଥିଲେ ଏଆଇସିସି ହାଇକମାଣ୍ଡ  । କିନ୍ତୁ ପୁଣି ପଟ ବଦଳିବାରୁ ଚଳିତ ବର୍ଷ ଅକ୍ଷୟତୃତୀୟା ବାସି ଦିନ ପୁଣି ନିରଂଜନଙ୍କ ହାତକୁ ପିସିସି ଚଉକି ଫେରିଆସିଛି । ଯଦିଓ ଅକ୍ଷୟତୃତୀୟା ବାସି ଦିନ ନିରଞ୍ଜନଙ୍କୁ ପିସିସି ମୁଖିଆ ଭାବେ ଘୋଷଣା କରାଯାଇଥିଲା, ତେବେ ବାସ୍ତବରେ ଅକ୍ଷୟତୃତୀୟା ଦିନ ହିଁ ତିନି କଂଗ୍ରେସ ନେତାଙ୍କୁ ଦିଲ୍ଲୀ ଡାକି ପିସିସି ନବକଳେବରର ମୂଳଦୁଆ ପଡ଼ିଥିଲା ।

ପୂର୍ବରୁ ଆମେ କହିରଖିଛୁ, ନିରଞ୍ଜନଙ୍କ ଉପରେ ସବୁ ଦଳର ନିଘା ରହିଥିଲା  । ନିରଞ୍ଜନ ପିସିସି ସଭାପତି ହେଲେ ରାଜ୍ୟ ରାଜନୀତି ବଦଳିଯିବ ବୋଲି ଆମେ ପୂର୍ବାନୁମାନ କରିସାରିଥିଲୁ  । କାହିଁକିନା ପ୍ରସାଦଙ୍କ କଂଗ୍ରେସକୁ ମାତ୍ ଦେବା ପାଇଁ ବିଜେଡ଼ି ଓ ବିଜେପି ଯେଉଁ ରଣନୀତି କରିବେ ନିରଞ୍ଜନଙ୍କ କଂଗ୍ରେସକୁ ମାତ ଦେବା ପାଇଁ ସେହି ରଣନୀତି କାଟୁ କରିବ ନାହିଁ  । ତେଣୁ  ଦୁଇ ଦଳ ରଣନୀତି ବଦଳାଇବାକୁ ବାଧ୍ୟ ହେବେ । ବସ୍ତୁତଃ ବିଜେଡ଼ି ଓ ବିଜେପି ଅଳିନ୍ଦରେ ହିଁ ସମାନ ଚର୍ଚ୍ଚା ପର୍ଯ୍ୟାଲୋଚନା ଦେଖିବାକୁ ମିଳିଛି  ।

ନିରଞ୍ଜନ ପଟ୍ଟନାୟକ ପିସିସି ସଭାପତି ହେବା ପରେ ସବୁଠୁ ବେଶୀ ଟେନସନରେ ପଡ଼ିଯାଇଛି ବିଜେପି । କାରଣ କଂଗ୍ରେସ ପଙ୍କରେ ହିଁ ବିଜେପିର ଫୁଲ ଫୁଟିଥିଲା । ଏବେ କଂଗ୍ରେସ ନିଜ ଘର ସଜାଡ଼ିବା ଆରମ୍ଭ କରିଦେଇଥିବାରୁ ଫୁଲ ନାଡ଼ ଭାଙ୍ଗିବା ନିଶ୍ଚିତ ହୋଇଯାଇଛି  । ଯେଉଁଥିପାଇଁ ଗତ କିଛିଦିନ ଧରି ଧର୍ମେନ୍ଦ୍ର ପ୍ରଧାନଙ୍କ କ୍ୟାମ୍ପରେ ଅହେତୁକ ନୀରବତା ଛାଇ ଯାଇଛି । ଗୋଟିଏ ପଟେ ସାରା ଦେଶରେ ପେଟ୍ରୋଲ ଓ ଡିଜେଲ ଦର ବୃଦ୍ଧି ନେଇ ଅସନ୍ତୋଷ ତୀବ୍ର ହେଉଥିବାବେଳେ ଅପରପକ୍ଷରେ ସିରିଆ ଯୁଦ୍ଧ ପୁଣି ସ୍ଥିତିକୁ ସଂଗୀନ କରିଦେଇଛି  । ସେହିପରି ପଂଚାୟତ ନିର୍ବାଚନରେ ବିପୁଳ ସଫଳତା ସତ୍ତ୍ୱେ ବିଜେପୁର ଉପନିର୍ବାଚନରେ ବିଜେପିର ଲଜ୍ଜାଜନକ ପରାଜୟ ଧର୍ମେନ୍ଦ୍ରଙ୍କ ପତିଆରା ଉପରେ ପ୍ରଶ୍ନଚିହ୍ନ ଲଗାଇସାରିଛି  । ସଂଘଭୁକ୍ତ ନେତାମାନେ ବି ଧର୍ମେନ୍ଦ୍ରଙ୍କ ପତିଆରାକୁ ଗ୍ରହଣ କରିବା ମୁଡ଼୍ରେ ନଥିବାରୁ ଧୀରେଧୀରେ ବିଜେପିର ସାଂଗଠନିକ ପରିବର୍ତ୍ତନ ଦେଖିବାକୁ ମିଳିଛି । ଇତିମଧ୍ୟରେ ବିଜେପିର ସଂଗଠନ ସାଧାରଣ ସମ୍ପାଦକ ବଦଳି ସାରିଥିବାବେଳେ ସଭାପତି ପଦ ବଦଳିବା ନେଇ ଚର୍ଚ୍ଚା ଜୋର ଧରିଛି । ଧର୍ମେନ୍ଦ୍ର ବର୍ତ୍ତମାନ ଏହି ଟେନସନର ସାମ୍ନା କରୁଥିବାବେଳେ ପୁଣି ନିରଞ୍ଜନଙ୍କ ଟେନସନ ଆସିଯାଇଛି । କାହିଁକିନା ଧର୍ମେନ୍ଦ୍ର ବିଜେପି ଭୋଟ ବୃଦ୍ଧିର ଶ୍ରେୟ ନେଉଥିଲେ । କିନ୍ତୁ ବାସ୍ତବରେ ବିଜେପିର ଭୋଟ୍ ବୃଦ୍ଧି ବାସ୍ତବରେ ଧର୍ମେନ୍ଦ୍ରଙ୍କ ଲୋକପ୍ରିୟତା କିମ୍ବା ସାଂଗଠନିକ ଦୃଷ୍ଟିକୋଣରୁ ହୋଇନଥିଲା । ବରଂ ଏହାର ବଡ଼ ଭାଗ କଂଗ୍ରେସ କର୍ମୀମାନଙ୍କ ସୌଜନ୍ୟରୁ ହିଁ ଆସିଥିଲା । କଂଗ୍ରେସ ଯଦି ଏକଜୁଟ୍ ହୁଏ ତେବେ ସାରା ରାଜ୍ୟରେ ଏହା ବି ନିଜର ଦବଦବା ଦେଖାଇପାରିବ । ଅତୀତରେ ଖୋଦ୍ ଧର୍ମେନ୍ଦ୍ର ଏହା ପରୋକ୍ଷରେ ସ୍ୱୀକାର କରିସାରିଛନ୍ତି  । ସେ ନିଜେ କହିଥିଲେଯେ, ପ୍ରତି ଗାଁରେ କଂଗ୍ରେସର କର୍ମୀ ଅଛନ୍ତି । ସେମାନଙ୍କୁ କରାୟତ୍ତ କରାଯାଇପାରିଲେ ହିଁ  ବିଜୟ ସମ୍ଭାବନା ଉଜ୍ଜ୍ୱଳ ହୋଇପାରିବ । କିନ୍ତୁ ନିରଞ୍ଜନ ସଭାପତି ହେବା ପରେ ଆଉ ବିଜେପି କଂଗ୍ରେସ ଭୋଟରେ ହାତ ମାରିପାରିବ ନାହିଁ ବୋଲି କହିଲେ ଅତୁ୍ୟକ୍ତି ହେବନି ।

ନିରଞ୍ଜନ ପିସିସି ମଙ୍ଗୁଆଳ ହେବା ପରେ ବିଜେପିର ଟେନସନ ବଢ଼ିଯାଇଥିବାବେଳେ ବିଜେଡ଼ି ଟେନସନ ଫ୍ରି ହୋଇଯାଇଛି । କାହିଁକିନା ସରକାରୀ ବିରୋଧୀ ଭୋଟ୍ ଏବେ ଦୁଇ ଭାଗ ହୋଇଯିବ । ଏମିତିବି ଏବେ ମଧ୍ୟ ପ୍ରତି ଗାଁରେ ବିଜେଡ଼ିର ଦବଦବା ରହିଆସିଛି । ଫଳରେ ୨୦୧୯ର ପଥ ସୁଗମ ହୋଇପାରିବ । ଏହି ପରିପ୍ରେକ୍ଷୀରେ କନକବର୍ଦ୍ଧନ ସିଂହଦେଓଙ୍କ ମତକୁ ଅନୁଶୀଳନ କଲେ ବିଜେପି ମନରେ ଥିବା ଭୟ ଆପେଆପେ ଦୃଷ୍ଟିଗୋଚର ହୋଇଯିବ । ନିରଞ୍ଜନ ସଭାପତି ହେବା ପରେ କନକବର୍ଦ୍ଧନ ସିଂହଦେଓ କହିଥିଲେଯେ, ନବୀନଙ୍କ ଇସାରାରେ ଏଭଳି ହୋଇଛି । ଏହି ପରିପ୍ରେକ୍ଷୀରେ ସେ ସୌମ୍ୟରଂଜନଙ୍କ ବିଜେଡ଼ି ଲିଙ୍କ୍ର ଅବତାରଣା କରିଛନ୍ତି  । ତେବେ ତାତ୍ତ୍ୱିକ ଦୃଷ୍ଟିକୋଣରୁ ଅନୁଶୀଳନ କଲେ ଏହାକୁ ଗ୍ରହଣ କରାଯାଇପାରିବ ନାହିଁ । କାହିଁକିନା ଗତ ଦୁଇ ବର୍ଷ ଧରି କଂଗ୍ରେସର ସବୁ ଆଗଧାଡ଼ିର ନେତା ନେତୃତ୍ୱ ବଦଳିବା ନେଇ ଦିଲ୍ଲୀ ଯାଉଥିଲେ । ପ୍ରସାଦଙ୍କୁ ହଟାଇ ନିରଞ୍ଜନଙ୍କୁ ଦାୟିତ୍ୱ ଦିଆଯାଉ ବୋଲି ତୃଣମୂଳସ୍ତରର କଂଗ୍ରେସ କର୍ମୀମାନେ ମଧ୍ୟ ଦାବି କରି ଆସୁଥିଲେ । ଖାଲି ସେତିକିନୁହେଁ ଖୋଦ୍ ବିଧାୟକ ଦଳ ଓ ପିସିସି ମଧ୍ୟରେ ଅପଡ଼ ରହିଥିଲା  । ଏମିତିକି ଅନେକ ବିଧାୟକ ପ୍ରସାଦଙ୍କ ନେତୃତ୍ୱରେ ନିର୍ବାଚନ ଲଢ଼ିପାରିବେ ନାହିଁ ବୋଲି ମତ ଦେଇ ଆସୁଥିଲେ । ଯଦି ପ୍ରସାଦଙ୍କ ନେତୃତ୍ୱରେ ଦଳ ସୁଦୃଢ଼ ହେଉଥା’ନ୍ତା ଓ ନିରଂଜନଙ୍କୁ ଉକ୍ତ ଦାୟିତ୍ୱରେ ଅବସ୍ଥାପିତ କରାଯାଇଥା’ନ୍ତା ତେବେ କେଭିଙ୍କ ଅଭିଯୋଗ ଗ୍ରହଣୀୟ ହୋଇପାରନ୍ତା  । ଅନ୍ୟଦୃଷ୍ଟିରୁ ଦେଖିଲେ ନିରଞ୍ଜନ ସଭାପତି ହୁଅନ୍ତୁ ବୋଲି ବୋଧହୁଏ ବିଜେପି ନେତାମାନେ ଚାହୁଁନଥିଲେ । କାରଣ ନିରଞ୍ଜନ ସଭାପତି ହେଲେ ବିଜେପି ହିଁ ଘାଟାରେ ପଡ଼ିବ ବୋଲି ସେମାନେ ଜାଣିସାରିଛନ୍ତି । ଫଳରେ ଏବେ ବିଜେପି ତାହାର ରଣନୀତି ବଦଳାଇବା ନିଶ୍ଚିତ ହୋଇଯାଇଛି ।

ଏହି ପରିପ୍ରେକ୍ଷୀରେ ରାଜନୀତିକ ମହଲରେ ଭିନ୍ନ ଚର୍ଚ୍ଚା ଜୋରଧରିଛି । ପଟ୍ଟନାୟକ ପରିବାରକୁ କଂଗ୍ରେସରୁ ଦୂରେଇ ରଖିବା ପାଇଁ ରାହୁଳ ଗାନ୍ଧି ଚାହୁଁଥିଲେ । ତେବେ ହଠାତ୍ କାହିଁକି ନିରଞ୍ଜନଙ୍କ ମୁଣ୍ଡରେ ଶିରିପା ବାନ୍ଧିଲେ? ଏମିତିକି ନିରଞ୍ଜନ ମଧ୍ୟ ଆଶା ଛାଡ଼ି ଦେଇଥିଲେ । ତେଣୁ କେଉଁ ଅଦୃଶ୍ୟ ଶକ୍ତିର ଇସାରାରେ ନିରଂଜନଙ୍କୁ ସଭାପତି କରାଯାଇଛି ବୋଲି ଚର୍ଚ୍ଚା ହେବା ସହ ନବୀନଙ୍କ ଆଡ଼କୁ ଇଶାରା କରାଯାଉଛି । ତେବେ ଏହି ପ୍ରଶ୍ନର ଉତ୍ତର ବି ଅତି ସାଧାରଣ । ବର୍ତ୍ତମାନ ଦେଶରେ ବି କଂଗ୍ରେସ ଦଳ ଆର୍ଥିକ ସଂକଟ ଦେଇ ଗତିକରୁଛି । ବିଜେପିର ରାଜନୈତିକ ଚାନ୍ଦା ବୃଦ୍ଧି ପାଇଥିବାବେଳେ କଂଗ୍ରେସର ହ୍ରାସ ପାଇଛି । ତେଣୁ ଓଡ଼ିଶାରେ ଜଣେ ବିତ୍ତଶାଳୀ ନେତାଙ୍କୁ ଦାୟିତ୍ୱ ଦେବା ପାଇଁ ରାହୁଲ ନିରଞ୍ଜନଙ୍କୁ ବାଛିବା ସ୍ୱାଭାବିକ । ଖାଲି ସେତିକିନୁହେଁ କଂଗ୍ରେସର ସବୁ ଆଗଧାଡ଼ିର ନେତାଙ୍କ ଠାରୁ ଆରମ୍ଭ କରି ତୃଣମୂଳସ୍ତର ଯାଏଁ ନିରଞ୍ଜନଙ୍କୁ ଚାହୁଁଛନ୍ତି ବୋଲି ରାହୁଲ ବି ବୁଝି ସାରିଛନ୍ତି  । ତେଣୁ ଇଚ୍ଛା ଥାଉ ବା ନଥାଉ କର୍ମୀ ଓ ନେତାଙ୍କ ଚାପରେ ସେ ଏଭଳି ନିଷ୍ପତ୍ତି ନେବାକୁ ବାଧ୍ୟ ହେବା ସ୍ୱାଭାବିକ ।

ସାରା ରାଜ୍ୟରେ ଏବେ ନିରଞ୍ଜନଙ୍କ ସମ୍ବର୍ଦ୍ଧନା ପର୍ବ ବେଶ୍ ଚର୍ଚ୍ଚା ସୃଷ୍ଟି କରିଛି  । ବିମାନ ୨ ଘଣ୍ଟା ବିଳମ୍ବିତ ହୋଇଥିଲେ ବି ହଜାର ହଜାର କର୍ମୀ ଓ ନେତା ତାଙ୍କୁ ଭବ୍ୟ ସ୍ୱାଗତ ଜଣାଇଥିଲେ । ଏମିତିକି ବିମାନବନ୍ଦରରୁ କଂଗ୍ରେସ ଭବନରେ ପହଁଚିବା ପାଇଁ ଦୁଇ ଘଣ୍ଟା ଲାଗି ଯାଇଥିଲା  । ଦଳର ସବୁ ନେତା ମଞ୍ଚ ଉପରେ ନିରଞ୍ଜନଙ୍କୁ ପ୍ରଶଂସାରେ ପୋତି ପକାଇଥିଲେ । ପ୍ରସାଦ ହରିଚନ୍ଦନଙ୍କ ଠାରୁ ନେଇ ଜୟଦେବ ଜେନା ଓ  ନରସିଂହ ମିଶ୍ରଙ୍କ ପର୍ଯ୍ୟନ୍ତ ସମସ୍ତେ ଏକ ହୋଇ କାମ କରିବାକୁ ଆହ୍ୱାନ ଦେଇଥିଲେ । ସବୁଠାରୁ ବଡ଼ କଥା ହେଉଛି ନିରଞ୍ଜନଙ୍କ ସମ୍ବଦ୍ଧ୍ୱର୍ନା ମଞ୍ଚରେ ତାଙ୍କର ଫଟୋ ମଧ୍ୟ ଲାଗିନଥିଲା । ସ୍ୱାଗତମ୍ ଗେଟ୍ରେ ମଧ୍ୟ ନିରଞ୍ଜନଙ୍କ ଫଟୋ ନଥିଲା । ବରଂ ଗେଟ୍ ଓ ମଂଚରେ ତିନି କାର୍ଯ୍ୟକାରୀ ସଭାପତି ନବ କିଶୋର ଦାସ, ଚିରଞ୍ଜିବୀ ବିଶ୍ୱାଳ ଓ ପ୍ରଦୀପ ମାଝୀଙ୍କ ଫଟୋ ଲାଗିଥିଲା । ଅର୍ଥାତ୍ ପ୍ରସାଦଙ୍କ ‘ମୁଁ ନୁହେଁ ଆମେ’ ଭଳି ନିରଞ୍ଜନ ‘ମୁଁ ନୁହେଁ ଆପଣମାନେ’ ବୋଲି ବାର୍ତ୍ତା ଦେଇଛନ୍ତି । ଖାଲି ସେତିକିନୁହେଁ ପୂର୍ବ ଭୁଲ ମନେ ପକାଇଦେବା ସହ ସେଥିରୁ ଶିକ୍ଷା ଗ୍ରହଣ ପାଇଁ ନିରଞ୍ଜନ ଆହ୍ୱାନ ଦେଇଥିଲେ  । ଯୁବ ନେତାମାନଙ୍କ ଉପରେ ମଧ୍ୟ ସେ ଫୋକସ କରିଛନ୍ତି । ମେ’ରୁ ହିଁ ନିରଞ୍ଜନ ନିଜର ରଣନୀତି ଆଧାରରେ କାର୍ଯ୍ୟ କରିବାକୁ ଯାଉଛନ୍ତି । ହେଲିକପ୍ଟରରେ ସେ ସାରା ଓଡ଼ିଶା ବୁଲିବେ । ୩୦ଟି ଜିଲ୍ଲା ୩୧୪ ବ୍ଲକର କାର୍ଯ୍ୟକର୍ତ୍ତାଙ୍କୁ ଭେଟି ଆଲୋଚନା କରିବେ । 

ମିଳିଥିବା ସୂଚନାନୁଯାୟୀ ନିରଞ୍ଜନ ଭୁବନେଶ୍ୱରରେ ଖୁବ୍ କମ୍ ସମୟ କାଟିବେ । ଆଗାମୀ ପୌର ନିର୍ବାଚନ ଓ ସାଧାରଣ ନିର୍ବାଚନକୁ ଆଖିଆଗରେ ରଖି ମେ’ରୁ ହିଁ ସେ ସାରା ଓଡ଼ିଶା ବୁଲି କଂଗ୍ରେସର ସ୍ଥିତି ପରଖିବେ  । ପ୍ରତି ବ୍ଲକ୍ରେ ମଧ୍ୟ କଂଗ୍ରେସର ସମାବେଶ କରାଯିବ  । ଇତିମଧ୍ୟରେ ନିରଞ୍ଜନ ନିଜର ରାଜନୈତିକ କାର୍ଯ୍ୟକ୍ରମ ପାଇଁ ଏକ ଟିମ୍ ଗଠନ କରି ସାରିଛନ୍ତି  । ସୋସିଆଲ ମିଡ଼ିଆରୁ ନେଇ ଦଳର ପ୍ରଚାର ପ୍ରସାର, ପୋଷ୍ଟର, ଲିଫଲେଟ୍ ଆଦି ପାଇଁ ତାଙ୍କର ଲୋକ ରେଡ୍ଡୀ ହୋଇ ରହିଛନ୍ତି  । ଖୁବ୍ କମ୍ ଦିନରେ ଓଡ଼ିଶାର ପ୍ରତି ଗାଁରେ କଂଗ୍ରେସର ପୋଷ୍ଟର ବ୍ୟାନର ଲଗାଇବା ପାଇଁ ନିରଞ୍ଜନ ରଣନୀତି କରିଛନ୍ତି  । ପୁଣି ସୁପ୍ତ ସିଂହ ଜାଗ୍ରତ ହେବା ଭଳି କଂଗ୍ରେସ ଉଠୁଛି ବୋଲି ନିରଞ୍ଜନ ବାର୍ତ୍ତା ଦେବାକୁ ଯାଉଛନ୍ତି  । ଖାଲି ସେତିକିନୁହେଁ ନିଜ ଦଳର ଯେଉଁ ଟାଣୁଆ ନେତାମାନେ ବିଜେଡ଼ି କିମ୍ବା ବିଜେପିକୁ ଚାଲି ଯାଇଛନ୍ତି ସେମାନଙ୍କୁ ପୁଣି ଦଳକୁ ଆଣିବା ପାଇଁ ନିରଞ୍ଜନ ‘ଘରବାହୁଡ଼ା’ ମିଶନ ଆରମ୍ଭ କରିବାକୁ ଚିନ୍ତା କରୁଛନ୍ତି  । କଂଗ୍ରେସ ତା’ର କାଡର଼୍ ଖୋଲି ସାରିଥିବାବେଳେ ଏବେ ବିଜେଡ଼ି ଓ ବିଜେପି ପାଳି  । କଂଗ୍ରେସକୁ ମାତ୍ ଦେବା ପାଇଁ ଦୁଇ ଦଳ କିଭଳି ଢ଼ଙ୍ଗରେ ରଣନୀତି କରୁଛନ୍ତି ତାହା ଉପରେ ସମସ୍ତଙ୍କ ନିଘା ରହିଛି  । ବିଶେଷକରି ଗଣମାଧ୍ୟମଗୁଡ଼ିକ ଉପରେ ବି ସମସ୍ତଙ୍କର ଫୋକସ ରହିବା ସ୍ୱାଭାବିକ  । କାହିଁକିନା ବିଗତ କିଛି ବର୍ଷ ଧରି ଗଣମାଧ୍ୟମ ବିଜେଡ଼ି ଓ ବିଜେପି ଉପରେ ଗୁରୁତ୍ୱାରୋପ କରିଆସୁଥିଲା  । କିନ୍ତୁ ନିରଞ୍ଜନ ସଭାପତି ହେବା ପରେ ଏବେ ଗଣମାଧ୍ୟମ କଂଗ୍ରେସକୁ ହିଁ ଗୁରୁତ୍ୱ ଦେବାକୁ ବାଧ୍ୟ ହେବ  । ଫଳରେ କଂଗ୍ରେସ ପୁଣି ଉଠୁଛି ବୋଲି ବାର୍ତ୍ତା ଦେବାରେ ଗଣମାଧ୍ୟମଗୁଡ଼ିକ ସହାୟକ ହୋଇପାରିବେ । ତଥାପି ବି କଂଗ୍ରେସ ନେତାଙ୍କ ମନରେ ଆଶଙ୍କା ରହିଛି । ଅତୀତରେ ସମ୍ବଦ୍ଧ୍ୱର୍ନା ପର୍ବ ବେଳେ ସମସ୍ତେ ଏକାଠି ହୋଇ କାମ କରିବାକୁ କହୁଥିଲେ ମଧ୍ୟ ତା’ର କିଛିଦିନ ପରେ ନେତା ଗୋଷ୍ଠୀକନ୍ଦଳରେ ବ୍ୟସ୍ତ ରହିବାର ଅନେକ ନଜିର ରହିଛି  । ତେଣୁ ନିରଂଜନ ସମସ୍ତଙ୍କୁ ସାଙ୍ଗରେ ଧରି କେତେବାଟ ଚାଲିପାରୁଛନ୍ତି ତାହା ଉପରେ ହିଁ କଂଗ୍ରେସର ଭାଗ୍ୟ ଓ ଭବିଷ୍ୟତ ନିର୍ଭର କରିବ  । 

ଅଧିକ